NA KUARTA-FERA, 18 di Janeru di 2023, i sai un anunsiu spesial na jw.org, ku fala di kuma ermon Gage Fleegle ku Jeffrey Winder disignadu suma membrus di Korpu Guvernanti di Tustumuñas di Jeova. Elis dus e sirbi Jeova di manera fiel pa manga di anus.

Ermon Fleegle kirsi na oesti di Pennsylvania, Stadus Unidu di Amerika, si papes sedu Tustumuñas di Jeova. Oca ki seduba joven, si familia munda pa un zona isoladu nunde ki tenba mas nesesidadi. Puku tempu dipus, i batisa na dia 20 di Novembru di 1988.

Papes di ermon Fleegle ta nkoraẑalba sempri pa i yentra na sirvisu di tempu kompletu. Manga di bias, e risibi superintendentis di sirkuitu ku betelitas na se kau, i ermon Fleegle pudiba oja kuma ku es ermons ku irmas seduba filis. Puku tempu dipus ki batisa, i kumsa sirvisu di pioneru regular na dia 1 di Setembru di 1989. Dus anu dipus, i yangasa un objetivu ki teneba ocal ku 12 anu, ku sedu tarbaja na Betel. I kumsa ku tarbaja na Betel di Brooklyn na Otubru di 1991.

Na Betel, ermon Fleegle, tarbaja oitu anu na nkadernason i dipus i disignadu pa Dipartamentu di sirvisu. Na ki tempu, i sirbi na un kongregason di lingua Rusu, pa alguns anu. Na 2006 i kasa ku un irma comadu Nadia, dipus di kila i disignadu tambi pa tarbaja na Betel. Elis dus, e sirbi na kongregason di lingua Purtugis, i e fasi mas di des anu na kongregason di lingua Spañol. Dipus di tarbaja pa manga di anus na Dipartamentu di Sirvisu, ermon Fleegle disignadu pa tarbaja na Skritoriu di Kumison di Nsinu, i mas tardi, na Skritoriu di Kumison di Sirvisu. Na Marsu di 2022 i disignadu suma ajudanti di Kumison di Sirvisu di Korpu Guvernanti.

 Ermon Winder kirsi na sidadi di Murrieta, Kalifornia, Stadus Unidu di Amerika. I kriadu pa si papes ku sedu Tustumuñas di Jeova, i batisa na dia 29 di Marsu di 1986. Logu na mis di Abril, i toma sirvisu di pioneru ausiliar. I gosta ciu tok i misti kontinua. Dipus di sirbi suma pioneru ausiliar pa alguns misis, i kumsa sirvisu di pioneru regular na 1 di Otubru di 1986.

Ocalba joven, ermon Winder visita si dus ermon garandi ku na tarbajaba na Betel ki tempu. Ki visita aumenta si diseẑu di prenŝi pitison pa tarbaju di Betel oca ki ciga idadi. I na Maiu di 1990, i kumbidadu pa tarbaja na Betel di Wallkill.

Na Betel, ermon Winder tarbaja na diferentis dipartamentu, suma Dipartamentu di Limpesa, Dipartamentu ku ta Kria Limarias i ku ta Kuida di Labur, tambi i tarbaja na Skritoriu di Betel. I kasa ku un irma comadu Angela, na 1997, i apartir di ki anu, e sta na tarbaja na Betel. Na 2014 e disignadu pa Warwick, nunde ku ermon Winder fasi parti di grupu di voluntarius ku tarbaja na kumpu sedi mundial. Na 2016 e munda pa Sentru di Nsinu di Watchtower na Paterson, nunde ku ermon Winder tarbaja na Sirvisu di Audio/Video. Kuatru anus dipus, e riba mas pa Warwick, i ermon Winder disignadu pa tarbaja na Skritoriu di Kumison di Pesual. Na Marsu di 2022, i disignadu suma ajudanti di Kumison di Pesual di Korpu Guvernanti.

No na ora Jeova pa i bensua ciu es “dons pa omis” nkuantu e na tarbaja ciu pa interesi di Renu. — Ef 4:8.