ON WEDNESDAY, January 18, 2023, them put one special announcement for jw.org say, Brother Gage Fleegle and Brother Jeffrey Winder don become Governing Body members. The two of them don serve Jehovah well for plenty years.

Brother Fleegle grow for Pennsylvania, U.S.A. Im papa and mama na Jehovah Witness and them teach-am to love Jehovah. When e still be young boy, im family move go one small town where them need more publishers. E no tey after them move, before e baptize for November 20, 1988.

Im papa and mama encourage-am say make e join full-time service. Plenty times, circuit overseers and Bethelites de come stay for their house, and Brother Fleegle de see how this brothers and sisters wey de come their house de happy. So e no tey after e baptize before e start to pioneer for September 1, 1989. And two years after e start to pioneer, them call-am to come work for Bethel. This na wetin e plan when e dey 12 years. So e start to serve for Brooklyn Bethel for October 1991.

For Bethel, Brother Fleegle work for one department wey de make our book them, for eight years. After, them send-am go Service Department. When e dey Service Department, e serve for one congregation wey them de speak Russia language. E serve for the congregation for some years. E marry for 2006. Im wife name na Nadia, and e join-am to serve for Bethel. The two of them don serve for Portuguese congregation and e pass ten years wey them serve for Spanish congregation. After e don serve for Service Department for plenty years, them say make e go de work for Teaching Committee Office and later, them say make e go de work for Service Committee Office. For March 2022, them make-am helper to Service Committee of the Governing Body.

 Brother Winder grow for Murrieta, California, U.S.A. Im papa and mama na Jehovah Witness, and them teach-am to love Jehovah from when e small. E baptize for March 29, 1986. The next month after e baptize, e start to do auxiliary pioneer. E enjoy-am well-well, so e decide say e go continue. After e don do auxiliary pioneer for some months, e become regular pioneer for October 1, 1986.

When Brother Winder still be young boy, e visit two of im senior brothers wey de work for Bethel that time. This one make-am want serve for Bethel when e grow. And for May 1990, them invite-am make e come work for Bethel for Wallkill.

For Bethel, Brother Winder work for different-different department, like Cleaning Department, Farm Department, and Bethel Office. E marry for 1997, and e and im wife de serve together for Bethel since that time. For 2014, them send-am go Warwick to work with the brothers wey de build our headquarter. For 2016, them send-am go Watchtower Educational Center for Patterson. And for there, e work with the brothers wey de produce our videos and audios, for Audio/Video Services. After four years, them send-am back to Warwick, and them tell-am say make e de work with Personnel Committee Office. For March 2022, them make-am helper to Personnel Committee of the Governing Body.

We pray say make Jehovah bless this our dear brothers wey e don give us “as gifts,” as them continue to do their best for im work.—Eph. 4:8.