PA CHITATU 18 Janeiro 2023, chilengezo chokomedza maninge chidayikhiwa pa jw.org, chonena kuti m’bale Gage Fleegle na Jeffrey Winder adaikhiwa kuti atumikire mu Bungwe Yotonga ya Mboni za Yahova. Abale awiri mwawa, anambiri yabwino pa nkhani ya kutumikira Yahova mokhulupirika.

M’bale Fleegle adalerewa ku mbali ya kumaulo ya boma ya Pennsylvania, Estados Unidos da América na azibereki wake wa Mboni za Yahova. Pomwe iye wenze mulubwana banja yawo idafuluka nkuyenda ku thaundi inango komwe kungadekana ofalisa azinji. Kanthawe pang’ono iye adabatiziwa pa 20 Novembro, 1988.

Azibereki wa m’bale Fleegle nthawe zose ambamulimbikisa kuti adzachite utumiki wa nthawe zose. Nthawe zizinji azibereki wa m’bale Fleegle ambatambira alendo makamaka onyang’anira dera na atumiki wa pa Beteli. M’bale Fleegle ambawona momwe abale na alongo mwawa momwe enzere okondwa. Ndipo padandobatiziwa iye adayamba kutumikira ninge mpainiya wokhazikika pa 1 Setembro, 1989. Magole yawiri patsogolo pake, iye adakwanirisa cholinga chake chomwe wenze nacho kuyambira pomwe wenze na magole 12 chomwe ni kutumikira pa Beteli. Iye adayamba utumiki wake ku Beteli ya ku Brooklyn mu Outubro 1991.

Ku Beteli, m’bale Fleegle adaphata basa yodinda mabukhu kwa magole 8. Pambuyo pa vimwevi iye adayikhiwa mu Dipatimenti ya Utumiki. Pa nthawe mweyire iye adatumikira kwa magole yanganani mumpingo wa chiyankhulo cha Chirussa. Mu 2006 adalowolana na Nadia, adabvumiziwapomwe kukatumikira pa Beteli. Pabodzi ose ambatumikira mu gawo ya chiyankhulo cha Chipwitikizi. Ndipo kwa magole yoposha 10, adatumikira mu dera ya espanhol. Padamala magole yazinji ankutumikira pa Dipatimenti ya Utumiki, m’bale Fleegle adayikhiwa kuti ambatumikire mu Komiti Yowona Basa Yopfunzisa. Ndipo patsogolo pake adatumikira pa Ofesi ya Utumiki. Mu Março  2022, iye adayikhiwa kukhala wothandiza mu Komiti ya Utumiki ya Bungwe Yotonga.

M’bale Winder adakulira ku Murrieta, Califórnia ku Estados Unidos da América. Iye adapfunzira chonadi na azibereki wake ndipo adabatiziwa pa 29 Março 1986. Mwezi wa patsogolo pake iye adayambiratu kutumikira ninge mpainiya wothandiza. Iye adakomedzewa maninge ndipo ambafuna kupitiriza. Kwa minyezi yazinji iye ankutumikira ninge mpainiya wothandiza, adayamba kutumira ninge mpainiya wokhazikika pa 1 Outubro 1986.

Pomwe wenze mulumbwana m’bale Winder adayenda kukazungira azibale wake awiri omwe ambatumikira pa Beteli. Ulendo moule udamuchitisa kuti ayambe kufunambo kukatumikira pa Beteli. Mu Maio 1990, iye adachemerewa kuti akatumikire ku Beteli ya ku Wallkill.

Pa Beteli, M’bale Winder adaphata basa zizinji maninge kuphatanidzapo basa yokhirina, yolima kudimba ya pa Ofesi ya Thambi. Mu gole ya 1997, iye adalowolana na nkazi wake Angela. Ndipo iwo ankutumikira pa Beteli mpakana manjeuno. Mu 2014, adatumiziwa ku Warwick komwe m’bale Winder adathandiza kumanga likulu ya padziko yose. Mu 2016, iwo adafuluka kuyenda ku likulu ya mapfunziro ya Torre de Vigia ku Patterson, komwe m’bale Winder adaphata basa mu Komiti ya ma Audiyo na ma Videyo. Magole yanayi patsogolo pake iwo adabwerera ku Warwick ndipo m’bale Winder adayikhiwa kumbaphata basa mu Ofesi ya Komiti yowona va Atumiki wa pa Beteli. Ndipo mu Março 2022, iye adayikhiwa nkukhala wothandizira Ofesi ya Komiti Yowona va Atumiki wa pa Bateli ya Bungwe Yotonga.

Isepano tinkupempherera kuti Yahova apitirize kudalisa ‘mphaso za amuna’ mwezi kuti iwo apitirize kuphata basa mwakhama pakuthandiza Ufumu wa Mulungu.—Aef. 4:8.