PAKITATU, Januwale 18, 2023, ikimanyisyo ikya padela kyabonike pa jw.org, iki kyayobagha ukuti Unkamu Gage Fleegle na Jeffrey Winder bimikiwe ukuya Bankabughatila Kakulongosya aka Baketi ba Yehova. Abakamu babili aba bosa bambombile Yehova mbusubiliwa kwa fyinja fingi.

Unkamu Fleegle akulile kubuyongelo isuba kwa Pennsylvania, U.S.A., kangi abapapi bake bope Baketi ba Yehova. Bo wakilumyana, imbumba yabo yasamile nkaya kamo ku katawuni akanandi kuno kwalondiwagha abafumusi bingi ba Bunyafyale. Bo bafikile itolo ku malo agha, Unkamu Fleegle alyosiwe pa Novembala 20, 1988.

Utubalilo tosa, abapapi ba Nkamu Fleegle bankasyagha ukuti ande ububombeli bwa kabalilo kosa. Utubalilo twingi abapapi bake babakolelagha abakwendela idela na aba bikubombela pa Beteli ukuti bise pakwangala kumyabo kangi Unkamu Fleegle aketagha ulusekelo lwa bakamu na balumbu aba. Akabalilo akapimba itolo ukufuma apa alyosiwe, alyandile ubupayiniya bwa kabalilo kosa pa Seputembala 1, 1989. Bo pakindile ifyinja fibili, afwanisye ubwighane bwake ubu ali nabo ukufuma itolo bo ali nifyinja 12. Bwali bwighane bwakubombela pa Beteli. Alyandile ukubombela pa Beteli ya ku Brooklyn mu Okutobala 1991.

Bo ali pa Beteli, Unkamu Fleegle abombile ku Dipatimenti ya Kupanga Amabuku kwa fyinja 8 kangi ukufuma apo, alyandile ukubombela ku Dipatimenti ya Bubombeli. Pakabalilo kala, abombelagha nkipanga ikya njobelo ya ku Russia kwa fyinja finandi itolo. Mu 2006 alimweghile unkasi wake, Nadia, kangi yope alyandile ukubombela pa Beteli. Unkamu Fleegle nunkasi wake, babombile nkighaba kya njobelo ya Kipwitikizi. Kangi babombile nkighaba kya njobelo ya Kispanishi kwa fyinja ifyakukinda 10. Bo abombile mu Dipatimenti ya Bubombeli kwa fyinja fingi, Unkamu Fleegle abuliwe ukuti ande ukubombela mu Ofesi ya Komiti ya Kumanyisya kangi panyuma pake alyandile ukubomba mu Ofesi ya Komiti ya Bubombeli.  Mu Malichi 2022 alimikiwe ukuti aye ntuli mu Komiti ya Bubombili iya Kabughatila Kakulongosya.

Unkamu Winder akulile ku Murrieta, California, U.S.A. Abapapi bake bo aba balimmanyisye ubwanaloli kangi alyosiwe pa Malichi 29, 1986. Mmwesi wa Epulelo asalile ukuti ande ukubomba ubupayiniya bwa kabalilo. Umwene ahobokagha fiyo yonongwa yake asalile ukuti akindilile ukubomba ubupayiniya. Bo abombile ubupayiniya bwa kabalilo kwa myesi mingi, alyandile ubupayiniya bwa kabalilo kosa pa Okutobala 1, 1986.

Bo wakilumyana, Unkamu Winder abukile pakwangala na bakulu bake babili aba babombelagha pa Beteli pakabalilo kala. Ukubomba isi kwalimpangisye ukuti aye nubwighane bwakuti linga akulile, asasume ububombeli bwa pa Beteli. Mu Meyi 1990, balinkolile ukuti akande ukubombela ku Beteli ya ku Wallkill.

Bo ali pa Beteli, Unkamu Winder abombelagha mu madipatimenti aghakukindanakindana. Mwakifwanikisyo, abombagha ku Dipatimenti ya Kwelusya, Idipatimenti ya Bulimi na mu Ofesi ya Beteli. Umwene alyeghile unkasi wake, Angela, mu 1997, kangi babombelagha pampene pa Beteli ukufuma pakabalilo kalakala. Mu 2014 babasamikisye ku Warwick, kuno Unkamu Winder atulagha mumbombo sya kuyenga inyumba sya ofesi inywamu pakisu kyosa. Mu 2016 basamile ku Watchtower Educational Center ku Patterson, kuno Unkamu Winder abombelagha mu Bubombeli bwa Mavidiyo ni Fyakupilikisya. Bo ifyinja fikindilepo, baghomokile kangi ku Warwick, kangi Unkamu Winder abuliwe ukuti abombeleghe mu Ofesi ya Komiti iyi Yikuketesya Ababombeli ba pa Beteli. Mu Malichi 2022 alimikiwe ukuya ntuli mu Komiti iyi Yikuketesya Ababombeli ba pa Beteli iya Kabughatila Kakulongosya.

Tukunsuma Yehova ukuti abasayeghe abakamu aba ‘fyabupe mbandu’ bo bikukindilila ukwiyula pambombo ya Bunyafyale.—Ef. 4:8.