NYƆƆ Taa Deelookaɛ 18 Biradee, Tua Enɔɔ̄ bu zua 2023, bee lu enɛ ziī keebee nɛmuɛ̄ nyɔɔ jw.org kɔ, elua etubobahloo Wuga Gage Fleegle le Jeffrey Winder nua pya a le yɛɛ Eku A Baɛbee Pya Ekeebee Jɛhova. Baɛ wuga nɛɛdam ama esiatam nɛ Jɛhova bu bɔ ture nyiɛ loo bu gbɛnɛ-edo zua.

Bee lu ekpɔā wuga Fleegle bie barasī kɛ̄ enaani wee dɛp kii loo Pennsylvania, U.S.A., tɛ̄mabah ye tɛ le ye ka lo ba ɛrɛ bɔɔ loo Bari. Sɔ̄ a bee le lop le dɛrɛ zua, ye tɛ le ye ka bee kii ziī nwīgbagbara buɛ̄ kɛ̄ ebɛɛ̄ tam zue ue bee le. Sɔ̄ sɔ̄ naa binia aā lo sɔ̄, a bee liamaā nyɔɔ 20 biradee Lop le Eziī Enɔɔ̄, bu zua 1988.

Tɛ Wuga Fleegle le ye ka wee ye yere mɛm loo dɛ̄dɛɛ̄ sɔ̄ kɔ a yii bu tam mmɛɛ sɔ̄. Pya kuūdɛɛ̄loo sɛkiut le pya a gaa si tam Bɛtɛl wee tɔɔ̄ wa tɔ gbɛnɛkpo sɔ̄, e wo wee doo kɔ Wuga Fleegle a muɛ dua ɛɛbu pya wuga nɛɛdam le nɛɛwa ama gaa ɛrɛ. Sɔ̄ sɔ̄ naa binia aā sɔ̄ a bee liamaā, a bee bɔātɛ̄ tam sɛmdee nyɔɔ 1 biradee bu Ɛrɛnia Enɔɔ̄, bu zua 1989. Sɔ̄ baɛ zua etɛ̄na, a bee doo gbɔ̄mɛɛ nu a bee seeasī sɔ̄ a bee le 12 zua, lo a le si tam Bɛtɛl. A bee bɔātɛ̄ ye esiatam bie Bɛtɛl a le Brooklyn bu Lop Enɔɔ̄, bu zua 1991.

Sɔ̄ Wuga Fleegle bee le Bɛtɛl, a bee si tam bie tɔtam kwa kpa loo ɛrɛtaa zua, e sɔ̄ esaa, alu enyaana ye ture Service Depatmɛnt. Bu pya sɔ̄ ama, a bee gbaaloo ziī bɔŋanaloo a kɔ muɛ̄ ue pya Russia bu pio zua. Bu zua 2006, a bee ii ye wa a kura Nadia lo a bee ye nyɔɔnɛ si tam Bɛtɛl. Baɛ aba bee gbaa si tam zue ue bie barasī ba kɔ muɛ̄ ue pya Portugal sa sinage tam bie barasī ba kɔ Spanish bu nu a yeeloo lop zua. Sɔ̄ Wuga Fleege esiatam bu gbɛnɛ-edo zua bie Service Depatmɛnt, bee lu enyaana ye kɔ  a si tam Teaching Commitii Office, e sɔ̄ esaa, alu enyaana ye ture Service Commitii Office. Bu Taa Enɔɔ̄ bu zua 2022, bee lu etubo ye bahloo nua nɛɛ a gaa yerebah nɛ Service Commitii loo Eku A Baɛbee.

Bee lu ekpɔā Wuga Winder bie Murrieta, California, U.S.A. Ye tɛ le ye ka lo ba wee taāŋabah Jɛhova bee ye kpɔā bu dee kaka sa a bee liamaā nyɔɔ 29 biradee Taa Enɔɔ̄ bu zua 1986. Bu nu a dap lu ziī enɔɔ̄ aā sɔ̄ a bee liamaā, a bee bɔātɛ̄ esɛmdee bu nwīkere sɔ̄. A bee ye kpeloo mmɛ kɛ̄ a naa gbī e’ɔbɛ. Sɔ̄ esiatam sɛmdee bu nwīkere sɔ̄ loo pio enɔɔ̄, a bee bɔātɛ̄ esitam sɛmdee dɛ̄dɛɛ̄ sɔ̄ nyɔɔ 1 biradee Lop Enɔɔ̄ bu zua 1986.

Doodoo nɛɛ a le zege, Wuga Winder bee si loo baɛ ye gbɛnɛ wuga nɛɛdam lo ba aa bee si tam Bɛtɛl lo sɔ̄. Sisi wa loo bee doo kɔ a agɛrɛbah ɛrɛ taɛ lo esitam Bɛtɛl sɔ̄ enyima tura nɛɛ. Bu O’oo Enɔɔ̄ bu zua 1990, bee lu ekue ye kɔ a si tam Bɛtɛl bie tɔ-naatam a le Wallkill.

Wuga Winder bee si tam keekee depatmɛnt gbaāloo Cleaning Depatmɛnt, Farm Depatmɛnt, le Bethel Office bie Bɛtɛl. A bee ii ye wa a kura Angela bu zua 1997, e aā lo sɔ̄, ba le gaa si tam Bɛtɛl. Bee lu e’obara Wuga Winder ture tɔ-naatam a le Warwick bu zua 2014, e bie lo kɛ̄ a bee yerebah lo ewu tɔ a le i beekɛ̄ bu yube nyɔuwe. Ba bee kii Watchtower Educational Center a le Patterson bu zua 2016, e bie lo kɛ̄, Wuga Winder bee si tam depatmɛnt a kura Audio/Vidio Services. Sɔ̄ nia zua etɛ̄na aā lo sɔ̄, ba bee obia kii Warwick, e a bee lu ekɔ Wuga Winder a si tam Personnel Committee Office. Bu Taa Enɔɔ̄ bu zua 2022, bee lu etubo ye bahloo nua nɛɛ a gaa yerebah nɛ Personnel Committee loo Eku A Baɛbee.

I kara na kɔ Jɛhova a nɛ leelee pya nɛɛ a nɛ “keekee dɔɔ̄nu” ama sɔ̄ ba gaa kiisī lo esu Buɛ̄-mɛnɛ Bari nua tuatua bu wa dum.—Ɛfɛs 4:8.