СРЕДА, ко 18 јануари 2023 берш, ки амари интернет страна jw.org сине објавимо јекх посебно известување коте со пишинела сине кај о пхрал о Гејџ Флигл хем о пхрал Џефри Виндер тане именујме те служинен сар членија ко Водечко тело е Јеховаскере сведоконгоро. О солдуј џене бут време служинена е Јеховаске.

О пхрал о Флигл барило ки западно Пенсилванија (САД), ки фамилија сој е Јеховаскере сведокија. Кеда сине тинејџери, лескири фамилија селинѓа пе ки јекх тикни диз коте со сине побари потреба таро објавителија. Кратко пало адава, ко 20 ноември 1988 берш, ов крстинѓа пе.

Лескере родителија секогаш поттикнинела ле сине те почминел е полновремено службаја. Ола бут пути викинена сине ко гости покраинска надгледникон хем бетелитен хем адалеске о пхрал Флигл шај сине те дикхел кај акала пхраља хем пхења тане бут среќна. Кратко откеда крстинѓа пе, ко 1 септември 1989 берш, почминѓа е општо пионерско службаја. Дуј берш пало адава, ов исполнинѓа пли цел со чхивѓа песке кеда сине ле 12 берш — те служинел ко Бетел. Ко октомври 1991 берш, ов почминѓа те служинел ко Бетел ко Бруклин.

О пхрал Флигл офто берш керѓа бути ко Бетел коте со составинена пе сине о лила, а пало адава добинѓа задача те служинел ко Одделение баши служба. Ко адава периоди, некобор берша служинѓа ко собрание ки руско чхиб. Ко 2006 берш, о пхрал Флигл женинѓа пе е Надјаја. Откеда леле пе, ој да почминѓа те служинел ко Бетел. Ола служинѓе ко собрание ки португалско чхиб, а повише таро деш берш служинѓе ко собрание ки шпанско чхиб. Откеда бут берша служинѓа ко Одделение баши служба, о пхрал Флигл добинѓа задача те служинел ки Канцеларија таро Одбор сикајбаске, а покасно ки Канцеларија ко Одбор баши служба. Ко  март 2022 берш, ов сине именујмо те служинел сар помошнико ко Одбор баши служба ко Водечко тело.

О пхрал Виндер барило ки Муриета (Калифорнија, САД). Лескере родителија сикавѓе ле башо чачипе панда таро тикнипе. Ов крстинѓа пе ко 29 март 1986 берш. Одма о следно масек одлучинѓа те служинел сар помошно пионери. Ов добором бут уживинела сине ки служба со на мангела сине те чхинавел. Откеда некобор масек служинѓа сар помошно пионери, ко 1 октомври 1986 берш, почминѓа е општо пионерско службаја.

Кеда сине тинејџери, о пхрал Виндер гело ко Бетел те посетинел пе дује побаре пхрален. Адаја посета, ки лесте бајрарѓа и желба покасно ов да те дел молба баши бетелско служба. Хем аѓаар, ко мај 1990 берш, сине викимо те служинел ко Бетел ко Волкил.

О пхрал Виндер керѓа бути ко различна одделенија ко Бетел — ко Одделение башо чистибе, ко Одделение башо фарме хем ки Бетелско канцеларија. Ко 1997 берш, ов женинѓа пе јекхе пхењаја со викинела пе Анџела, хем оттегани ола заедно служинена ко Бетел. Ко 2014 берш, ола селинѓе пе ко Ворвик, коте со о пхрал Виндер поможинѓа ко градибе објектија башо главно седиште. Ко 2016 берш, селинѓе пе ко Образовно центар Патерсон, коте со о пхрал Виндер служинѓа ко Одделение баши аудио хем видео продукција. Штар берш пало адава, иранѓе пе ко Ворвик коте со о пхрал Виндер добинѓа задача те служинел ки Канцеларија ко Одбор башо персонал. Ко март 2022 берш, ов сине именујмо те служинел сар помошнико ко Одбор башо персонал ко Водечко тело.

Молинаја амен о Јехова бут те благословинел акале пхрален колен со денѓа лен аменге сар поклонија, џикоте понадари да дена пестар са те керен бути башо Царство (Еф. 4:8).