LO WEDNESDAY, January 18, 2023, wanfala spesol announcement hem appear lo jw.org, wea sei Brata Gage Fleegle and Jeffrey Winder kamap member lo Governing Body blo Olketa Jehovah’s Witness. Tufala brata hia faithful for servem Jehovah for longtaem finis.

Brata Fleegle hem growap lo Pennsylvania, U.S.A., and parents blo hem wea insaed truth teachim hem for lovem Jehovah. Taem hem teenager, famili blo hem muv lo wanfala smol taon wea needim moa pablisa. No longtaem bihaen, hem baptaes lo November 20, 1988.

Parents blo Brata Fleegle evritaem encouragem hem for duim full-taem service. Tufala savve invaetem olketa circuit overseer and olketa Bethelite lo haos blo olketa, and Brata Fleegle savve lukim hao olketa brata and sista hia hapi tumas. No longtaem bihaen hem baptaes, hem start regular pioneer lo September 1, 1989. Tufala year bihaen datwan, hem kasem wanfala goal wea hem markem taem hem 12 year, wea hem nao for waka lo Bethel. So lo October 1991, hem start waka lo Brooklyn Bethel.

Lo Bethel, Brata Fleegle waka lo Bindery for eit years, then hem kasem assignment for waka lo Service Department. Lo datfala taem, hem attendim wanfala Russian-languis kongregeson for tu-thri year. Lo 2006 hem maritim waef blo hem Nadia, and waef blo hem waka lo Bethel tu. Tufala serve tugeta witim Portuguese languis kongregeson and for winim ten years tufala serve witim Spanish languis kongregeson. Bihaen Brata Fleegle waka lo Service Department for staka year, hem kasem assignment for waka lo Teaching Komiti Office, then bihaen  datwan, hem waka lo Service Komiti Office. Lo March 2022, olketa appointim hem for kamap helper lo Service Komiti blo Governing Body.

Brata Winder hem growap lo Murrieta, California, U.S.A. Parents blo hem wea insaed truth teachim hem for lovem Jehovah, and hem baptaes lo March 29, 1986. Lo month bihaen hem baptaes, hem disaed for auxiliary pioneer. Hem barava enjoyim, so hem continue for auxiliary pioneer. Then afta hem auxiliary pioneer tu-thri month, hem kamap regular pioneer lo October 1, 1986.

Taem Brata Winder hem teenager, hem visitim tufala big brata blo hem wea waka lo Bethel lo datfala taem. Diswan mekem hem for laek apply for waka lo Bethel taem hem growap. So lo May 1990, hem kasem invitation for waka lo Wallkill Bethel.

Lo Bethel, Brata Winder hem waka lo olketa department olsem, Klining Department, Farm Department, and Bethel Office. Lo 1997, hem maritim waef blo hem, Angela, and tufala waka lo Bethel kam kasem distaem. Lo 2014, tufala transfer go lo Warwick and Brata Winder help lo construction blo world headquarter facility. Lo 2016 tufala muv lo Watchtower Educational Center lo Patterson, and Brata Winder waka lo Audio/Video Service. Fofala year bihaen, tufala muv bak lo Warwick, and Brata Winder kasem assignment for waka lo Personnel Komiti Office. Lo March 2022, hem kamap helper lo Personnel Komiti blo Governing Body.

Mifala prea for Jehovah blessim ‘olketa man hia wea olsem present’ for continue for duim best blo olketa for sapotim Kingdom waka.—Eph. 4:8.