PA CITATU, 18 Janeiro, 2023, pa saite ya jw.org padaikhidwa nkhani ipsa yomwe ikhafotokoza bza abale awiri omwe adasankhulidwa kuti atumikire mu Bungwe Lakutonga la Mboni za Yahova. Abalewo ni Gage Fleegle na Jeffrey Winder. Abalewa amala magole mazinji akutumikira Yahova mwakukhulupirika.

M’bale Fleegle adabadwira m’banja la Mboni ndipo adakulira kumadokero kwa Pennsylvania, EUA. Pomwe iye akhali mulumbwana, banja la pai wace lidafulukira ku mbuto inango komwe kukhafunikira thandizo. Patsogolo pace, iye adabatizidwa pa ntsiku ya 20 Novembro, 1988.

Abereki wa M’bale Fleegle akhalimbikisa m’baleyu kuti acite utumiki bwa nthawe zentse. Kazinji-kazinji iwo akhambatambira anyakunyang’anira dera na abale wa pa Beteli pa mui pawo. Ndipo bzimwebzi bzidacitisa M’bale Fleegle kuwona momwe abalewo akhaliri wakukondwa thangwe ra basa lomwe akhacita. Pomwe adabatizidwa, palibe kutenga nthawe iye adayamba kucita upainiya pa 1 Setembro, 1989. Pomwe padapita magole mawiri, iye adakwanirisa cakulinga comwe akhanaco pomwe akhana magole 12. Iye adacemeredwa kuti akatumikire pa Beteli. Iye adayamba basa lace la pa Beteli mu Outubro 1991, ku Beteli ya ku Brooklyn.

Ku Beteliko, M’bale Fleegle adaphata basa mu Depatimenti ya kukonza mabukhu magole 8, ndipo patsogolo pace, iye adadzatumikira mu Depatimenti ya Utumiki. Pa nthawe imweyo, iye adatumikira mu gwere la cirewedwe ca ku Rússia magole mang’ono-ng’ono. Mu 2006, iye adalowola mkazi wace, Nadia, ndipo wentse adapitiriza kutumikira pa Beteli. Iwo atumikira pabodzi mu gwere la Cipwitikizi ndipo adatumikirambo magole yakupitirira 10 mu gawo la Cixipanyol. Pambuyo pa kumala magole mazinji akutumikira mu Depatimenti ya Utumiki, M’bale Fleegle adauzidwa kuti atumikire mu Komiti Yakusamalira Basa Lakupfunzisa, ndipo patsogolo pace adatumikira mu Cipinda ca Komiti ya Utumiki. Mu Março 2022  adayamba kutumikira ninga mthandizi wa Komiti ya Utumiki ya Bungwe Lakutonga.

M’bale Winder adaleredwa na abereki wace wacikristau ku Murrieta, Califórnia, EUA. Ndipo adabatizidwa pa 29 Março, 1986. Mwezi wa mangwana wace, iye adayambiratu kucita upainiya bwakuthandiza. Iye adakomedwa kwene-kwene na upainiyabo ndipo adafuna kupitiriza. Pomwe padapita minyezi ming’ono-ng’ono, iye adayamba kutumikira ninga mpainiya wakukhazikika, kuyambira pa 1 Outubro, 1986.

Pomwe M’bale Winder akhali tswaka, iye adayenda ku Beteli kukawona abale wace awiri omwe akhatumikira pa Betelipo. Bzimwebzi bzidamucitisa kuti iye afune kuprenceri formulariyo ya kuyenda ku Beteli akadzakula. Mu Maio 1990, iye adacemeredwa kuti akatumikire pa Beteli ku Wallkill.

Pa Betelipo, M’bale Winder adaphata basa m’madepatimenti yakusiyana-siyana kuphatanizambo Depatimenti ya Limpeza, Depatimenti ya Ulimi na Cipinda ca Beteli. Iye adalowola mkazi wace, Angela, mu 1997. Ndipo kuyambira nthawe imweyo mpaka pano, iwo akupitiriza kutumikira pa Beteli. Mu 2014, iwo adayendesedwa ku Warwick, komwe M’bale Winder adakathandizira pa basa la kunyang’anira kumangidwa kwa likulu lathu la pa dziko lentse. Mu 2016, iwo adayenda kukatumikira ku Likulu la Mapfunziro la Watchtower ku Patterson. Kumweko M’bale Winder adakaphata basa na Mabasa ya Audiyo/Vidiyo. Pomwe padapita magole manai, iwo adabwerera pomwe ku Warwick, ndipo M’bale Winder adakaphata basa mu Cipinda ca Komiti Yakuwona bza Atumiki Wakupambulika wa Nthawe Zentse. Mu Março 2022, iye adaikhidwa kuti akhale mthandizi wa Komiti Yakuwona bza Atumiki Wakupambulika wa Nthawe Zentse ya Bungwe Lakutonga.

Tikupemba kwa Yahova kuti asimbe abalewa pomwe akucita basa lawo “ninga mphaso” kuti alicite na mtima wentse pa kuthandizira Umambo bwa Yahova. — Aefezo 4:8.