KHU mararu, 28 nya Janeiro nya 2023, gu ningedwe gitiviso nyo hathege omu nya jw.org, gi nga ba gi ganeya gu khigyo vandriyathu Gage Fleegle e Jeffrey Winder va hathidwe gasi gu thuma kha nga sivbango nya Huwo nya Guthangeye nya Dzifakazi dza Jehovha. Vandriyathu vava va vavili va na ni matimo nya mangi thumoni wa Jehovha.

Ndriyathu Fleegle dandrisidwe oeste ga Pennsylvania, Estados Unidos, khu vavelegi vaye va gu Dzifakazi dza Jehovha. Na ngari lidzaha, ndranga yaye yi di fuluga yi hongola gidhoropanani gi nga ba gi vbweta ngudzu giphaso nya vahuweleyi. Khu hwane nya gitepwana, uye a di bhabhatiswa khu 20 nya Novembro nya 1988.

Vavelegi va ndriyathu Fleegle, tepo yatshavbo va di gu mu kutsa gu beleya thumo nya tepo yatshavbo. Dzitepo nya dzingi, avo va di gu hakha vawoneleyi nya sirkwitu ni vabhetelita gaya gwawe, nigu ndriyathu Fleegle a di gu wona edzi va nga ba va tsakide khidzo. Hwanenyana nya gu ba a bhabhatisidwe, uye a di pheya gu thuma kha nga piyoneru nya tepo yatshavbo khu 1 nya Setembro nya 1989. Hwane nya myaga mivili a di thuma bheteli, a gu misuwo a nga ba ari nayo nari ni 12 myaga. Uye a di pheya gu thuma Bheteli ya Brooklyn khu 1991.

Na romo Bhetheli, ndriyathu Fleegle thumide avba nya gu theye dzikapa nya mabhuku khu 8 myaga, khu gu landreya a diya thuma Departamento de serviço. Ndrani nya tepo yile, uye thumide khu myaga nyo khaguri omu nya libandla li ganeyago Girusu. Khu 2006 a di tshadha ni Nadia, nigu uye tsakide khu gu thumeya Bheteli. Avo va thumide vatshavbo omu nya gipandre gu ganedwago Gitsungu ni gu thuma 10 myaga omu nya gipandre gu ganedwago Giespanyoli. Hwane nya myaga nya yingi na gu thuma avbo nya Departamento de Serviço, ndriyathu Fleegle a di hatwa gasi gu ya thuma Escritório da Comissão de Ensino, nigu khu gu landreya aya thuma avbo nya Escritório da Comissão de Serviço. Khu Março nya 2022, uye a di konvhidharwi gasi guya thuma kha  nga muphasedzeyi nya Comissão de Serviço nya Huwo nya Guthangeye.

Ndriyathu Winder dandrisidwe Murrieta, California, Estados Unidos da América. Uye hevbudzidwe lisine khu vavelegi vaye, nigu bhabhatisidwe khu 29 nya Março nya 1986. Ga ngima wu nga landreya, uye a di hunga gu thuma kha nga piyoneru nyo phasedzeye. Uye a di tsakiswa ngudzu khu isoso nyo bwe a vbweta gu simama. Hwane nya migima nyo khaguri na gu thuma kha nga piyoneru nyo phasedzeye, khu 1 nya Outubro nya 1986 a di pheya gu thuma kha nga piyoneru nya tepo yatshavbo.

Ndriyathu Winder tepo a nga bari muphya, a diya wuseya vandriyaye vavili va nga ba va thuma Bheteli. Isoso si mu giride a manega ni gudogoreya nya gu thumeye Bheteli. Khu Maio nya 1990, a di konvhidharwi gasi guya thuma Bheteli ya Wallkil.

Bheteli, ndriyathu Winder thumide avba nya dzidhepartamentu nyo hambane-hambane, nya nga gu gira thumo nya gu agise, gu thuma Fazenda ni gu thuma Escritório ya Bheteli. Khu 1997, a di tshadha ni Angela, nigu vatshavbo va gu thuma Bheteli kala muhuno. Khu 2014, ndriyathu Winder a di rumedwa gasi guya thuma Warwick, avbo a nga ya phasedzeya thumo nya gu vbahe nya Tsindza gwathu nya mafu yatshavbo. Khu 2016, avo va di rura va hongola Centro Educacional da Torre de Vigia, Patterson, avbo ndriyathu Winder a nga ya thuma avba nya Serviços de Áudio e Vídeo. Hwane nya 4 myaga, avo va di bweleya Warwick, nigu ndriyathu Winder a di konvhidharwi gasi guya thuma Escritório da Comissão do Pessoal. Khu Março nya 2022, a di konvhidharwi gasi gu thuma kha nga muphasedzeyi nya Comissão de Pessoal nya Huwo nya Guthangeye.

Ethu hi ngu gombeya ga Jehovha, hi lomba gu khethu a kategisa ‘vama vava va gu siningwa’ gasi va si kodza gu simama gu thuma khu sighingi ni gu seketeya Mufumo waye. — Efes. 4:8, tshamuselo wa vbavbatshi.