MU KINTATU, kilumbu 18 Ngonda Yitheti mvu 2023, batula ndubu yinkiza beni mu jw.org yaba tuba ti zikhomba Gage Fleegle ayi Jeffrey Winder beka mu Dingumba Dintuadisi di Zimbangi zi Yave. Baba buadi, bama viokisa mimvu miwombu mu kisalu kiawu kuidi Yave.

Yaya Fleegle wuyonzukila ku Pennsylvania U.S.A. ayi matata mandi baba buongiminanga Nzambi. Bo kaba muana ditoku, dikanda diandi bayenda kuezingila ku buala bu mueka buba tsatu yi minsamuni. Vasa vioka ko beni thangu, nandi wubotama mu kilumbu 20 Ngonda Kumi Yimueka mvu 1988.

Matata ma yaya Fleegle baba kunkindisanga beni muingi kakota mu kisalu ki thangu ka thangu. Bawu baba tambulanga ku nzo’awu minkengididi mi bimvuka, zibetelita ayi yaya Fleegle waba monanga mayangi zikhomba aziozio baba. Vasa vioka ko beni thangu bo kabotama ayi wuyiza ba ntuami ntuala—mu kilumbu ki 1 Ngonda Yivua mvu 1989. Bo vavioka mimvu miodi, nandi wudukisa makani kasikika bo kaba 12 di mimvu—ma kusadila ku Beteli. Nandi wutona kisalu ku Beteli yi Brooklyin mu Ngonda Yikumi mvu 1991.

Ku Beteli, yaya Fleegle wusadila ku kibuangu bankubikanga minkanda mu nana di mimvu, bosi wutona kusadila mu Dingumba Dintadilanga Matedi Kisalu. Bo kaba mu kiyeku akiokio, nandi wuviokisa mua mimvu mu kimvuka bankolukanga mbembu yi Rusu. Mu mvu 2006 nandi wukuela yaya Nadia ayi tona thangu ayoyo, bansadilanga va kimueka ku Beteli. Mvandi basadila mu kimvuka bankolukanga kiphutu ayi kuvioka kumi di mimvu mu kimvuka bankolukanga Espanhol. Bo yaya Fleegle kaviokisa mimvu miwombu mu Dingumba Dintadilanga Matedi Kisalu, bosi wutambulala kiyeku ki kusadila ku Escritório yi Dingumba Dintadilanga Matedi Kulonga bosi ku Escritório yi Dingumba Dintadilanga Matedi Kisalu. Mu Ngonda Yintatu mvu 2022 nandi wu tambula  kiyeku ki kuba nsadisi wu Dingumba Dintadilanga Matedi Kisalu.

Yaya Winder wuyonzukila ku Murrieta, California, E.U.A. Matata mandi banyonzula mu kiedika ayi nandi wubotama mu kilumbu 29 Ngonda Yintatu mvu 1986. Mu ngonda yilanda nandi wubaka makani ma kuba nsadisi wu mintuami ntuala. Nandi wuzola beni mawu ayi wubaka makani ma kutatamana. Bo kaviokisa zingonda ziwombu mu kisalu akiokio, nandi wuyiza ba ntuami ntuala mu kilumbu ki 1 Ngonda Yikumi mvu 1986.

Yaya Winder bo kaba muana ditoku, wuyenda kuetala zikhomba ziandi ziwadi, baba sadilanga ku Beteli mu thangu beni. Mawu mambuela phuila yi kuwesa nkanda muingi kusadila ku Beteli, na kuba phunga yifuana. Mu ngonda Yintanu mvu 1990, bantumisa muingi kesadila ku Beteli yi Wallkill.

Ku Beteli, yaya Winder wusala mu mangumba mawombu dedi Dingumba Dindiodisanga. Wuvanga kisalu ki kudiodisa tsola ayi Escritório yi Beteli. Nandi wukuela nkanzi’andi Angela, mu mvu 1997 ayi va kimueka, bansadilanga kubeteli nati bubu. Mu mvu 2014 bamfila ku Beteli yi Warwick, ko katambudila kiyeku ki kubuela mioku kisalu ki kutunga kikulutu kitu kiaba vangama kuna. Mu mvu 2016, bawu bayenda kue zingila ku Centro Educacional de Patterson, ko yaya Winder kaba sadilanga mu dingumba di Audio/Video. Bo vavioka mimvu minna, bamvutula ku Warwick ayi wutambula kiyeku ki kusala ku Escritório ki Dingumba dintadilanga matedi zikhomba bake mu kisalu ki thangu ka thangu. Mu ngonda Yintatu mu mvu 2022 nandi wutambula kiyeku ki kuba nsadisi wu Dingumba Dintadilanga Matedi zikhomba bake mu kisalu ki thangu ka thangu.

Tunsambilanga beni kuidi Yave muingi kasakumuna “makaba amomo ma batu,” bo bantatamananga kusala muingi kunata ntuala, kisalu ki Kintinu.—Efe. 4:8.