IPAN miércoles 18 de enero de 2023, onotlali se anuncio ipan jw.org: tokniuan Gage Fleegle niman Jeffrey Winder aman yejuamej teuamej itech Grupo akin Tlayekana ipan nochi tlanechikoltin. Yejuamej chikauak yokitekichiuilijkej Jehová miyek xiuitl.

Tokniuj Fleegle oueyiyak oeste de Pensilvania (Estados Unidos). Itajuan okimachtijkej itech Jehová. Niman ijkuak telpochkonetl katka, onochantitoj ipan se kalpan tlen uejka nokauaya niman ijkon ompa tenojnotsaskiaj. Yejua onoapolakti ipan 20 de noviembre de 1988.

Itajuan nochipa okiyolchikaujkej chikauak makitekichiuili Jehová. Yejuamej kinnotsayaj tokniuan tlayekankej ipan circuito niman betelitas matlakuatij inchan. Yejon okipaleui makita kenon tokniuan melak yolpakiyaj. Ipan 1 de septiembre de 1989, onochiuj precursor regular. Niman ome xiuitl sakin, ipan octubre de 1991, oyaj Betel de Brooklyn. Ijkuak kipiaya 12 xiuitl, yejua okijtojka ika ijkuak ueyiyaskia ontlapaleuiskia Betel. Niman kema ijkon okichiuj.

Ompa Betel opeuj tlapaleuiya kampa kinchijchiuaj amatlajkuiloltin niman ouejkauj 8 xiuitl. Sakin opeuj tlapaleuiya ipan Grupo akin Kiyekana Tenojnotsalistli. Ijkuak ompa tlapaleuijtoya, noijki opanok ipan se tlanechikojli kampa tlajtouayaj ruso. Ipan 2006 ononamikti iuan Nadia, niman ompa onokaujkej Betel. Yejuamej otlapaleuijkej ipan se tlanechikojli kampa tlajtouayaj portugués, niman ipantsin 10 xiuitl otlapaleuijkej kampa tlajtouayaj español. Tokniuj Fleegle melak ouejkauj otekit ipan Grupo akin Kiyekana Tenojnotsalistli, san ika, sakin okipatlakej kampa tekiti Grupo akin Kiyekana Tlamachtijli niman sakin okititlankej kampa tekiti Grupo akin Kiyekana Tenojnotsalistli.  Ipan marzo de 2022, opeuj tlapaleuiya ipan Grupo akin Kiyekana Tenojnotsalistli itech Grupo akin Tlayekana.

Tokniuj Winder onoskalti Murrieta (California). Itajuan okimachtijkej itech Jehová, niman onoapolakti ipan 29 de marzo de 1986. Se metstli sakin, onochiuj precursor auxiliar niman xok okikajkauj pampa melak okuelitak. Ipan 1 de octubre de 1986, onochiuj precursor regular.

Ijkuak telpochkonetl katka, tokniuj Winder okimitato omemej ikniuan akin nemiyaj Betel. Yejua okijto ika ijkuak noskaltiskia, noijki ompa yaskia. Niman ipan mayo de 1990 okinotskej matlapaleuiti Betel de Wallkill.

Ompa otlapaleui ipan Departamento de Limpieza, Departamento de la Hacienda niman Oficina de Betel. Ipan 1997 ononamikti iuan Angela, niman desde ijkuakon san sekan kuajtekichiuilijtiuej Jehová. Ipan 2014 okintitlankej Warwick, ompa tokniuj Winder otlapaleui ijkuak onochijchiuj oficina kampa noyekanaj nochi sucursales. Ipan 2016 okintitlankej Patterson, niman ompa otlapaleui ipan Servicios de Audio y Video. Naui xiuitl sakin onokuepkej Warwick, niman ompa tokniuj Winder opeuj tlapaleuiya kampa tekiti Grupo akin Kiyekana akin tekitij Betel. Niman ipan marzo de 2022 opeuj tlapaleuiya ipan Grupo akin Kiyekana akin tekitij Betel itech Grupo akin Tlayekana.

Yejuin tokniuan se itetlayokolil Jehová (Efes. 4:8). Matiktlajtlanilikan Jehová makinteochiua niman makinpaleui yejuin tokniuan pampa melak chikauak tekitij ipan ikalpan.