NANARARU, nihiku 18 a Janeiro a 2023, saakumiheriwa soohimmwa va jw.org sihimaka weera, asinna Gage Fleegle ni Jeffrey Winder yaathanliwa weera ekhale amoha a Mukuttula Woolamulela wa Anamoona a Yehova. Asinna ala eeli aakhalano sooweereya sa mweekumini sintxipale mpuwa wa muteko aya woororomeleya enanvarelaaya Yehova.

Munna Fleegle ohuuwale eparte ya oeste ya oPensilvânia, wEstados Unidos ni asitiithi awe yaawo eri Anamoona a Yehova. Vaavo owo aaraawe mwammiravo, emusi awe yaathaamela ecidade ekhaanene weiwo yaathonwaayawo anamalaleera. Muhoolo mwaya, owo aaBatiziwa nihiku na 20 a Novembro a 1988.

Asitiithi a Munna Fleegle yannamooperera weera avolowe muteko wa ehuhu yootheene. Ikwaha sintxipale nannawaakhela asitokweene a esirkwiitu ni maBethelita, munna Fleegle annoona moota asinna awo ni asirokora yaahakalalaaya. Noovira etempu abatizinweene, owo aahipatxera ovara ntoko pioneiru anthiti 1 a Setembro a 1989. Sivirakaru iyaakha piili, owo aahikwanihera yooluluwanya aaraaweno ovinyera areeneno iyaakha 12, ovara oBetheli. Mweeri wa Outubro wa 1991 owo aahipatxera ovara oBetheli ya oBrooklyn.

OBetheli, Munna Fleegle annakhavihera simpakiwaayawo irevista sahu mpuwa mwa iyaakha 8, ni muhoolo mwaya, owo aathanleliwa ovara eDepartamentu ya muteko (Departamento de Serviço). Emaara ene yeele, owo aahivara mwa iyaakha vakhaaniini muloko wa oRussa. Eyaakha ya 2006 owo aahimuthela Nadia. Nave-tho Nadia aahaakhuleliwa ovara oBetheli. Ooweeli awosa, yaahivara muteko woolaleera muttetthe woothowa anamalaleera wa nuulumo na Ekunya ni mpuwa mwa iyaakha 10 muttetthe wa nuulumo na Espanhol. Sivirakaru iyaakha sintxipale avaraka eDepartamentu ya muteko (Departamento de Serviço), munna Fleegle aahithanleliwa ovara wescritorio ya ekomisau yooxuttiha (Escritório da Comissão de Ensino). Ni muhoolo mwaya, aahivara  wescritorio ya ekomisau ya muteko (Escritório da Comissão de Serviço). Mweeri wa Março a 2022, owo aahithanleliwa okhala namakhavihera a ekomisau ya muteko wa Mukuttula Woolamulela (ajudante da Comissão de Serviço do Corpo Governante).

Munna Winder ohuuwale oMurrieta, oCalifórnia, wEstados Unidos wAmérica. Owo oxuttenre ekhaikhai ni asitiithi awe ni oBatiziwe nihiku na 29 a Março eyaakha ya 1986. Mweeri waattharelana owo aapatxera ovara ntoko pioneiru ookhavihera. Nave owo wannamusivela vantxipale ni annatthuna ovirelela ovara. Sivinreene miyeeri sintxipale avaraka ntoko pioneiru ookhavihera, owo aapatxera ovara ntoko pioneiru anthiti nihiku na 1 a Outubro a 1986.

Vaavo aaraawe mmiravo, munna Winder aahaaxekura asinnawe eeli yaawo yaavara oBetheli. Mwa etempu ele aaxekurakaru asinnawe, owo aahikhalano ntthuno nookhavihera oBetheli. Mweeri wa Maio a 1990, owo aawompwa weera akhavihereke eBetheli ya Wallkill.

OBetheli, munna Winder aahikhavihera iDepartamentu sintxipale ohela mpuwa ompaka limpeza ni okhavihera omatta ni eDepartamentu ya oBetheli. Eyaakha ya 1997, owo aamuthela mwaariye, Angela, ni mpaka olelo va, awosa envara oBetheli. Eyaakha ya 2014, awosa yaathaamiheriwa oWarwick weiwo munna Winder aakhavihenraawewo otekiwa wa esede mundial. Eyaakha ya 2016, awo yaahithaamela ecentro yooxuttiha ya oTorre de Vigia oPatterson (Centro Educacional da Torre de Vigia em Patterson) weiwo munna Winder aakhaviheraawewo muteko wa Áudio e Vídeo. Sivirakaru iyaakha 4, awo yaatthikela oWarwick, ni munna Winder aahithanleliwa ovara wescritório ya ekomisau ya pessoal (Escritório da Comissão do Pessoal). Mweeri wa Março a 2022, owo aahithanleliwa okhala namakhavihera a ekomisau ya pessoal a Mukuttula Woolamulela (ajudante da Comissão de Pessoal do Corpo Governante).

Hiyo ninnanvekela Yehova weera avirelele oreeliha ‘soovaha iyo sa alopwana’ ni weera awo evirelele ovara vantxipale weera ekhavihere omwene. — Aef. 4:8.