VOTATU, keteke 18 yosãi ya Susu 2023, kua molẽha esapulo limue vo jw.org, lia lombolola okuti, Manji Gage Fleegle kuenda Jeffrey Winder va nõliwa oco va pange onepa Kosungu Yolombangi Via Yehova. Kavali kavo va kasi ale oku vumba Yehova lekolelo vokuenda kuotembo yalua.

Manji Fleegle wa kulila kutakelo wo Pensilvania ko Estadus Unidus. Eye kumue lolonjali viaye va kolelele calua Suku. Eci a kala handi umalẽhe epata liaye lia ilukila vimbo limue litito kuna kua kala esukila liakundi. Noke liotembo yimue, keteke 20 ya Kuvala wo 1988 eye wa papatisiwa.

Olonjali via Manji Fleegle olonjanja viosi via enda oku u vetiya oku iñila kupange wotembo yosi. Olonjanja vialua konjo yavo va enda oku yekisa vamanji vakuakunyula akongelo kuenda vamanji va panga onepa kepata lio Betele, kuenje Manji Fleegle wa enda oku mola ndomo vamanji vaco va kuatele esanju. Noke lianyamo amue tunde eci a papatisiwa, keteke 1 Yenyenye Linene wo 1989, wa litumbika kupange wakundi votembo yosi. Noke lianyamo avali, eye wa tẽlisa ocimãho a litumbikilile eci a kuata 12 kanyamo okuti coku talavaya ko Betele. Eye wa iñila kupange wo Betele yo Brooklyn kosãi ya Mbalavipembe yunyamo wo 1991.

Ko Betele Manji Fleegle wa talavaya koseketa yoku panga alivulu anyamo ecelãla, noke wa tumiwa Koseketa Yupange. Vokuenda kuotembo yaco, wa kala vekongelo limue va vangula elimi lio Russu anyamo amue. Kunyamo 2006, wa li kuela la manji Nadia, okuti wa likongela kokuaye kupange wo Betele. Kavali kavo, va kuatisa ovikanjo va vangula elimi Lioputu kuenda vokuenda kuanyamo ekũi va kuatisa ovikanjo va vangula elimi lio Espanyole. Noke lianyamo alua oku talavaya Koseketa Yupange, Manji Fleegle wa lalekiwa oku talavaya Koseketa Yocimunga Celongiso noke Koseketa Yocimunga Cupange. Kosãi Yelombo 2022, eye wa lalekiwa oku kuatisa Kocimunga Cupange Wosungu Yolombangi Via Yehova.

 Manji Winder wa kulila ko Murrieta, ko Kalifornia, kofeka yo Estadus Unidus. Eye wa longisiwa ocili lolonjali viaye kuenda keteke 29 Yelombo wo 1986 wa papatisiwa. Vosãi ya kuamamo wa nõlapo oku litumbika kupange wakundi va sokamo. Omo okuti wa kala oku sola upange waco, wa yonguile oku amamako. Noke liolosãi vialua oku talavaya ndukundi wa sokamo, keteke 1 ya Mbalavipembe wo 1986, wa fetika upange wakundi votembo yosi.

Manji Winder eci a kala umalẽhe, wa ka nyulile vahuvaye va kala ko Betele. Epasu liaco, lio kuatisa oku kuata onjongole yoku li sonehisavo eci a laikele oku kala ukulu oco a iñilevo kupange wo Betele. Kuenje kosãi ya Mbalavipembe wo 1990, wa lalekiwa kupange wo Betele ko Wallkill.

Ko Betele manji Winder wa talavaya voloseketa via liyekaila, ndeci Koseketa Yoku Yelisa, Koseketa Yepia kuenda Koseketa yi Kuatisa Kesukila Lia Vamanji ko Betele. Eye wa li kuela la manji Angela, kunyamo wo 1997 kuenda toke cilo va kasi oku amamako kupange wo Betele. Kunyamo wo 2014, ovo va tumiwa ko Warwick kuna manji Winder a kuatisa kupange woku tunga ombala yoluali luosi. Kunyamo wo 2016, ovo va ilukila Kombala Yosikola Yolombangi Via Yehova ko Patterson, kuna manji Winder a talavaya Koseketa Yoku Ngalavala. Noke lianyamo akuãla ovo va tiukila ko Warwick, kuenje manji Winder wa nõliwa oco a talavaye koseketa Yocimunga ci Tata Vana va Litumbika Kupange Ulikasi. Kosãi Yelombo wo 2022 wa nõliwa oco a kale oñuatisi Yocimunga ci Tata Vana va Litumbika Kupange Ulikasi Wosungu Yolombangi Via Yehova.

Tu likutilila oco Yehova a sumũlũise ‘alume vaco ndolombanjaile’ osimbu ovo vamamako oku likolisilako oku talavayela kovopange Usoma.—Va Efe. 4:8.