TAMY Larobia 18 Zanviè 2023 iny, le nisy fampandrenesa manoka tamy jw.org ao. Voaresaky tao fa voatendry ho anisan’ny Filan-kevi-pitantanan’ny Vavolombelon’i Jehovah Rahalahy Gage Fleegle noho Jeffrey Winder. Fa nanompo an’i Jehovah tanatin’ny fotoa ela rozy mirahalahy reo sady tsy nivaliky mihintsy.

Nibe tamy faritsy andrefan’ny Pennsylvania, a Etazinỳ any Rahalahy Fleegle. Nitezàn’ny ray aman-dreniny tamy fahamarina ie. Mbo nipamaraky ie, le fa nandesin-drozy nifindra tamy tanà kelikely ambanivohitsy zay mba hanitatsy faritany. Tsy ela tafarani-zay, le natao batisa ie tamy 20 Novambra 1988.

Tozoro nampirisiky an’ny Rahalahy Fleegle hanao fanompoa manontolo andro avao ty ray aman-dreniny. Matetiky rozy nampiantrano mpiandraikitsin’ny faritsy noho Betelita, ka lasa nihitan’i Rahalahy Fleegle hoe tena falifaly rahalahy noho anabavy rey. Vo 12 tao ie le fa naniry hiasa amy Betela ao. Tsy ela tafaran’ny batisany, zany hoe tamy 1 Septambra 1989, le nanomboky nanao mpisava lala maharitsy ie. Roe tao tafarani-zay, le nitratsiny raha kendreny iny ka lasa nanompo amy Betela ao ie. Nanomboky niasa tamy Betelan’ny Brooklyn ie tamy Oktobra 1991.

Niasa tamy famitipitiha boky tamy Betela ao Rahalahy Fleegle tanatin’ny 8 tao. Tafarani-zay ie nivoatendry ho amy Sampan-draharahan’ny Fanompoa. Tanatin’ny fotoa zay ie le nanompo tamy fiangona manao fivolana russe, tanatin’ny tao vitsivitsy. Tamy 2006 ie nanambaly an’i Nadia. Niaraky nanompo aminy tamy Betela ao koa valiny io. Niaraky nanompo tamy fiangona manao fivolana portigè tse rozy, bakeo nafindra tamy fiangona manao fivolana espagnioly, le tany avao rozy tanatin’ny 10 tao mahery. Lafa nanompo tanatin’ny tao maro tamy Sampan-draharahan’ny Fanompoa Rahalahy Fleegle, le nivoatendry hiasa amy Biron’ny Komitin’ny  Fampianara ao koa, le tafarani-zay ie tamy Biron’ny Komitin’ny Fanompoa. Tamy Marsa 2022 ie nivoatendry ho Mpanampy ty Komitin’ny Fanompoa amy Filan-kevi-pitantana ao.

Nibe ta Murrieta, a Kalifornỳ a Etazinỳ any Rahalahy Winder. Nitezàn’ny ray aman-dreniny tamy fahamarina ie, le natao batisa tamy 29 Marsa 1986. Vola raiky tafarani-zay, le nanapa-kevitsy hanao mpisava lala mpanampy ie. Tena niteany ty nanao an’ny raha io ka mbo ta ho nanohy avao ie. Farany ie nanao mpisava lala mpanampy mitohitohy tanatin’ny vola vitsivitsy, le tamy 1 Oktobra 1986 ie nanomboky nanao mpisava lala maharitsy.

Namangy an’ny zokiny roe lahy niasa tamy Betela ao rezay Rahalahy Winder tamy ie mbo nipamaraky. Lasa ta hanompo amy Betela ao koa ie. Le nasà hanompo amy Betelan’i Wallkill any amy zay ie tamy Mey 1990.

Niasa tamy Sampan-draharaha sankarazany tamy Betela ao Rahalahy Winder, anatini-zay ty Sampan-draharahan’ny Fanadiova, Sampan-draharahan’ny Fambolea, noho Biron’ny Betela. Nanambaly an’i Angela ie tamy 1997, le niaraky nanompo tamy Betela ao avao rozy liany tamy zay. Nafindra ta Warwick any rozy tamy 2014, le nanampy tamy fanorena an’ny foiben’ny Vavolombelon’i Jehovah io ie. Tamy 2016 rozy nafindra tamy Foibem-pampianaran’ny Tilikambo Fiambena ta Patterson any, le niasa tamy Sampan’asa mikasiky Feo noho Video Rahalahy Winder. Efatsy tao tafarani-zay, le nafindra ta Warwick any ndraiky rozy ka nivoatendry hiasa amy Biron’ny Komitin’ny Mpiasa ao Rahalahy Winder. Tamy Marsa 2022, le nivoatendry ho Mpanampy ty Komitin’ny Mpiasa amy Filan-kevi-pitantana ao ie.

Mivavaky tsika mba tena hotahin’i Jehovah ‘lahilahy natao fanomeza’ reo, satria miasa mafy rozy mba hampandrosoa ty asan’ny Fanjakà iny.​—Efes. 4:8.