IHA loron-kuarta, 18 Janeiru 2023, anúnsiu espesiál ida iha jw.org fó sai katak irmaun Gage Fleegle no irmaun Jeffrey Winder komesa serbí nuʼudar membru ba Grupu Administradór husi Testemuña ba Jeová. Irmaun sira-neʼe serbí ona Jeová ho laran-metin ba tempu kleur.

Irmaun Gage sai boot iha Pennsylvania, Estadus Unidus no nia boot iha lia-loos. Bainhira nia sei joven, ninia família muda ba fatin rurál neʼebé presiza liután haklaken-naʼin. Lakleur depois neʼe, nia hetan batizmu iha 20 Novembru 1988.

Irmaun Gage nia inan-aman sempre anima nia atu serbí Jeová tempu-tomak. Dala barak sira konvida katuas área no ema Betel ba sira-nia uma, no irmaun Gage bele haree irmaun-irmán sira-neʼe nia ksolok. Depois hetan tiha batizmu, lakleur nia komesa serbí nuʼudar pioneiru regulár iha 1 Setembru 1989. Liutiha tinan rua, nia kumpre planu neʼebé uluk nia halo bainhira nia tinan 12, neʼe mak atu serbí iha Betel. Iha fulan-Outubru tinan 1991, nia komesa serbí iha Betel iha Brooklyn.

Iha Betel, irmaun Gage serbisu iha departamentu neʼebé halo livru sira ba tinan 8, tuirmai nia simu knaar iha Departamentu Serbisu nian. Durante tempu neʼe, nia serbí iha kongregasaun neʼebé koʼalia lian Rusu ba tinan balu. Iha tinan 2006, nia kaben ho Nadia neʼebé mós komesa serbí iha Betel. Sira naʼin-rua apoia serbisu haklaken iha lian Portugés, no ba tinan 10 liu sira apoia serbisu haklaken iha lian Españól. Depois serbí iha Departamentu Serbisu nian ba tinan barak, nia hetan knaar foun atu serbí iha Eskritóriu Komisaun Hanorin nian no tuirmai iha Eskritóriu Komisaun Serbisu nian. Iha fulan-Marsu tinan 2022, nia simu knaar nuʼudar ajuda-naʼin ba Komisaun Serbisu nian husi Grupu Administradór.

 Irmaun Jeffrey sai boot iha Kalifórnia, Estadus Unidus. Ninia inan-aman haboot nia iha lia-loos, no nia hetan batizmu iha 29 Marsu 1986. Fulan tuirmai nia deside atu foti pioneiru estra. Nia gosta loos pioneiru, tan neʼe nia hakarak kontinua. Kuandu foti tiha pioneiru estra ba fulan balu, tuirmai nia komesa serbí nuʼudar pioneiru regulár iha 1 Outubru 1986.

Bainhira sei joven, irmaun Jeffrey vizita ninia maun naʼin-rua neʼebé serbí iha Betel. Neʼe book nia atu aplika ba Betel bainhira ninia tinan toʼo. Iha fulan-Maiu 1990, nia simu konvite atu serbí iha Betel Wallkill.

Iha Betel, irmaun Jeffrey serbí iha departamentu oioin, inklui Departamentu Limpeza, departamentu neʼebé halo toʼos, no iha departamentu neʼebé tau matan família Betel. Nia kaben ho irmán Angela iha tinan 1997, no sira serbí hamutuk iha Betel hahú husi tempu neʼebá toʼo agora. Iha tinan 2014, sira muda ba Betel Warwick. Iha neʼebá, irmaun Jeffrey ajuda ho konstrusaun ba sede-jerál. Iha tinan 2016, sira muda ba Sentru Edukasaun husi Watchtower iha Patterson, no irmaun Jeffrey halo serbisu ho Grupu Áudio no Vídeo. Tinan haat liutiha, sira muda fali ba Betel Warwick, no irmaun Jeffrey serbí iha Eskritóriu Komisaun Serbisu-naʼin nian. Iha fulan-Marsu 2022, nia hetan knaar atu serbí nuʼudar ajuda-naʼin ba Komisaun Serbisu-naʼin nian husi Grupu Administradór.

Ami harohan katak Jeová sei kontinua haraik bensaun ba irmaun sira-neʼe nuʼudar sira kontinua serbisu ho badinas atu apoia Maromak nia Ukun.—Éf 4:8.