NÄꞌÄ rä pa mierkole 18 de rä enero de rä je̱ya 2023, bi ꞌmo̱ꞌtse nꞌa rä anunsio ha jw.org. Ha nunä anunsio bi mhää ge rä ku Gage Fleegle ꞌne rä ku Jeffrey Winder, xki thutsꞌi pa dä forma ꞌnehe rä Cuerpo Gobernante de yä Testigo rä Jeoba. Nuyu̱ yä ku ya pe̱ꞌtsi ndunthi yä je̱ya pe̱päbi rä Zi Dada Jeoba.

Rä ku Fleegle bi te ha Estados Unidos ha rä hnini Pensilvania. Yä dada bi ꞌñuti de rä Zi Dada Jeoba nuꞌmu̱ mrä bäsjäꞌi. Rä ku Fleegle ꞌne yä dada bi ma bä ꞌmu̱i ha mä nꞌa rä luga habu̱ mi ja mꞌe̱di rä mfatsꞌi pa toꞌo dä predika. ꞌNepu̱ himbi thogi ndunthi —rä 20 de rä nobiembre de 1988— rä ku Fleegle bi nxixtehe.

Yä dada mi ho dä mbitabi ha rä nguu nuꞌu̱ yä ku mi umbäbi mäxo̱ge de yä tiempo rä Zi Dada Jeoba; ngu yä superintendente de gä circuito ꞌne nuꞌu̱ yä ku mi mpe̱fi ha rä ngu Betel. Rä ku Fleegle bi hyandi hängu rä johya mi pe̱ꞌtsi nuyu̱ yä ku. Rä 1 de rä septiembre de 1989 mꞌe̱fa de bi nxixtehe rä ku Fleegle, bi mu̱di bi me̱päbi rä Zi Dada Jeoba de gä precursor regular. Pe nuꞌmu̱ mi pe̱ꞌtsi 12 nje̱ya, rä ku Fleegle bi mu̱di bi desia dä ma dä mfaxte ha rä ngu Betel. Por fin näꞌä rä zänä oktubre de rä 1991, ¡bi kumpli näꞌä xki desia ngeꞌä bi tsꞌohni ha rä ngu Betel de Brooklyn pa dä ma dä mfaxte!

Ha rä ngu Betel, durante 8 nje̱ya rä ku Fleegle bi mfaxte ha näꞌä rä taller habu̱ mi thoki yä mfistꞌofo. ꞌNepu̱, mꞌe̱fa bi ꞌmati pa nubye̱ bi mfaxte ha rä Departamento de Servicio. Po näꞌä tiempoꞌä, rä ku Fleegle bi mfaxte ha nꞌa mhuntsꞌi de rä idioma ruso. Po rä je̱ya 2006 bi nthäti ko rä nju Nadia ꞌne dende geꞌmu̱ xä mfaxte mähye̱gi ha rä ngu Betel. Po nꞌa rä tiempo bi mfaxte ha nꞌa rä mhuntsꞌi de rä idioma portugués ꞌne ya tsitsꞌi 10 nje̱ya faxte ha nꞌa rä mhuntsꞌi de gä ñhämfo̱. Ya mi pe̱ꞌtsi ndunthi yä je̱ya de mi faxte rä ku Fleegle ha rä Departamento de Servicio ora bi tꞌembäbi ge nubye̱ ma xä mfaxte ha rä Oficina del Comite de Enseñanza. ꞌNepu̱ bi ꞌmoni pa ha rä Oficina del Comité de Servicio. Po rä märso de rä 2022,  nubye̱ bi thutsꞌi pa dä mfaxte ha rä Comité de Servicio de rä Cuerpo Gobernante.

Rä ku Winder bi te ha Estados Unidos ha rä hnini Murrieta California. Yä dada bi ꞌñuti de rä Zi Dada Jeoba dende mi bätsi ꞌne bi zo̱ho̱ bi nxixtehe rä 29 de märso de 1986. Mi thogi nꞌa nzänä bi mu̱di bi me̱päbi rä Zi Dada Jeoba de gä precursor auxiliar. Xa bi dini ndunthi rä johya hänge bi ne bi sigi. Mi thogi rꞌa yä zänä, rä 1 de oktubre de 1986 nubye̱ bi mu̱di bi me̱päbi rä Zi Dada Jeoba de gä precursor regular.

Nuꞌmu̱ ya bi njoben, nꞌa rä pa rä ku Winder bi ma bä tso̱ni yoho yä ku nuꞌu̱ mi faxte ha rä ngu Betel. Geꞌä bi nupäbi ndunthi rä mfeni pa dä ñuꞌtsi ꞌnehe rä solisitu ora ya xä nja rä je̱ya. Po rä mäyo de rä 1990, bri mbitabi dä ma dä mfaxte ha rä ngu Betel de Wallkill.

Ha rä ngu Betel bi tꞌumbäbi rꞌa nꞌañꞌo yä ꞌme̱fi. Por ejemplo, bi mfaxte ha rä Departamento de Limpieza, ha rä Departamento de la Hacienda ꞌne ha rä Oficina de Betel. Po rä je̱ya de 1997, bi nthäti ko rä zi nju Angela ꞌne dende geꞌmu̱ faxte mähye̱gi ha rä ngu Betel. Ha rä je̱ya 2014, rä ku Winder ko rä zi ꞌme̱hñä bi ꞌmoni pa Warwick pa bi mfaxte ha rä grupo de gä construcción. Po rä je̱ya 2016, nubye̱ bi ꞌmoni pa ri ma ha Patterson habu̱ bi ja nuꞌu̱ yä dängä ngunsadi fädi ngu rä Centro Educativo de la Watchtower, pa nubye̱ bi mfaxte ha rä departamento de Servicios de Audio y Video. Ja bi durani goho nje̱ya, ꞌnepu̱ bi ꞌme̱hni mänꞌaki ha Warwick habu̱ rä zi ku Winder bi thutsꞌi dä mfaxte ha rä Oficina del Comité del Personal. Po rä märso de rä 2022, rä zi ku Winder nubye̱ bi thutsꞌi pa dä mfaxte ha rä Comité de Personal de rä Cuerpo Gobernante.

Di xatuäbihu̱ rä Zi Dada Jeoba pa dä sigi dä jäpi rä zi ku Fleegle ꞌne rä zi ku Winder, pa njabu̱ dä sigi dä mfaxte ha nuꞌu̱ yä ꞌme̱fi ja ha rä hnini rä Zi Dada Jeoba. Hää, nuyu̱ yä zi ku, nꞌa rä regalo bi ehe de rä Zi Dada Jeoba (Efes. 4:8).