Tu njunjun baaa u di Tii Kulupu
A PIKISABA 18 u jailiba u di jaa 2023, de bi buta wan apaiti bosikopu a jw.org. De bi taki taa Baaa Gage Fleegle ku Baaa Jeffrey Winder feni di gaandi u dë a di Tii Kulupu u dee Jehovah Kotoigi. Dee tu baaa aki ta dini Jehovah ku hii de hati sömëni jaa.
Gage Fleegle ku hën mujëë Nadia
Dee gaansëmbë u Baaa Fleegle dë a di tuutuu lei, nöö de kiijëën na Amëëkanköndë a wan pisiwata de ta kai Pennsylvania. Di a bi dë wan njönku kijoo, hën de foloisi go a wan piki foto ka möön hia peleikima bi dë fanöudu. Kölö sö baka di de foloisi, hën a dopu. A dopu a 20 u ëlufumu-liba u di jaa1988.
Hii juu dee gaansëmbë u Baaa Fleegle bi ta dëën taanga faa du di hii-ten diniwooko. De bi lo’ u hoi dee keling-gaanwomi, ku dee baaa ku dee sisa dee bi ta wooko a Bëtëli a de pisi, nöö Baaa Fleegle bi ta si unfa de bi ta dë waiwai tjika. Kölö sö baka di a dopu, hën a bigi du di pioniliwooko a 1 u wajamaka-liba u di jaa 1989. Tu jaa baka di dë, hën a dou wan maaka di a bi buta sensi di a bi abi 12 jaa. A bi buta taa a kë go wooko a Bëtëli. A bi bigi wooko a di Bëtëli u Brooklyn a tinimu-liba u di jaa 1991.
Di Baaa Fleegle bi dë a Bëtëli, a bi wooko söwan aiti jaa ka de bi ta doloki buku. Baka di dë, hën de bi butëën a di Diniwooko Komite. A dee pisiten dë, a bi dë a wan kemeente ka de bi ta fan Losiatöngö. A bi dë wantu jaa a di kemeente dë. A di jaa 2006 hën a tööu ku Nadia, hën Nadia seei go a Bëtëli tu. De bi peleiki da dee sëmbë dee ta fan Potogisitöngö, söseei möön leki teni jaa longi de bi peleiki da dee sëmbë dee ta fan Sipanjölutöngö. Baaa Fleegle bi dë sömëni jaa longi a di Diniwooko Komite. Ma baka di dë, hën de bi butëën faa wooko a di kantoo u di Lei Komite. Bakaten hën de butëën a di kantoo u di Diniwooko Komite. A gaanliba u di jaa 2022, hën de butëën kuma wan heepima u di Diniwooko Komite u di Tii Kulupu.
Jeffrey Winder ku hën mujëë Angela
De kiija Baaa Winder na Amëëkanköndë, a wan foto u California de kai Murrieta. Dee gaansëmbë fëën de heepi ën faa ko sabi soni u di tuutuu lei. A dopu a 29 u gaanliba u di jaa 1986. Di liba baka di dë, hën a bi bigi du di heepi pioniliwooko. A bi lobi ën sö tee taa an bi kë disa, fëën mbei a bi du ën go dou. Baka wantu liba, hën a bigi du di kowoonu-pioniliwooko a 1 u tinimu-liba u di jaa 1986.
Di Baaa Winder bi dë wan njönku kijoo, hën a bi go luku dee tu baaa fëën dee bi ta wooko a Bëtëli a di ten dë. Di soni dë bi mbei a bi kë buta hën në u go wooko a Bëtëli te a ko möön bigi. Nöö de bi kai ën a sebitaa-liba u di jaa 1990 faa go wooko a di Bëtëli u Wallkill.
Baaa Winder wooko a tookatooka kamian a Bëtëli. A bi wooko a di pisi ka de ta seeka kamian, ka de ta kiija mbeti ta paandi soni, söseei a woto kantoo u Bëtëli. A tööu ku Angela a di jaa 1997, nöö de ta wooko makandi a Bëtëli sensi di ten dë. A di jaa 2014, hën de go a Warwick, ka Baaa Winder bi ta wooko u heepi mbei di hedikantoo fuu. A di jaa 2016, hën de foloisi go a Watchtower Educational Center di dë a Patterson, nöö naandë Baaa Winder bi ta wooko ta seeka fëlön ku poku soni. Baka fö jaa, hën de bi toona go a Warwick, nöö de bi butëën faa wooko a di kantoo u di Wookoma Komite. A gaanliba u di jaa 2022, de bi butëën heepima u di Wookoma Komite u di Tii Kulupu.
U ta begi Jehovah be a mbei dee womi aki feni gaan bunu, u di de ta mbei möiti u wooko taanga da di Könuköndë.—Ef. 4:8.
