IA RUITORU, Tianuare 18, 2023, kua orongaia mai tetai akakiteanga i runga i te jw.org e kua ikiia te nga Taeake ko Gage Fleegle e Jeffrey Winder ei nga mema ou no te Pupu Akaaere o te Au Kite o Iehova. Kua tavini tiratiratu te nga taeake ia Iehova no tetai tuatau roa.

Kua utuutuia te Taeake Fleegle e tona nga metua i roto i te tuatua mou i Pennsylvania, Marike. Tona mapuanga, kua neke tona ngutuare i te tauturu i tetai putuputuanga i tetai oire mamao. Kare i roa i muri mai, kua papetitoia aia ia Noema 20, 1988.

E akamaroiroi ua ana te nga metua o te Taeake Fleegle iaia kia rave i te angaanga tavini tamou. E pati ua ana raua i te au akaaere kotinga e te au taeake i Betela ki to ratou kainga, e kua kite te Taeake Fleegle i to ratou mataora. Kare i roa i muri mai i tona papetitoanga, kua painia tamou aia ia Tepetema 1, 1989. E rua mataiti i muri mai, kua akatupu aia i tana i akakoro mei tona 12 mataiti—koia oki te tavini i Betela. Kua akamata aia i tana angaanga i Betela, Brooklyn ia Okotopa 1991.

I Betela, kua angaanga te Taeake Fleegle e varu mataiti i te ngai vai anga puka, e i muri mai ki te Tipatimani Tavini Anga. I te reira taime, te tavini ra aia i roto i te putuputuanga reo Rutia no tetai nga mataiti. I te 2006, kua akaipoipo aia i tana vaine ko Nadia, e kua tavini kapiti raua i Betela. Kua tavini raua i roto i te reo Portuguese e no tetai tai ngauru mataiti i roto i te reo Paniora. I muri mai i tetai au mataiti i roto i te Tipatimani Tavini Anga, kua neke te Taeake Fleegle ki te Opati o te Kumiti Apiianga e aru mai ki te Opati o te Kumiti Tavini Anga. Ia Mati 2022 kua ikiia aia ei tauturu ki te Kumiti Tavini Anga o te Pupu Akaaere.

 Kua utuutuia te Taeake Winder i roto i te tuatua mou e tona nga metua i Murrieta, California, Marike. Kua papetitoia aia ia Mati 29, 1986. I tera mai marama, kua iki aia i te painia tauturu. Mataora aia i te rave i te reira e kua painia ua atu. I nga marama i muri mai, kua painia tamou aia ia Okotopa 1, 1986.

Tona mapuanga, kua atoro te Taeake Winder i tona nga tuakana e tavini ra i Betela. Kua akakeu te reira atoro anga iaia kia tavini i Betela me maata mai aia. E ia Me 1990, kua patiia aia kia tavini i Betela, i Wallkill.

I Betela, kua angaanga te Taeake Winder ki roto i te au tipatimani tukeke, kapiti mai te Tipatimani Tamā Anga, te Tipatimani Angai Manu e te Tanutanu, e pera katoa i ko i te Opati Betela. I te 1997, kua akaipoipo aia i tana vaine ko Angela e kua tavini kapiti raua i Betela e nei. I te 2014, kua neke atu raua ki Warwick, e kua tauturu te Taeake Winder i te angaanga pātu i te opati maata. I te 2016 kua neke atu raua ki te Watchtower Educational Center i Patterson e kua angaanga te Taeake Winder ki te ngai Audio/Video Services. E ā mataiti i muri mai, kua neke akaou raua ki Warwick, e kua angaanga te Taeake Winder ki roto i te Opati o te Kumiti Tauturu. Ia Mati 2022, kua ikiia aia ei tauturu ki te Kumiti Tauturu o te Pupu Akaaere.

Te pure nei tatou e kia akameitaki ua rai a Iehova i teia nga taeake meitaki ia raua e angaanga maroiroi ra no te Patireia.—Ephe. 4:8.