MULI Bwatatu, January 18, 2023, kwakabikkwa cakwaambilizya caalubazu a jw.org, icakali kwaamba kuti Mukwesu Gage Fleegle alimwi a Jeffrey Winder basalwa kuba mu Kabunga Keendelezya ka Bakamboni ba Jehova. Bakwesu aaba bobilo bamubelekela Jehova cakusyomeka kwaciindi cilamfwu.

Mukwesu Fleegle wakakomezyegwa abazyali bamuyoowa Leza ku western Pennsylvania, U.S.A. Ciindi naakali mukubusi, mukwasyi wakwe wakalongela kudolopo limwi lisyoonto kwalo kwakabulide basikumwaya. Nokwakainda buyo ciindi cisyoonto, wakabbapatizyigwa mu November 20, 1988.

Bazyali ba Mukwesu Fleegle lyoonse bakali kumukulwaizya kutalika mulimo waciindi coonse. Kanji-kanji, bakali kutambula balangizi bamabazu abamukwasyi wa Beteli muŋanda yabo, aboobo Mukwesu Fleegle wakali kulibonena mbobakakkomene bakwesu abacizyi aaba. Kalitanalampa kuzwa naakabbapatizyigwa, wakatalika kucita bupainiya bwaciindi coonse mu September 1, 1989. Nokwakainda myaka yobilo, wakaizuzikizya mbaakani yakubelekela a Beteli yalo njaakalibikkilide kajisi myaka iili 12. Aboobo wakatalika kubeleka aa Beteli yaku Brooklyn mu October 1991.

Kali a Beteli, Mukwesu Fleegle wakali kubelekela mupangilwa mabbuku (Bindery) kwamyaka iili 8, mpoonya wakalonzyegwa akutalika kubelekela mu Dipatimenti ya Mulimo. Kwaciindi coonse eeci, wakali mumbungano yamwaambo waci Russia. Kumane mu 2006 wakakwata mucizyi Nadia, walo iwakamusangana mumulimo waku Beteli. Antoomwe, bakali mumbungano yamwaambo waci Portuguese mpoonya kwamyaka yiinda ku 10 bakali mumbungano yamwaambo waci Spanish. Nokwakainda myaka minji kabelekela mu Dipatimenti ya Mulimo, Mukwesu Fleegle wakalonzyegwa akutalika kubelekela mu Kkomiti Iilanganya Ziyiisyigwa kumane kumbele mu Kkomiti Yamulimo. Mu March 2022 wakasalwa kuba Sikugwasyilizya mu Kkomiti Yamulimo ya Kabunga Keendelezya.

 Mukwesu Winder wakakomenena mu Murrieta, California, U.S.A. Bazyali bakwe mbobakamugwasya kwiiya kasimpe alimwi wakabbapatizyigwa mu March 29, 1986. Mumwezi buyo iwakatobela, wakacita bupainiya bwakugwasyilizya. Wakabukkomanina kapati bupainiya cakuti tanaakali kuyanda kucileka. Nokwakainda myezi iili mbwiibede kacita bupainiya bwakugwasyilizya, wakatalika bupainiya bwaciindi coonse mu October 1, 1986.

Naakacili mukubusi, Mukwesu Winder wakaswaya banabokwabo bobilo ibakali kubelekela aa Beteli aciindi eeco. Kuswaya ooku kwakamupa kuba aluyandisisyo lwakulembela kuyoobelekela ku Beteli aakukomena. Kumane mu May 1990, wakatambwa kuyoobelekela ku Beteli yaku Wallkill.

Naakali ku Beteli, Mukwesu Winder wakabelekela mumadipatimenti aayindene-indene, kubikkilizya aa Cleaning Department, Farm Department alimwi a Bethel Office. Mpoonya mu 1997 wakakwata ba Angela, alimwi bazumanana kubelekela a Beteli antoomwe kuzwa ciindi eeco. Mu 2014 bakalonzyelwa ku Warwick, kwalo Mukwesu Winder nkwaakali kugwasyilizya amayake aamaofesi mapati. Kumane mu 2016 bakaunka kuyoobelekela ku Watchtower Educational Center ku Patterson, kwalo Mukwesu Winder nkwaakali kubelekela mu Audio/Video Services. Nokwakainda myaka yone, bakapiluka alimwi ku Warwick, okuya Mukwesu Winder wakatalika kubelekela mu Kkomiti Iilanganya Babelesi. Kumane mu March 2022, wakasalwa kuba sikugwasyilizya mu Kkomiti Iilanganya Babelesi ya Kabunga Keendelezya.

Eelo kaka tupailila kuti Jehova azumanane kubalongezya baalumi aaba, ‘izipego mubantu’ ciindi nobazumanana kubeleka canguzu kutegwa basumpule ziyandika zya Bwami!—Ef. 4:8.