MIÉRCOLES 18 inárachi enero bamíali 2023, aniri bilé namuti we natéami echoná jw.org: echi hermano Gage Fleegle alí Jeffrey Winder jawárami nili japi riká Aʼlá Nisériami. Okuánika echi ma wiká bamíali nóchili Jeobá.

Echi hermano Fleegle ochérili echomí Pensilvania (Estados Unidos). Echi wénwala ko binérili echi bichíwali. Japalí towí nili, simíali biléana pueblo japoná newaleli nawésiami. Miná ko pakoli 20 inárachi noviembre bamíali 1988.

Echi wénwala sinibí iʼwérili iyali jiti nóchilima Jeobá tiempo completo niraa. Alí bayéi aboi bitélachi echi superintendentes de circuito alí betelitas, alí echi riká echi hermano Fleegle machili japi echi hermanos we kaníliami nili nóchilia Jeobá. Jiti la, 1 inárachi septiembre bamíali 1989, chotásili nochia japi riká precursor regular. Alí japalí ma okuá bamíali simírili, echi ko nareli bilé nóchali japi we inílili olánilia japalí 12 bamíbami nili: nochia echomí Betel. Echi michá octubre bamíali 1991, chotásili nochia echoná Betel echomí Brooklyn.

Echoná nóchili 8 bamíali kariwea echi oselí, alí miná ko nuleeri japi nochama echoná Departamento de Servicio. Echalí ayénachó asali nóchilia Jeobá jaré bamíali echoná bilé congregación japoná raʼicháliwa ruso. Bamíali 2006 niwili Nadia yúa, alí echalí jonsa napawika nocha echoná Betel. Okuánika nóchili echoná congregación japoná raʼicháliwa portugués, alí simírikami 10 bamíali echoná congregación japoná raʼicháliwa español. Pe aminana japalí ma jaré bamíali nóchili echoná Departamento de Servicio, echi hermano Fleegle nóchili echoná Oficina del Comité de Enseñanza alí miná ko echoná Oficina del Comité de Servicio. Echi michá marzo bamíali 2022, wilaari japi riká kuʼíriami echoná Comité de Servicio japi olá echi Japi Aʼlá Niseri.

Echi hermano Winder ochérili echomí Murrieta (California). Echi wénwala japi Testigos ju, binérili  echi Biblia jitra, alí echi ko pakoli 29 inárachi marzo bamíali 1986. Ma bilé michá simírisa chotásili precursor auxiliar niya, alí jiti we kanílili ke riweli precursor niya. Ma jaré michá simírisa, 1 inárachi octubre bamíali 1986, chotásili precursor regular niya.

Japalí remalí nili, echi hermano Winder simili inesia okuánika binoy bachilá japi nochia mochili echoná Betel. Jepuná iʼwírili jiti osinálima echi solicitud japalí ma omérima nochia echoná. Alí echi michá mayo bamíali 1990, bayeri nochamia echoná Betel echomí Wallkill.

Echoná olali wiká sinúrika nóchali, japi riká echoná Departamento de Limpieza, Departamento de la Hacienda alí echoná Oficina de Betel. Bamíali 1997 niwili Angela yúa alí echalí jonsa napawika nocha echoná Betel. Bamíali 2014 juláari echomí Warwick, japoná echi hermano Winder iʼwírili nochia niwayá echi central mundial. Bamíali 2016 simíali echomí Patterson, echoná Centro Educativo de la Watchtower, alí nóchili echoná Servicios de Audio alí video. Ma naó bamíali simírisa checho ku sili echoná Warwick, alí echi hermano Winder wilaari jiti nochama echoná Oficina del Comité de Personal. Echi michá marzo bamíali 2022 wilaari japi riká kuʼíriami echoná Comité de Personal japi olá echi Japi Aʼlá Niseri.

Jepuná rijoi ko bilé chiliwéliami ju japi Jeobá tamujé iyali (Efes. 4:8). Ati tani Jeobá japi iʼwírima echi hermanos jiti iʼwérili noká nochia echi Onorúami Gobiérnowala jitra.