2023 анзи 18 январи, ӕртиккӕги, сайти jw.org фӕззиндтӕй ӕхсидзгӕ игъосуйнаг. Уоми дзурд цудӕй, ӕнсувӕртӕ Гейдж Флигл ӕма Джеффри Уиндер нисангонд ке ӕрцудӕнцӕ Йегови Ӕвдесӕнти Разамонӕг советмӕ. Етӕ берӕ ӕнзти дӕргъи Йеговӕн еузӕрдонӕй лӕггадӕ кӕнунцӕ.

Ӕнсувӕр Гейдж Флигл исирӕзтӕй Америки Еугонд Штатти, штат Пенсильваний нигулӕн хаййи. Ӕ бийнонтӕ Йегови Ӕвдесӕнтӕ адтӕнцӕ. Ирӕзгӕ кари ку адтӕй, уӕд ӕ бийнонтӕ цӕрунмӕ рандӕ ’нцӕ, игъосунгӕнгутӕ кӕми нӕ фагӕ кодта, уӕхӕн минкъий горӕтмӕ. Уобӕл берӕ нӕ рацудӕй, ӕма 1988 анзи 20 ноябри донаргъуд райста.

Гейджи ӕ ниййергутӕ алкӕддӕр разӕнгард кодтонцӕ, цӕмӕй ӕнхӕстрӕстӕг лӕггадӕ кодтайдӕ. Сӕ хӕдзари арӕх ӕрлӕууиуонцӕ районон цӕстӕдаргутӕ ӕма вефилӕгтӕ, ӕма ’й Гейдж уидта, еци хуӕртӕ ӕма ӕнсувӕртӕ куд амондгун ӕнцӕ, уой. Донаргъуд ку райста, уобӕл анз дӕр нӕ рацудӕй, уотемӕй 1989 анзи 1 сентябри ӕнхӕстрӕстӕг лӕггадӕ кӕнун райдӕдта. 12 анзи ибӕл ку цудӕй, уӕд ӕ рази исӕвардта нисан: Вефили лӕггадӕ кӕнун. Ӕма 1991 анзи октябри ӕ нисан ӕ къохи бафтудӕй. Фӕ ’й худтонцӕ Бруклини Вефили лӕггадӕ кӕнунмӕ.

Вефили ӕнсувӕр Флигл аст анзи типографий фӕккуста, уой фӕсте ба ’й иснисан кодтонцӕ, игъосун кӕнунбӕл дзуаппдӕттӕг хайадӕмӕ. Еци рӕстӕг ӕнсувӕр Флигл лӕггадӕ кодта уруссаг ӕмбурди. 2006 анзи ӕ цард байеу кодта Нади хӕццӕ, ӕма е дӕр ӕ хӕццӕ Вефили лӕггадӕ кӕнун райдӕдта. Етӕ лӕггадӕ кодтонцӕ португайлаг ӕвзагбӕл дзорӕг ӕмбурди, уой фӕсте ба дӕс анземӕй фулдӕр испайнаг ӕмбурди. Игъосун кӕнунбӕл дзуаппдӕттӕг хайади берӕ рӕстӕг ку фӕллӕггадӕ кодта, уӕд ӕй уой фӕсте иснисан кодтонцӕ Ахуради комитети бюромӕ, уой фӕсте Игъосун кӕнунбӕл дзуаппдӕттӕг комитети бюромӕ. 2022 анзи мартъий ба ’й иснисан кодтонцӕ Разамонӕг совети Игъосун кӕнунбӕл дзуаппдӕттӕг комитети ӕнхусгӕнӕгӕй.

 Ӕнсувӕр Уиндер исирӕзтӕй горӕт Марриети (штат Калифорни, АЕШ). Ӕ бийнонтӕ дӕр Йегови Ӕвдесӕнтӕ адтӕнцӕ. Ӕнсувӕр Уиндер донаргъуд райста 1986 анзи 29 мартъий. Донаргъуд куддӕр райста, уотӕ ӕнхусгӕнӕг пионерӕй лӕггадӕ кӕнун райдӕдта. Игъосун кӕнун ӕ зӕрдӕмӕ хъӕбӕр цудӕй, ӕма уомӕ гӕсгӕ, цалдӕр мӕйи ку рацудӕй, уӕд 1986 анзи 1 октябри ӕнхӕстрӕстӕг пионерӕй лӕггадӕ кӕнун райдӕдта.

Джеффри ирӕзгӕ кари ку адтӕй, уӕд иуазӕгуати ӕрбацудӕй е ’нсувӕртӕмӕ. Уӕд етӕ Вефили лӕггадӕ кодтонцӕ. Ӕ зӕрдӕмӕ уотӕ хъӕбӕр фӕццудӕй, ӕма ӕхе дӕр бафӕндадтӕй Вефили лӕггадӕ кӕнун. Ӕнгъӕлмӕ кастӕй, курдиадӕ ӕ бон бадӕттун кӕд уодзӕй, еци рӕстӕгмӕ. Ӕма ’й 1990 анзи маййи фӕххудтонцӕ Уолкилли Вефилмӕ.

Вефили Джеффри лӕггадӕ кодта аллихузи хайӕдти: ӕфснайуни хайади, рӕзӕ ӕма халсарти куст кӕми кодтонцӕ, уоми ӕма Вефили бюрой. 1997 анзи ӕ цард байеу кодта Анджели хӕццӕ, ӕма уӕдӕй фӕстӕмӕ Вефили еумӕ лӕггадӕ кӕнунцӕ. 2014 анзи ӕнсувӕр Уиндери иснисан кодтонцӕ Уорвикмӕ ӕма уоми ӕнхус кодта сӕйраг хайади бӕстихӕйттӕ амайунмӕ. 2016 анзи ба сӕ иснисан кодтонцӕ Паттерсони Гъӕуайгӕнӕн мӕсуги Ахурадон центрмӕ. Уоми лӕггадӕ кодта аудио ӕма видеозаписи хайади. Цуппар анзей фӕсте Уорвикмӕ ӕрӕздахтӕнцӕ ӕма Джеффрий иснисан кодтонцӕ, Лӕггадгӕнгути ка иснисан кӕнуй, еци комитети бюромӕ. 2022 анзи мартъий ба ’й иснисан кодтонцӕ Лӕггадгӕнгути ка иснисан кӕнуй, еци комитети ӕнхусгӕнӕгӕй.

Еци ӕнсувӕртӕ ӕнцӕ Йегови лӕвӕрттӕ. Хуцауи Паддзахади гъуддаги берӕ архайунцӕ. Мах Йеговӕй корӕн, цӕмӕй син идарддӕр дӕр ӕнхус кӕна! (Еф. 4:8).