I TE Mahana toru 8 no Tenuare 2023, ua itehia te parau apî i nia i te jw.org e ua riro mai taeae Gage Fleegle raua Jeffrey Winder ei mero o te Tino aratai a te mau Ite no Iehova. Mea maoro raua i te taviniraa ia Iehova ma te taiva ore.

Ua paari taeae Fleegle i Pennsylvanie, Marite e to ˈna na metua Ite no Iehova. I to ˈna taurearearaa, ua taui ratou i te faaearaa e haere atura i te hoê oire iti e hinaaro-rahi-hia ˈi te feia poro. Aita i maoro, bapetizohia ˈtura o ˈna i te 20 no Novema 1988.

Ua faaitoito noa to ˈna na metua ia ˈna ia rave i te taviniraa taime taatoa. Pinepine to ˈna mau metua i te titau manihini i te mau tiaau haaati e te mau mero o te Betela i te fare e ua ite taeae Fleegle i to ratou oaoa. I muri noa mai i to ˈna bapetizoraa, ua haamata o ˈna i te taviniraa pionie tamau i te 1 no Tetepa 1989. Piti matahiti i muri aˈe, ua tavini oia i te Betela. E fa pae varua hoi teie ta ˈna i haamau i te 12raa o to ˈna matahiti. Ua haamata ïa o ˈna i te ohipa i te Betela no Brooklyn i Atopa 1991.

I te Betela, ua ohipa taeae Fleegle i te vahi hamaniraa buka e vaˈu matahiti te maoro. I muri aˈe, ua ohipa o ˈna i roto i te Tuhaa o te taviniraa. I tera area taime, ua tavini o ˈna i roto i te amuiraa reo Rusia tau matahiti te maoro. I 2006, ua faaipoipo o ˈna i te tuahine Nadia, e tavini amui atura raua i te Betela. Ua tavini raua i te tuhaa fenua reo Potiti, e hau atu ahuru matahiti te maoro i te tuhaa fenua reo Paniora. I muri aˈe e rave rahi matahiti i roto i te Tuhaa o te taviniraa, ua tavini taeae Fleegle i te Piha ohipa a te Tomite haapiiraa e i muri mai, i te Piha ohipa a te Tomite taviniraa. I Mati 2022, ua riro mai o ˈna ei mero tauturu i te Tomite taviniraa a te Tino aratai.

 Ua paari taeae Winder i Murrieta, Kalifonia. E Ite no Iehova to ˈna na metua, ua paari ïa o ˈna i roto i te parau mau. Bapetizohia ˈtura oia i te 29 no Mati 1986. Te avaˈe i muri iho, ua rave o ˈna i te taviniraa pionie tauturu. Ua au roa o ˈna e tamau atura i roto i tera taviniraa. Tau avaˈe i muri aˈe, riro mai nei o ˈna ei pionie tamau i te 1 no Atopa 1986.

Ei taurearea, ua haere taeae Winder e farerei i to ˈna na tuaana e tavini ra i te Betela. Hinaaro atura o ˈna e tavini atoa i te Betela ia paari mai o ˈna. I Me 1990, ua titauhia o ˈna ia tavini i te Betela no Wallkill.

I te Betela, ua ohipa taeae Winder i roto e rave rau tuhaa mai te Tuhaa tamâraa, faaapu e taviniraa i te Betela. Ua faaipoipo o ˈna i te tuahine Angela i 1997, e tavini amui atura raua i te Betela e tae roa mai i teie mahana. I 2014, ua tonohia raua i Warwick e ua apiti taeae Winder i te paturaa o te pu rahi. I 2016, ua tonohia raua i te Pu haapiiraa a te mau Ite no Iehova i Patterson. I reira, ua ohipa taeae Winder i roto i te Tuhaa haruharuraa e video. E maha matahiti i muri aˈe, ua anihia raua ia hoˈi i Warwick e ua tavini taeae Winder ei mero o te Tomite rave ohipa. I Mati 2022, ua riro mai oia ei mero tauturu o te Tomite rave ohipa o te Tino aratai.

Te pure nei tatou ia haamaitai Iehova i teie na taeae a tamau ai raua i te rohi no te turu i te ohipa a te Faatereraa arii. E “ô” hoi raua no ǒ mai ia Iehova ra.—Eph. 4:8.