NAMARARU, 18 a Janeiro a 2023, saahikumiheriwa soohimmwa sa vameekha aya mu jw.org, saahimya wiira Anna Gage Fleegle ni Jeffrey Winder, yaahithanliwa wiira arumeeleke ntoko anna a Nikhuuru Noolamulela na Anamoona a Yehova. Anna awo oowanli, apacenrye khalai omurumeela Yehova moororomeleya.

Munna Fleegle innunwe wEstados Unidos, oPensilvânia ni anamuyari awe Anamoona a Yehova. Okathi ari awe mmiravo, anamuyari awe yaahithaamela epooma yaamukhaani yoothowa anamalaleerya. Nuuvira okathi vakhaani, owo aahipatisiwa 20 a Novembro a 1988.

Anamuyari awe munna Fleegle, khula okathi yaanimutumererya okela muteko wa Muluku wa okathi wootheene. Ikwaha sikina, awo yaaniwaakhela owannyeya axitokweene a isirkwiitu ni mabetelita. Okathi owo, munna Fleegle aaniweha wiira anna ni arokora awo yaakhala oohakalala. Nuuvira okathi vakhaani nuumala opatisiwa, owo aahipacerya orumeela ntoko pioneero ookhaliherya okhuma 1 a Setembro a 1989. Nuuvira iyaakha piili, owo aahilattuliwa wiira arumeeleke oBeteli ntoko aaphavela awe okhuma orina ene iyaakha 12. Owo opacenrye orumeela oBeteli ya oBrooklyn Outubro a 1991.

OBeteli, munna Fleegle ankaternari iliivuru mwa iyaakha 8, nuumala-vo, owo aahithanliwa wiira avareke eDepartamento ya Muteko. Okathi ole, owo aarumeela mwa iyaakha vakhaani muloko waalavuliwa nttaava na eRuusu. Mwaakha wa 2006, Fleegle aahimuthela murokora oniitthaniwa Nadia. Nave yena aaheemererya orumeela oBeteli. Oowanli aya, yaanikhaliherya muloko waalavuliwa nttaava na Ekunya, nave mwa iyaakha 10, awo yaahikhaliherya muloko waalavuliwa nttaava na Espanhol. Nuumala iyaakha sinceene orumeelaka eDepartamento ya Muteko, munna Fleegle aahithanliwa wiira avareke Eskritoorio ya Ekomisau Yoowiixuttiha, nuumala-vo aahirowa okhaliherya Eskritoorio ya Ekomisau ya Muteko. Março a 2022, owo aahithanliwa okhala  namakhaliherya a Ekomisau ya Muteko ya Nikhuuru Noolamulela.

Munna Winder, iinunwe muttetthe wa oMurrieta, oCalifórnia, wEstados Unidos ya wAmérica. Owo iixuttihiwe ekeekhai ni anamuyari awe ni opatisiwe 29 a Março a 1986. Mweeri waattharelana nuumala opatisiwa, owo aahivekela okhala pioneero ookhaliherya. Tthiri muteko ole khiwaareere omusivela vanceene. Nuumala oviriha miyeeri sinceene orumeelaka ntoko pioneero ookhaliherya, owo aahivekela okhala pioneero ookilaatheya 1 a Outubro a 1986.

Okathi ari awe mmiravo, munna Winder aahirowa waaxukurya axuulupale awe anli yaawo yaarumeela oBeteli. Nto oxukurya iwe, waahimwiiriha yena osiveliwa ni ophavela wiira arumeeleke oBeteli. Maio a 1990, owo aahilattuliwa wiira arumeeleke oBeteli ya oWallkill.

OBeteli, munna Winder aanirumeela idepartamento soovirikana, ntoko eDepartamento ya Limpesa ni Iskritoorio sa oBeteli. Mwaakha wa 1997, owo aahimuthela mwaarawe, oniitthaniwa Angela, oowanli aya annirumeela oBeteli mpakha olelo-va. Mwaakha wa 2014, owo aahithaamihiwa oroihiwaka oWarwick, weiwo munna Winder aakhaliherya awe muteko wooteka eseedi ya olumwenku wootheene. Mwaakha wa 2016, awo yaahithaama arowaka oPatterson, weiwo munna Winder aavara awe Muteko wa Audiyu ni Viidiyu. Nuuvira iyaakha xexe, awosa yaahitthikelasa oWarwick weiwo munna Winder aathanleliwa awe ovara muteko eDepartamento ya Ekomisau Enaaweherya Atthu. Vano Março a 2022, owo aahithanliwa okhala namakhaliherya a Ekomisau Enaaweherya Atthu ya Nikhuuru Noolamulela.

Hiyo ninninvekela Yehova wiira ohihiye waareeliha alopwana awo ari ntoko “soovaha” ni wiira awo ahihiye ovara muteko munceene wa okhaliherya Omwene. — aEef. 4:8.