NGOLWESITHATHU mhlaka 18 January ngo-2023 kwaba lesaziso esiqakathekileyo ku-jw.org esasisithi umfowethu uGage Fleegle lomfowethu uJeffrey Winder basebebekwe ukuthi babe ngamalunga eQula Elikhokhelayo laboFakazi bakaJehova. Abazalwane laba sebelesikhathi eside bekhonza uJehova bethembekile.

Umfowethu uFleegle wakhulela entshonalanga yePennsylvania e-U.S.A., futhi wakhuliswa ngabazali ababekhonza uJehova. Wathi engakafikisi iminyaka engu-20 imuli yangakibo yathuthela emaphandleni lapho okwakulabamemezeli abalutshwana khona. Ngemva kwesikhatshana nje wabhabhathizwa mhlaka 20 November ngo-1988.

Abazali bakamfowethu uFleegle babehlala bemkhuthaza ukuthi abe senkonzweni yesikhathi sonke. Babejayele ukunxusa ababonisi beziqinti labazalwane abasebenza eBhetheli emzini wabo. Umfowethu uFleegle wayekubona ukuthi abafowethu labodadewethu laba bayathokoza kakhulu. Waba liphayona lesikhathi sonke mhlaka 1 September ngo-1989, kungakadluli isikhathi eside ebhabhathiziwe. Ngemva kweminyaka emibili ephayona wabizwa eBhetheli. Lokhu kwagcwalisa isifiso ayebe laso kusukela eleminyaka engu-12. Waqalisa ukusebenza eBhetheli yeBrooklyn ngo-October 1991.

EseBhetheli umfowethu uFleegle wasebenza lapho okwenziwa khona amabhuku okweminyaka engu-8 ngemva kwalokho wasesiya kuhlangothi lwenkonzo. Okweminyaka emilutshwana ngalesosikhathi wayengena lebandla elalikhuluma ulimi lwesiRussia. Ngo-2006 watshada loNadia njalo baqalisa ukusebenza bonke eBhetheli. Bake bangena lebandla elikhuluma ulimi lwesiPortuguese njalo okweminyaka edlula engu-10 babengena lebandla elikhuluma ulimi lwesiSpanish. Ngemva kweminyaka eminengi esebenze kuHlangothi Lwenkonzo umfowethu uFleegle waya kuHlangothi Lwekhomithi Yokufundisa njalo ngemva kwesikhathi  wasesiya kuHlangothi Lwekhomithi Yenkonzo. NgoMarch 2022 waba ngumsizi weKhomithi Yenkonzo yeQula Elikhokhelayo.

Umfowethu uWinder yena wakhulela eMurrieta eseCalifornia e-U.S.A. Wafundiswa iqiniso ngabazali bakhe wasebhabhathizwa mhlaka 29 March ngo-1986. Ngenyanga eyalandelayo waba liphayona elisizayo. Wakukholisa kakhulu lokhu wafisa ukuqhubeka ephayona. Ngemva kwenyanga ezilutshwana eliphayona elisizayo waqalisa ukuba liphayona lesikhathi sonke ngo-October 1, 1986.

Esakhula wake wavakatshela abafowabo ababili ababesebenza eBhetheli. Lokhu kwenza wafisa ukuthi nxa angakhula ayesebenza khona. NgoMay 1990 wabizwa ukuthi azosebenza eBhetheli yeWallkill.

EBhetheli umfowethu uWinder wenza imisebenzi etshiyeneyo. Ngokwesibonelo, wake wasebenza kuHlangothi Lokuklina, loHlangothi Lokulima kanye loHlangothi Olubona Ngezisebenzi zaseBhetheli. Watshada lomkakhe u-Angela ngo-1997 futhi kusukela khonapho bebesebenza eBhetheli ndawonye. Ngo-2014 baya eWarwick lapho umfowethu uWinder afika ancedisa khona ekwakhiweni kwamawofisi ethu amakhulu. Ngo-2016 baya eWatchtower Educational Centre ePatterson lapho umfowethu uWinder afika wasebenza khona kuHlangothi Lokurekhoda. Ngemva kweminyaka emine babuyela eWarwick futhi umfowethu uWinder wacelwa ukuthi asebenze kuHlangothi Lwekhomithi Ebona Ngezisebenzi. NgoMarch 2022 waba ngumsizi weKhomithi yeQula Elikhokhelayo Ebona Ngezisebenzi.

Sikhulekela ukuthi uJehova aqhubeke ewabusisa amadoda la ‘ayizipho ezingabantu’ njengoba eqhubeka esebenza nzima emsebenzini woMbuso.—Efe. 4:8.