E RU aghwoghwo rẹ oghẹresan vwẹ Wednesday, January 18, 2023, vwẹ jw.org, rọ tare nẹ a vwẹ oniọvo Gage Fleegle vẹ Jeffrey Winder vwo mu ayen vwọ vwomaba Ẹko Rọvwẹrote Iruo rẹ Iseri ri Jihova. Iniọvo ivẹ nana fuevun ga Jihova krẹre.

Ọsẹ vẹ oni ri vwo oshọẹdjẹ ri Jihova yen ghẹrẹ oniọvo Fleegle ghwanre vwẹ western Pennsylvania, U.S.A. Ọke rọ vwọ hẹ eghene, orua rọyen da kua kpo ọko ọvo rọ dia asan ra da ma guọnọ ukẹcha. O rhe kri-i, o de bromaphiyame vwẹ November 20, 1988.

Ọkieje yen ọsẹ vẹ oni rẹ oniọvo Fleegle vwo jiri iruo rẹ ẹga rẹ ọkieje na kẹ. Ọke buebun yen iniruo okinriariẹ vẹ iniọvo re ji nẹ Bẹtẹl rhe vwo won asan rayen, ọnana nẹrhẹ oniọvo Fleegle mrẹ oborẹ omavwerhan iniọvo eya vẹ eshare nana te. O rhe kri-i, o vwo bromaphiyame nu, ọ da ton iruo ọkobaro rẹ ọkieje phiyọ vwẹ September 1, 1989. Ẹgbukpe ivẹ vwọ wan nu, ọ da rhe yanmu ẹkẹn ro bru kẹ oma rọ vwọ ga vwẹ Bẹtẹl ọke rọ vwọ hẹ ẹgbukpe 12. Ọ ton ẹga ri Bẹtẹl phiyọ vwẹ Brooklyn vwẹ October 1991.

Oniọvo Fleegle wianre vwẹ asan ra da nyẹ ẹbe koko vwẹ Bẹtẹl ẹgbukpe ẹrenren, ọyena vwọ wan nu, ọ da wian vwẹ Akon Iruo Rọvwẹrote Iruo rẹ Ẹga Na. Vwẹ uvwre rẹ ọke yena, ọ gare vwẹ ukoko rọ jẹ ephẹrẹ ri Russia vwẹ ikpe evo. Vwẹ 2006, ọ da rọvwọn aye rọyen Nadia, rọ vwomaba vwẹ ẹga ri Bẹtẹl. Ayen ihwo ivẹ na gare vwẹ Portugal, ayen da je ga vwẹ Spain vwẹ ikpe re vrẹ ihwe. Ayen vwọ wian ikpe buebun vwẹ Akon Iruo Rọvwẹrote Iruo rẹ Ẹga Na nu, a da vuẹ oniọvo Fleegle nẹ ọ wian vwẹ Ọfisi rẹ Umẹ Rọvwẹrote Eyono, ọyena vwo wan nu, ọ da rhoma wian vwẹ Ọfisi rẹ Umẹ Rọvwẹrote Iruo rẹ Ẹga Na. Vwẹ March 2022, e de vwo mu nẹ ọ ga kẹrẹ ọ rọ vwẹ ukẹcha kẹ Umẹ Rọvwẹrote Iruo rẹ Ẹga rẹ Ẹko Rọvwẹrote Na.

A ghẹrẹ oniọvo Winder ghwanre vwẹ Murrieta, California, U.S.A. Ukoko na yen ọsẹ vẹ oni rọyen  da ghẹrẹ ghwanre, o de bromaphiyame vwẹ March 29, 1986. Vwẹ emeranvwe rọ vwọ kpahọn, o de brorhiẹn rọ vwọ ga kerẹ ọkobaro ubrọke. Ọ riavwerhen rẹ iruo rẹ ọkobaro na mamọ te asan rọ da guọnọ ruo kpobarophiyọ. Rọ vwọ ga kerẹ ọkobaro ubrọke vwẹ emeranvwe evo nu, ọ da ton ọkobaro ọkieje phiyọ vwẹ October 1, 1986.

Ọke rọ vwẹ hẹ eghene, oniọvo Winder de re won iniọvo rọyen ivẹ re dia ekpako rọyen ọrhọrha, re je ga vwẹ Bẹtẹl vwẹ ọke yena. Oyan yena da nẹrhẹ o vwo oruru rọ vwọ ga vwẹ Bẹtẹl rọ vwọ ghwanre re. Vwẹ May 1990, e de durhie nẹ ọ rhe ga vwẹ Bẹtẹl rọhẹ Wallkill.

Oniọvo Winder wianre vwẹ akon iruo sansan vwẹ Bẹtẹl kerẹ Akon Iruo Rovwẹrote Orufon, Akon Iruo Rovwẹrote Owian rẹ Aghwa vwẹ Bẹtẹl vẹ Akon Iruo Rọvwẹrote Orua ri Bẹtẹl. Ọ rọvwọn aye rọyen Angela, vwẹ 1997, vwọ nẹ ọke yena rhe yen ayen ivẹ na vwọ ga kuẹgbe vwẹ Bẹtẹl. E de mu ayen kpo Warwick vwẹ 2014, etiyin Oniọvo Winder da vwẹ ukẹcha phia vwẹ ebanbọn rẹ Esiri Ukoko. Vwẹ 2016 e de mu ayen kpo Watchtower Educational Center vwẹ Patterson, etiyin Oniọvo Winder da wian vwẹ akon iruo rẹ Iniọvo ri Ruiruo rẹ Uhworo vẹ Ividio. Ẹgbukpe ẹne vwọ wan nu, ayen de rhivwin kpo Warwick, vwẹ etiyin a da vuẹ Oniọvo Winder nẹ ọ wian vwẹ Ọfisi rẹ Umẹ Rọvwẹrote Iniọvo re Ga Vwẹ Bẹtẹl. Vwẹ March 2022 e de vwo mu kerẹ Ọ rọ Vwẹ Ukẹcha kẹ Umẹ Rọvwẹrote Iniọvo re Ga Vwẹ Bẹtẹl rẹ Ẹko Rọvwẹrote.

Avwanre nẹrhovwo nẹ Jihova bruphiyọ kẹ eshare nana re vwo “ruẹse” na rẹ ayen vwọ wian gangan fikirẹ Uvie na.​​—Ẹf 4:8.