LOFU l’asato, Ngɔndɔ kɛ ntondo 18, 2023, ndjewo kɛmɔtshi kɛ wɔlɔ efula keposaka lá jw.org, ketepelaka ente Wɔnanyɔ Gage Fleegle nya Jeffrey Winder wambɔsɔnama djɛ nkamba etengo ase Iloyi yɛ lɔndjɛ yɛ Ewakɛ wɛ Yehova. Wananyɔ ape wasɔ wambokambela Yehova la nkɔmano ilá efula.

Wɔnanyɔ Fleegle afulaka lá owɛstɛ wɔ Pennsylvanie, lá États-Unis, me ambotshi w’okaki Ndjambe wɔma efula. Winá wɔ ndakome olangala, nkfumbo kɛwɔ kɛsɛkɔka tá ingangando imɔtshi iyalaki lá djonyi efula dj’ansakodji. Ndambo daambi m’ɔkɔngɔ, nde alongolaka batisimo Ngɔndɔ kɛ djomi l’ɔmɔ 20, 1988.

Ambotshi wa wɔnanyɔ Fleegle w’okembɛki mbala la mbala djɛ nde ndɔsa olemo wɔ winá enkfumɔ. Mbala efula, walongolaki elami wɛ djingadjinga la ase nkfumbo kɛ Betɛlɛ lá kawɔ, ko wɔnanyɔ Fleegle akokaki nyɛna wopo wɔ wananyɔ l’ankaana yɛsɔ yayalaka l’osasa. Ataheta ilá m’ɔkɔngɔ wɔ batisimo djɛnde, nde awangaka olemo wɔ yat’ekalo yɛ lotshinda Ngɔndɔ kɛ djuwa 1, 1989. M’ɔkɔngɔ wɔ ɛnɔnyi epe, nde akotshɛka okoma ɔmɔtshi wɔ ndoyawilela winá wɔ ndayalaka l’ɛnɔnyi 12, okoma wɔkɔ nde nkamba lá Betɛlɛ. Atateyɛka nkamba olemo wɔsɔ lá Betɛlɛ djɛ Brooklyn lá Ngɔndɔ kɛ djomi, 1991.

Lá Betɛlɛ, wɔnanyɔ Fleegle akambaka ɛnɔnyi enanɛyi lá Departɛma dj’Oposɛwɔ Enkanda, ko makɔ w’otomaka tá Departɛma dj’Olemo. Lá winá wɛkɔ wɛsɔ, nde ananghaka ɛnɔnyi emangha l’otshumano w’otepela wɔ Russe. Lá 2006 atshukaka wadjɛnde, Nadia, ko nde okilikaka l’olemo wɔ Betɛlɛ. Wakambaka iyape kɛkɔ esanga l’ilá k’ɛnɔnyi ndekana djomi l’etatshi kɛ looko k’otepela wɔ Portugais la k’otepela wɔ Espagnol. M’ɔkɔngɔ wɔ nangha ɛnɔnyi efula lá Departɛma dj’Olemo, wasɔnaka wɔnanyɔ Fleegle djɛ ntokamba lá Kɔmite k’Olakanyelo edjinge m’ɔkɔngɔ wɔ lasɔ, lá Kɔmite k’Olemo. Lá Ngɔndɔ k’asato 2022, asɔnamaka  etengo wɔnanyɔ w’okotshɛ́ lá Kɔmite k’Olemo kɛ Iloyi yɛ lɔndjɛ.

Wɔnanyɔ Winder afulaka lá Murrieta, lá Californie, lá États-Unis. Nde afulaka lá nsɔsɔlɔ me ambotshi wande, la alongolaka batisimo Ngɔndɔ k’asato 29, 1986. Ngɔndɔ kɛ lɔndisá, nde ɔsaka nkano djɛ nkamba etengo yat’ekalo y’itenyi. Asasangaka l’olemo wɔsɔ efula ko akombolaka nkindjɛ nkamba. M’ɔkɔngɔ wɔ nde nkamba etengo yat’ekalo y’itenyi l’ilá k’angɔndɔ efula, awangaka nkamba etengo yat’ekalo yɛ lotshinda lá Ngɔndɔ kɛ djomi 1, 1986.

Winá wɔ ndayalaka olangala, wɔnanyɔ Winder atshɔka ntowembola mama yɛnde ipe y’ampame ikambaki lá Betɛlɛ. Mbembo kɛsɔ kefudjɛka mposɛ kɛnde kɛ ndokamba lá Betɛlɛ winá wɔ ndongofula. Ko Ngɔndɔ k’atano 1990, w’owetaka djɛ ndokamba lá Betɛlɛ djɛ Wallkill.

Lá Betɛlɛ, wɔnanyɔ Winder akambaka l’adepartɛma itshikitanyi, akambaka edjinge lá Departɛma dj’Osolawɔ Ntshendja, Departɛma dj’Olendawɔ Wayi w’Oleelo, la lá Biro djɛ Betɛlɛ. Atshukaka wadjɛnde, Angela, lá 1997, edjinge wakamba esanga lá Betɛlɛ tii lɔɔko. Lá 2014 waatomaka tá Warwick, lá wɔnanyɔ Winder ndotokotshɛ́ l’opikelo w’amvulu yɛ biro dj’ekekete. Lá 2016, wasɛkɔka tá Patterson, l’idjena y’onanghawɔ Ankalasa y’Onkfumi, lá wɔnanyɔ Winder ndotokamba lá Departɛma dj’Audio/Video. Wakalɔka lá Warwick m’ɔkɔngɔ w’ɛnɔnyi ɛnɛyi, ko walɔmbaka wɔnanyɔ Winder djɛ nkamba lá Kɔmite Kelenda Enkambi. Lá Ngɔndɔ k’asato 2022, asɔnamaka etengo wɔnanyɔ w’okotshɛ́ lá Kɔmite Kelenda Enkambi kɛ Iloyi yɛ lɔndjɛ.

Tɔlɔmba djɛ Yehova nsakola ‘ampame ilekɔ etengo epapayɛ’ yɛsɔ lombombe winá w’okindjɛwɔ nkamba la wolo lá wapɔ w’Onkfumi.—Ɛfɛ. 4:8.