MMENAA, January 18, 2023 ne, bɛfale ngaebɔ titire bie bɛtole dwaa wɔ jw.org so. Yeɛ ole kyɛ bafa Aliemaa Gage Fleegle ne Jeffrey Winder baaboka Yehowa Adanzefoɛ Akwangyerɛ Kue naso. Sɔ aliemaa nyɔ hemɔ, benu biala afa afoɛ pẽe asõ Yehowa nahorɛ nu.

Bɛtetele Aliemaa Fleegle wɔ western Pennsylvania bɔ ɔwɔ U.S.A. ne, na né ye awofoɛ suro Yehowa. Mmerɛ bɔ né ɔte abrandeɛ ne, ɔne ye awofoɛ tu hɔle kuro kãamba bie nu bɛɛyɛle asɛnga adwuma ne wɔ dɔ, ofikyɛ né behia adawurubɔfoɛ pẽe maa bɛkã nzɛmba ne wɔ berɛ. Ɛhẽne sĩ ne, ɔbɔle asu November 20, 1988 nu.

Daa né Aliemaa Fleegle awofoɛ hyɛ ye ngunaen kyɛ, ɔfa mmerɛ mukoraati sõen adwuma ne sie yenye so. Né bɛtaa bɛto asaa bɛfrɛ manzin soneafoɛ, ɔne aliemaamɔ bɔ bɛyɛ adwuma wɔ Bɛtɛl ne maa bɛba b’awuro. Mmerɛ biala bɔ sɔ aliemaa hemɔ kɔwa awuro berɛ ne, né Aliemaa Fleegle kora nwu kyɛ bɛnye gye paa. Yeti mmerɛ bɔ ɔbɔle asu ne, wangyɛ koraa yeɛ ɔɔyɛle atẽepakyelɛniɛ wɔ September 1, 1989 nu ɔ. Mmerɛ bɔ olili afoɛ 12 ne, ɔfa siele yenye so kyɛ ɔkɔyɛ adwuma wɔ Bɛtɛl. Yeti ɔyɛle atẽepakyelɛ adwuma ne afoɛ nyɔ, na ɛhẽne sĩ ne onyane yenwo atẽe ɔɔyɛle adwuma wɔ Bɛtɛl. Ɔhyɛle yebo yɛle adwuma wɔ Brooklyn Bɛtɛl wɔ October 1991 nu.

Mmerɛ bɔ Aliemaa Fleegle dwuli Bɛtɛl ne, belimoa bɛfale ye bɛhɔle nekaa bɔ bɛfa ngaen bɛyɛ nwomaa nwo adwuma, maa ɔɔyɛle adwuma wɔ berɛ afoɛ mmɔtwɛ. Ɛhẽne sĩ ne, bɛmaa ɔɔyɛle adwuma wɔ Sõen Adwumayɛbea. Asafo bɔ né ɔwɔ nu ne, Russiafoɛ dwudwolɛ yeɛ né bɛfa bɛyɛ adesũa ɔ. Wɔ 2006 nu ne, ogyale ɔye Nadia, na ye koso ɔɔbokale ye so wɔ Bɛtɛl berɛ. Ɔne ɔye bokale asafo bie bɔ bɛkã Portugese dwudwolɛ ɔ. Afei bɛfale kɔbo afoɛ buru koso bɛbokale asafo bie bɔ bɛkã Spanish dwudwolɛ ɔ. Aliemaa Fleegle yɛle adwuma wɔ Sõen Adwumayɛbea afoɛ pẽe ne, bɛhãne kyɛ ɔtoa ye adwuma so wɔ Ngyerɛkyerɛ Kɔmatee Ɔffiss, na ɛhẽne sĩ ne, bɛmaa ɔɔyɛle adwuma wɔ Sõen Kɔmatee Ɔffiss. Wɔ  March 2022 nu ne, bɛyele ye kyɛ ɔɔboka Sõen Kɔmatee bɔ bewura Akwangyerɛ Kue nabo ne.

Aliemaa Winder koso, bɛtetele ye wɔ Murrieta, California, bɔ ɔwɔ U.S.A. ne. Ye awofoɛ te Yehowa Adanzefoɛ, yeti bɛtetele ye wɔ nahorɛ nanu, na ɔbɔle asu March 29, 1986 nu. Ɔbɔle asu bosome kõ sĩ ne, ɔɔyɛle atẽepakyelɛ bokafoɛ. Asɛnga adwuma ne yɛle ye fɛ paa, yeti ɔyɛle ye adwene kyɛ ɔkɔtoa so kɔyɛ atẽepakyelɛ bokafoɛ adwuma ne. Ɔfale bosome pẽe yeɛ ɔyɛle sɔ ɔ, na ɛhẽne sĩ ne, ɔɔyɛle atẽepakyelɛniɛ wɔ October 1, 1986 nu.

Mmerɛ bɔ né Aliemaa Winder te abrandeɛ ne, né oliema mbanyi nyɔ yɛ adwuma wɔ Bɛtɛl, yeti ɔhɔle berɛ ɔɔneane bɛ boso. Nningyein bɔ onwuni ye wɔ berɛ ne, ɔhyɛle ye ngunaen maa ye koso ɔfa siele yenye so kyɛ ɔkɔɔyɛ adwuma wɔ Bɛtɛl kyẽabie. Yeti wɔ May 1990 nu ne, bɛtole asaa bɛfrɛle ye kyɛ ɔɔyɛ adwuma wɔ Wallkill Bɛtɛl.

Mmerɛ bɔ Aliemaa Winder oodwuli Bɛtɛl ne, bɛmaa ɔyɛle adwuma wɔ nekaa ahoroɛ pẽe. Ebie yeɛ ole Ɔfiss Bɔ Besiesie Bɛtɛl Berɛ, Ɔfiss Bɔ Bɛnea Bɛtɛl Boo So, ɔne Bɛtɛl Ɔfiss. Ɛhẽne sĩ ne, ogyale ɔye Angela wɔ 1997 nu, na ɔne ye abɔ nu ayɛ adwuma wɔ Bɛtɛl waadwu ɛnnɛ. Wɔ 2014 nu ne, bɛfale Aliemaa Winder ne ɔye bɛhɔle Warwick kyɛ bɛɛboka ma besi sua bɔ kesaalae ɔte ewiase mukoraati adwumayɛbea ti ne. Afei, wɔ 2016 nu ne, bɛfale bɛ hɔle Watchtower Educational Center bɔ ɔwɔ Patterson ne, na Aliemaa Winder ɔɔyɛle adwuma wɔ Audio/Video Services. Ɛhẽne sĩ afoɛ nna ne, bɛmaa besa bɛwale Warwick, na bɛhãne kyɛ Aliemaa Winder ɔɔyɛ adwuma wɔ Kɔmatee Bɔ Bɛnea Adwumayɛfoɛ So Ne Ɔffiss. Wɔ March 2022 nu ne, bɛyele ye kyɛ ɔɔyɛ adwuma boka Kɔmatee Bɔ Bɛnea Adwumayɛfoɛ So bɔ owura Akwangyerɛ Kue nabo ne.

Sɔ aliemaa nyɔ hemɔ te ‘mmenia nu akyɛdeɛ.’ Yeti yɛbɔ mbaeɛ kyɛ, adwuma serɛ bɔ bɛyɛ bɛfa bɛta ahennie ne sĩ ne, Yehowa yira so.—Ɛfe. 4:8.