HARI Rabu, 18 mbaŵa si Sara 2023, so sambua gangombakhata si tohude ba jw.org sangombakhaʼö wa talifusöda Gage Fleegle hegöi Jeffrey Winder mufataro ira tobali Boto Solohe Ndra Samaduhuʼö Yehowa. No ara mangai halöwö ndra talifusöda si darua andre, ba lö faröi ira.

Talifusöda Fleegle teʼebuaʼö ia ba zindruhu. Samaduhuʼö Yehowa ndra satuania si toröi tanö ba gaekhula Pennsylvania, Amerika Serikat. Me ono matua ia, yaʼia hegöi ösi nomonia, findra ira ba mbanua side-ide enaʼö tola mangai halöwö ira ba nahia sabölö ato moguna sanuriaigö. Lö ara aefa daʼö, tebayagö ia idanö me 20 mbaŵa si Felezara 1988.

Ira satuania, lö tebulö lafarou dödö dalifusöda Fleegle enaʼö ihalö halöwö safönu inötö khö Yehowa. Asese lakaoni ba nomora ndra satua samasui hegöi ösi nomo Mbetieli. Iʼila talifusöda Fleegle wa ohahau sibai dödöra. Lö ara me no tebayagö ia idanö, tobali ia perintis biasa me 1 mbawa si Siŵa 1989. Dua fakhe aefa daʼö, mofozu ia ba wogamö ohitö dödönia si no iʼera-era iʼotarai me 12 fakhe ndröfinia, yaʼia daʼö mohalöwö ba Mbetieli. Ibörögö halöwönia ba Mbetieli Brooklyn me baŵa si Fulu 1991.

Ba Mbetieli, walu fakhe mohalöwö dalifusöda Fleegle ba bagian Penjilidan. Aefa daʼö, labeʼe halöwönia ba Departemen Dinas. Me luo daʼö, fao ia ba mbanua niha Keriso sangogunaʼö li Rusia. Me döfi 2006, mangowalu ia khö Nadia. Me no aefa mangowalu ira, mangai halöwö ira ba Mbetieli. No irai fao ira ba mbanua niha Keriso sangogunaʼö li Portugis, ba töra fulu fakhe fao ira ba mbanua niha Keriso sangogunaʼö li Spanyol. Me no aefa mangai halöwö ira ba zi hauga fakhe ba Departemen Dinas, tebeʼe halöwö khö dalifusöda Fleegle ba Kantor Panitia Pengajaran, aefa daʼö ba Kantor Panitia Dinas. Me baŵa si Tölu 2022, mufataro ia tobali asisten Panitia Dinas moroi ba Mboto Solohe.

 Teʼebuaʼö dalifusöda Winder ba zindruhu. Samaduhuʼö Yehowa ndra satuania ba toröi ira ba Murrieta, Kalifornia, Amerika Serikat. Tebayagö ia idanö me 29 mbaŵa si Tölu 1986. Sara waŵa aefa daʼö, ihalö gangetula tobali perintis ekstra. Omuso sibai dödönia wamalua halöwönia andrö. Börö daʼö, me no aefa merintis ekstra ia ba zi hauga waŵa, tobali ia perintis biasa me 1 mbaŵa si Fulu 1986.

Me ono matua ia, no irai möi dalifusöda Winder ba wamalukhaisi gaʼania si darua sohalöwö ba Mbetieli me luo daʼö. Feʼamöinia ba daʼö zamarou tödönia ba wangai halöwö ba Mbetieli na no ibönö ndröfinia. Me baŵa si Lima 1990, lakaoni ia ba Mbetieli Wallkill.

Sagötö feʼasonia ba Mbetieli, oya sibai departemen si no itörö talifusöda Winder, duma-dumania ba Departemen Pembersihan, Departemen Perladangan hegöi Kantor Betel. Me döfi 1997, mangowalu ia khö Angela, ba iʼotarai daʼö mangai halöwö ira ba Mbetieli. Me döfi 2014, lafindrakö ira ba Warwick, ba mohalöwö dalifusöda Winder ba wanolo halöwö fangotomosi fasilitas gödo sebua. Aefa daʼö me 2016, findra ira ba Pusat Pendidikan Menara Pengawal ba Patterson. Ba daʼö, mangai halöwö dalifusöda Winder ba Layanan Audio/Video. Öfa fakhe aefa daʼö, mangawuli ira ba Warwick, ba mangai halöwö dalifusöda Winder ba Kantor Panitia Personalia. Me baŵa si Tölu 2022, mufataro ia tobali asisten Panitia Personalia moroi ba Mboto Solohe.

Mangandrö ita enaʼö lö tebulö tefahowuʼö ira si no amaedola ”buala ba niha”, börö me lö tebulö laforege wohalöwö soguna ba Wamatörö Lowalangi.—Ef. 4:8.