TAPU dridewroko 18 yanuari 2023, wi kisi wan spesrutu boskopu tapu jw.org, taki now Brada Gage Fleegle nanga brada Jeffrey Winder de tu na ini a Tiri Skin fu Yehovah Kotoigi. Ala tu brada e dini Yehovah na wan getrow fasi wan langa pisi ten kba.

Brada Fleegle gro kon na westsei fu Pennsylvania, na Amerkankondre. A p’pa nanga a m’ma fu en di lobi Gado trutru ben kweki en na ini a waarheid. Di a ben de wan yongu boi, en famiri froisi go na wan pkin foto pe moro preikiman ben de fanowdu. Syatu baka dati a dopu tapu 20 november 1988.

A p’pa nanga a m’ma fu Brada Fleegle ben gwenti fu gi en dek’ati fu go na ini a furuten diniwroko. Den ben gwenti kari kring-owruman nanga Betel wrokoman kon na den oso, èn Brada Fleegle ben si taki den brada nanga sisa disi ben de koloku srefsrefi. Syatu baka di a dopu, a bigin pionier tapu 1 september 1989. Tu yari baka dati, a doro wan marki di a ben poti gi ensrefi di a ben abi 12 yari. Dati ben de fu dini na Betel. A bigin wroko na Brooklyn Betel na ini oktober 1991.

Na Betel, Brada Fleegle wroko aiti yari na ini a presi pe den ben e nai den bladzijde fu den buku kon na wán. Baka dati, a go wroko na a Dienstafdeling. Na a pisi ten dati, a dini wan tu yari na ini wan Rosiatongo gemeente. Na ini 2006 a trow nanga en frow Nadia di kon wroko tu na Betel. Den ala tu ben e dini na ini wan Potogisitongo gemeente, èn moro leki tin yari den dini na ini wan Spanyorotongo gemeente. Baka di Brada Fleegle dini furu yari na a Dienstafdeling, a go wroko gi a Leri Komte èn bakaten gi a Diniwroko Komte. Na ini maart 2022 a tron yepiman fu a Diniwroko Komte fu a Tiri Skin.

 Brada Winder gro kon na ini Murrieta, Kalifornia, na Amerkankondre. A p’pa nanga a m’ma fu en kweki en na ini waarheid èn a dopu tapu 29 maart 1986. A mun baka dati, a besroiti fu go na ini a yepi-pionierwroko. A ben lobi en so te taki a ben wani go doro. Baka di a dini wan tu mun leki yepipionier, a tron gewoon pionier tapu 1 oktober 1986.

Di Brada Winder ben de wan yongu boi, a go luku den tu bigi brada fu en di ben e dini na Betel na a ten dati. A san disi meki taki a ben wani go dini na Betel te a ben moro owru. Na ini mei 1990, a kisi a kari fu go wroko na Wallkill Betel.

Na Betel, Brada Winder wroko na difrenti afdeling, soleki na afdeling di e sorgu taki ala sani tan krin, na afdeling di ben e sorgu gi a gron-wroko di ben e du drape, èn na a Betel kantoro. A trow nanga en frow Angela na ini 1997 èn den e dini na Betel sensi a ten dati. Na ini 2014 den froisi go na Warwick pe Brada Winder yepi nanga a bow-wroko fu na edekantoro. Na ini 2016 den froisi go na a Waktitoren Skoro Centrum na Patterson, pe Brada Winder wroko na a Audio/Video afdeling. Fo yari baka dati, den froisi go baka na Warwick èn Brada Winder go wroko gi a Wrokoman Komte. Na ini maart 2022 a tron yepiman fu a Wrokoman Komte fu a Tiri Skin.

Wi e begi Yehovah fu blesi den ’mansma disi di abi spesrutu koni’ èn di e wroko tranga fu horbaka gi a Kownukondre.​—Ef. 4:8.