PA CITATU, January 18, 2023, pa jw.org peikiwa cilengezo capadela cakuti mkwasu Gage Fleegle na mkwasu Jeffrey Winder, eikiwa kuti ankhale mbali ya Bungwe Yolamulila ya Mboni za Yehova. Onse aŵili atumikila Yehova mokhulupilika kwa nthawi itali.

Mkwasu Fleegle ekulila ku western Pennsylvania, U.S.A., ndipo ephunzisiwa cendi na makolo ŵake. Peenze wacilumbwana, banja yao yekukila ku katauni katontho ka ku munzi kwamene kwenzofunikila ofalisa anyinji. Nthawi itontho pavuli pake, yove ebatizika pa November 20, 1988.

Nthawi zonse, makolo a mkwasu Fleegle enzomulimbikisha kucita utumiki wanthawi zonse. Nthawi zinyinji, ove enzoitila oyanganila a madela na atumiki a pa Beteli ku ng’anda kwao. Ndipo mkwasu Fleegle enzoona cimwemwe ceenze naco akwasu na azilongosi aŵa. Nthawi itontho pavuli pakuti wabatizika, eyamba kutumikila monga mpainiya wanthawi zonse pa September 1, 1989. Pavuli pa vyaka viŵili, ekwanilisha colinga cake cotumikila pa Beteli ceciziikila peenze na vyaka 12. Yove eyamba kutumikila pa Beteli ya ku Brooklyn mu October 1991.

Pa Beteli, mkwasu Fleegle etumikila mu Dipatimenti Yopanga Mabuku kwa vyaka 8. Ndipo pavuli pake, eyamba kutumikila mu Dipatimenti ya Utumiki. Pa nthawi iyi, etumikila mumpingo wacilaŵilo ca Cirasha kwa vyaka vitontho. Mu 2006, elungula kalongosi Nadia wamene naye eyamba kutumikila pa Beteli. Pamozi, etumikila m’gao ya Cipotyugizi koma soti kwa vyaka vopitilila 10 m’gao ya Cisipanishi. Pavuli potumikila m’Dipatimenti ya Utumiki kwa vyaka vinyinji, mkwasu Fleegle eyamba kutumikila mu Ofesi ya Komiti Yophunzisa, ndipo pavuli pake eyamba kutumikila mu Ofesi ya Komiti ya Utumiki. Mu March 2022, esankhiwa kunkhala wothandiza m’Komiti ya Utumiki ya Bungwe Yolamulila.

 Mkwasu Winder ekulila ku Murrieta, California, U.S.A. Ephunzisiwa cendi na makolo ŵake ndipo ebatizika pa March 29, 1986. M’mwezi wokonkhapo eganizila zocitako upainiya woyavya, ndipo esangalala nao ngako cakuti enzofunishisha kupitilizhya. Pavuli pocita upainiya woyavya kwa miyezi itontho, eyamba kutumikila monga mpainiya wanthawi zonse pa October 1, 1986.

Peenze wacilumbwana, mkwasu Winder eluta kuyoona akwake aŵili amene enzotumikila pa Beteli. Izi zemuyavya kunkhala na cifuno cakuyotumikila pa Beteli akakula. Ndipo mu May 1990, eitiwa kuti akatumikile pa Beteli ya ku Wallkill.

Pa Beteli, mkwasu Winder eseŵenzela m‘madipatimenti osiyanasiyana monga Dipatimenti Yoyelesa, Dipatimenti ya Ulimi na Ofesi ya pa Beteli. Elungula mkazi wake Angela mu 1997, ndipo ankhala otumikila pamozi pa Beteli kuyambila nthawi yamene iyo. Mu 2014, eciyotumikila ku Warwick kwamene mkwasu Winder enzoyavya pa cimango ca likulu yasu ya pacalo conse. Mu 2016, eluta kuyotumikila ku Watchtower Educational Center ku Patterson, kwamene mkwasu Winder enzoseŵenzela mu Dipatimenti Yopanga Mavidyo. Pavuli pa vyaka 4 ewelela soti ku Warwick kwamene mkwasu Winder eyamba kutumikila mu Ofesi ya Komiti Yoyanganila Atumiki a pa Beteli. Mu March 2022, eikiwa kunkhala wothandiza m’Komiti Yoyanganila Atumiki a pa Beteli ya Bungwe Yolamulila.

Pemphelo yasu ni yakuti Yehova adalise akwasu aŵa amene ni “mphaso za analume” paakupitilizhya kuseŵenza mwakhama pocilikiza Ufumu wa Mulungu.—Aef. 4:8.