AUM Medwäakj, dän 18. Jaunewoa 2023 jeef daut opp de jw.org Websied eene besondre Bekauntmoakunk. Daut säd doa, daut Brooda Gage Fleegle un Brooda Jeffrey Winder nu aunjestalt wieren, em Väastaunt von Jehowa siene Zeijen to deenen. Dise beid Breeda haben Jehowa aul väl Joaren tru jedeent.

Brooda Fleegle woss em Wasten von Pennsylvanien, enne Stäts, opp. Siene Elren trocken am enne Woarheit opp. Aus hee een Jugentlicha wia, trock siene Famielje no eene Renzh, wua daut aun mea Vekjindja fäld. Een Stoot lota leet hee sikj deepen, aum 20. Nowamba 1988.

Brooda Fleegle siene Elren rooden am emma too, met dän Voltietdeenst auntofangen. Dee kroagden foaken Kjreisoppsechtasch un Beteliten no äa Hus, un doaderch kunn Brooda Fleegle seenen, woo schaftich dise Breeda un Sestren wieren. Dän 1. Septamba 1989 funk hee met dän Pioniadeenst aun, nich lang nodäm hee sikj haud deepen loten. Twee Joa lota kunn hee daut doonen, waut hee sikj aul von 12 Joa aun väajenomen haud: Hee kunn em Betel deenen. Em Oktooba 1991 funk hee aun, en daut Betel en Brooklyn to deenen.

Em Betel schauft Brooda Fleegle acht Joa enne Drekjarie. Dan kjrieech hee eene niee Toodeelunk – daut wia en de Deenstaufdeelunk. To dee Tiet wia hee fa een poa Joa en eene rusche Vesaumlunk. Aune 2006 befried hee sikj met siene Fru Nadia, dee dan uk em Betel nennkjeem. Dan wieren dee toop en daut portugiesische Jebiet, un fa äwa tieen Joa wieren dee uk en daut spaunische Jebiet. Brooda Fleegle deend väl Joaren en de Deenstaufdeelunk, bat hee wada eene niee Toodeelunk kjrieech, en de Offiz vom Liakommitee un lota noch en de Offiz vom Deenstkommitee. Em Moaz 2022 wort hee aus Helpa aunjestalt en daut Deenstkommitee vom Väastaunt.

 Brooda Winder woss en Murrieta, Kalifornien, enne Stäts opp. Siene Elren trocken am enne Woarheit opp, un hee leet sikj aum 29. Moaz 1986 deepen. Fuaz de näakjste Moonat wort hee Pioniahelpa. Hee jleicht daut soo sea, daut hee doamet bloos wiedamoaken wull. Nodäm hee fa miere Moonat Pioniahelpa jewast wia, wort hee Pionia aum 1. Oktooba 1986.

Aus Brooda Winder een Jugentlicha wia, besocht hee siene twee Breeda, waut to dee Tiet em Betel deenden. Doaderch kjrieech hee dän Wunsch, sikj fa daut Betel auntojäwen, wan hee ieescht jrata wia. Em Mei 1990 wort hee dan enjelot, em Betel en Wallkill to deenen.

Brooda Winder schauft em Betel en veschiedne Aufdeelungen, biejlikj bie de Reinjunks-Aufdeelunk, de Foarm-Aufdeelunk un de Betel-Offiz-Aufdeelunk. Aune 1997 befried hee sikj met Angela un dee schauften von dan aun toop em Betel. Aune 2014 worden dee no Warwick jeschekjt, wua Brooda Winder dan bie daut Buwoakj von de Hauptoffiz metholp. Aune 2016 worden dee no daut Betel en Patterson jeschekjt, wua Brooda Winder dan met de Audio- un Video-Deensten metholp. Vea Joa lota worden de trigj no Warwick jeschekjt un Brooda Winder schauft en de Offiz vom Kommitee fa Betelmetoabeida met. Em Moaz 2022 wort hee aus Helpa aunjestalt en de Offiz vom Kommitee fa Betelmetoabeida vom Väastaunt.

Wie bäden doarom, daut Jehowa dise “Mana, waut Jeschenkja sent”, sea säajnen mucht, daut see wieda sea fa daut Kjennichrikj schaufen kjennen (Efs. 4:8, NW).