LWA KASHARHU, nsiku 18/1/2023, itangazo lyago-lyago lyabonekana oku jw.org, lyal’iyerekine oku Mwene Wirhu Gage Fleegle na Jeffrey Winder bahizirweho nka baguma b’omu Baraza Eri Yalongoza y’Abahamirizi ba Yehova. Abo bene wirhu bombi bakola bagwerhe myaka minji bali bakolera Yehova n’obwishwekerezi.

Mwene wirhu Fleegle akuliraga omu eneo y’ebuzikiro bw’izuba y’e Pennsylvanie, omu États-Unis, aleragwa n’ababusi bage bal’iyobohire Nnâmahanga. Erhi ali mwana wa mushuko, ababusi bage bahamirha omu vile nsungunu yalimwo obulagirire bunji bw’abahubiri, yali kuli bwenene n’e vile nnene. Kasanzi kasungunu enyuma z’aho, abatizibwa omu nsiku 20/11/1988.

Ababusi ba Mwene Wirhu Fleegle ensiku zoshi bakag’imuha omurhima aje omu mukolo gw’akasanzi koshi. Kanji-kanji bakag’iyegereza abangalizi b’omuzunguko na Babetelite aha mwabo balameho kasanzi kalebe, na Mwene Wirhu Fleegle akabwine kunganaci abo bene wirhu na bali birhu bal’igwerhe omwishingo. Kasanzi kasungu enyuma z’okubatizibwa, arhondera obupainiya bw’akasanzi koshi omu lusiku 1/9/1989. Myaka ibirhi enyuma z’aho, ahikiriza omuhigo gwage gw’okukolera oku Beteli acihiriragaho erhi agwerhe myaka 12. Arhonderera okukolera oku Beteli y’e Brooklyn omu Mwezi gwa 10, 1991.

Oku Beteli, Mwene Wirhu Fleegle ajijire myaka munani ali akola oku mukolo gw’okuhira ebijalada oku bitabu, buzinda arhumwa omu Departema y’Omukolo. Mw’ago mango ajira myaka milebe ali akolera omu cigamba c’olulimi lw’Ecirusi. Omu 2006 arhôla mukage Nadia, na Nadia acilunga haguma naye omu mukolo gw’Ebeteli. Haguma, bakolera omu cigamba c’e Ciportigé n’omu myaka elushire ikumi bakolire omu cigamba c’Eciespanyole. Enyuma za myaka minji omu Departema y’Omukolo, Mwene Wirhu Fleegle arhumwa omu biro by’Ekomite y’Okuyigiriza n’enyuma  zaho, arhumwa omu Biro by’Ekomite y’Omukolo. Omu Mwezi gwa 3, 2022, ajirwa murhabazi w’Ekomite y’Omukolo y’Embaraza Eri Yalongoza.

Mwene Wirhu Winder akuliraga e Murrieta omu Californie e États-Unis. Aleragwa omu okuli n’ababusi bage anabatizibwa omu nsiku 29/3/1986. Omu mwezi gwa kulikiraga, ahiga okuba painiya murhabazi. Ashagalukira ogo mukolo bwenene analonza okugendekera. Enyuma z’okujira myezi milebe ali painiya murhabazi, aba painiya w’akasanzi koshi omu lusiku 1/10/1986.

Erhi Mwene Wirhu Winder aciri mwana w’omushuko, alambagirira bakulu bage babirhi bakag’ikola oku Beteli ago mango. Oko kulambagirira bakulu bage oku Beteli kwamuha irala ly’okuyunjuza efomu y’okukolera oku Beteli erhi aba akola ali mukulu. N’omu Mwezi 5, 1990, ahamagalwa okukolera oku Beteli e Wallkill.

Oku Beteli, Mwene Wirhu Winder akolire omu departema ziri lubero, zihiziremwo Edepartema y’eby’Obusafi, Edepartema y’eby’Obuhinzi n’Obushwesi n’omu Biro by’e Beteli. Omu mwaka gwa 1997, arhôla mukage Angela, banali bakolera oku Beteli kurhenga ago mango. Omu mwaka gwa 2014, bahamira e Warwick, emunda Mwene Wirhu Winder arhabalaga oku mukolo gw’obubasi bw’enyumpa z’ebiro bikulu. Omu mwaka gwa 2016, bahamira Ahantu Hakulu h’Okuyigirigiza h’Abahamirizi ba Yehova omu Patterson, eyo munda Mwene Wirhu Winder akolera omu Departema ye by’e Audio Video. N’enyuma za myaka ini, bacib’ihamira e Warwick, na Mwene Wirhu Winder arhondera okukolera omu biro by’Ekomite y’Abanyakazi. Omu Mwezi gwa 3, 2022 ahirwaho nka Murhabazi w’Ekomite y’Abanyakazi y’Embaraza Eri Yalongoza.

Rhuli rhwashenga Yehova agendekere agisha bwenene abo ‘balume arhuhire nka nshokano’ amango bagendekire bakola bwenene lyo bagendekeza obunguke bw’Obwami.—Ef. 4:8.