HI RAVUNHARHU wa ti 18 ta January 2023, eka jw.org ku humelele xitiviso xo hlawuleka lexi a xi vula leswaku Makwerhu Gage Fleegle na Makwerhu Jeffrey Winder, va hlawuriwe ku va swirho swa Huvo Leyi Fumaka Ya Timbhoni Ta Yehovha. Vamakwerhu lavambirhi va ni malembe yo tala va ri karhi va tirhela Yehovha hi ku tshembeka.

Makwerhu Fleegle u kurisiwe hi vatswari lava chavaka Xikwembu evupeladyambu bya Pennsylvania, eU.S.A. Loko a ha ri muntshwa, ndyangu wa ka vona wu rhurhele exidorobanini lexitsongo laha a ku ri ni xilaveko lexikulu. Endzhaku ka sweswo, u khuvuriwile hi ti 20 ta November 1988.

Mikarhi hinkwayo vatswari va Makwerhu Fleegle, a va n’wi khutaza ku nghenela ntirho wa nkarhi hinkwawo. Hakanyingi a va rhamba valanguteri va miganga ni vamakwerhu lava tirhaka eBethele ekaya ra vona naswona Makwerhu Fleegle a a vona ndlela leyi vamakwerhu lava va tsakeke hayona. Endzhaku ko khuvuriwa, u sungule ku phayona hi ti 1 ta September, 1989. Endzhaku ka malembe mambirhi, u fikelele leswi a a navela ku swi endla ku sukela loko a ha ri ni malembe ya 12, ku nga ku tirha eBethele. U sungule ku tirha eBethele ya le Brooklyn hi October 1991.

Loko a ri eBethele, Makwerhu Fleegle u tirhe malembe ya nhungu eka Ndzawulo yo Hlanganisa maphepha ma va tibuku kutani endzhaku ka sweswo u averiwe ku tirha eka Ndzawulo ya Ntirho. Hi nkarhi wolowo, u ve evandlheni ra ririmi ra Xirhaxiya ku ringana malembe yo hlayanyana. Hi 2006, u teke Nadia a va nsati wakwe naswona u sungule ku tirha na yena eBethele. Havumbirhi va ve evandlheni ra Xiputukezi naswona va hete malembe yo tlula khume va ri evandlheni ra Xipaniya. Endzhaku ko heta malembe yo tala a ri eka Ndzawulo ya Ntirho, Makwerhu Fleegle u averiwe ku ya tirha eka Hofisi Ya Komiti Yo Dyondzisa naswona hi ku famba ka nkarhi u averiwe eka Hofisi Ya Komiti Ya Ntirho. Hi March 2022, u hlawuriwe ku va mupfuni wa Komiti Ya Ntirho Ya Huvo Leyi Fumaka.

 Makwerhu Winder u kulele eMurrieta, California, eU.S.A. U kuriseriwe entiyisweni hi vatswari vakwe naswona u khuvuriwe hi ti 29 ta March 1986. Hi n’hweti leyi landzeleke u ve phayona ra nkarhinyana. U tiphinile swinene lerova a a nga ha swi lavi ku tshika. Endzhaku ka tin’hweti to hlaya a ri phayona ra nkarhinyana, u sungule ku va phayona ra nkarhi hinkwawo hi ti 1 ta October 1986.

Loko a ha ri muntshwa, Makwerhu Winder u endzele vabuti vakwe vambirhi lava hi nkarhi wolowo a va tirhela eBethele. Riendzo rero ri endle a navela ku ya tirha eBethele loko se a kurile. Kutani hi May 1990, u rhambiwile leswaku a ya tirhela eBethele ya le Wallkill.

Loko a ri eBethele, Makwerhu Winder u tirhe eka tindzawulo to hambanahambana, ku katsa ni le ka Ndzawulo yo Basisa, ya Swa Vurimi ni Hofisi ya le Bethele. Hi 1997, u teke Angela a va nsati wakwe naswona ku sukela kwalaho va tirhe eBethele swin’we. Hi 2014, va ye va ya tirhela eWarwick, laha Makwerhu Winder a pfuneteke eka tsima ro aka miako ya ntsindza wa misava hinkwayo. Hi 2016 va rhurhele eNtsindza wa Dyondzo wa Watchtower ePatterson, laha Makwerhu Winder a tirheke eka Ndzawulo ya Audio/Video. Endzhaku ka malembe ya mune, va tlhelele eWarwick naswona Makwerhu Winder u averiwe ku tirha eka Komiti Yo Khathalela Vatirhi. Hi March 2022, u hlawuriwe ku va mupfuni eka Komiti Yo Khathalela Vatirhi Ya Huvo Leyi Fumaka.

Hi khongelela leswaku Yehovha a va katekisa swinene ‘vavanuna lava nga tinyiko’ loko va ri karhi va ya emahlweni va tikarhatela ku tirhela vamakwerhu.—Efe. 4:8.