MU LUMBU kintatu ki 18 janvier 2023, tsangu mosi yimboti yibima mu jw.org; yo yituba ti bame bieka khomba Gage Fleegle ayi Jeffrey Winder mu kimvuka kintuadisi ki Bambangi zi Yehova. Bakhomba beni baba buadi basadila Yehova mu kuikama koso mu mimvu miwombo.

Khomba Fleegle wuyonzukila mu kiedika kuidi bambuta ziandi ku westi yi Pennsylvanie, ku Etats-unis. Mu thangu kaba muana lezi, dikanda diandi diye buela mioko ku buala bumosi bufioti bo buba phuila yi minsamuni. Mua ndambu thangu yivioka, wuyiza baka mbotama mu lumbu ki 20 novembre 1988.

Bambuta zi khomba Fleegle beba kunkindisanga thangu zioso kasala kisalu ki thangu ka thangu. Khumbu ziwombo bambuta ziandi beba yambanga ku nzo’awu minkengi mi zunga ayi bakhomba bo beta sala ku Beteli, ayi khomba Fleegle wube monanga bue babela mu zikhini. Niandi phe, fioti kuandi kumanima mabaka mbotama, wuyiza tona kisalu ki n’zibudi-nzila mu 1 septembre 1989. Kumanima ma mimvu miodi, wuyiza dukisa lukanu luandi lolo kakitudila mu thangu kaba 12 ki mimvu​—lukanu lusala ku Beteli. Mu octobre 1991, wutona sala ku Beteli yi Brooklyn.

Ku Beteli, khomba Fleegle wube salanga ku imprimerie va buangu kio beta vangila minkanda mu 8 ki mimvu, kumanima bantinda ku departema yi Kisalu. Mu thangu beni, wube kutakananga mu kimvuka ki mbembo yi Russe mu mua ndambu yi mimvu. Mu 2006, wuyiza kuela nketo’andi, Nadia, nio wuyiza sala yandi ku Beteli. Baba buadi ba batinda bakutakananga mu kimvuka ki mbembo yi Portugais ayi mu mimvu 10 mio milandakana, bayenda mu kimvuka kimbembo yi Espagnol. Kumanima masala mimvu miwombo mu departema yi Kisalu, batinda khomba Fleegle ku bilu yi komite yi Malongi ayi kumanima ku bilu ki komite yi Kisalu. Mu mars 2022, bam’bieka sadi mu komite yi Kisalu yi kimvuka kintuadisi.

 Khomba Winder wuyonzukila ku Murrieta, ku Calfonie, ku Etats-unis. Wuzaba kiedika mu nzila bambuta ziandi, ayi wuyiza baka mbotama mu lumbu ki 29 mars 1986. Mu ngondi yo yilandakana, wubaka nzengolo yisala kisalu ki n’zibudi-nzila wunsadisi. Wuzola kuwombo kisalu beni ayi wutia tatamana ba n’zibudi-nzila. Kumanima masala zingondi ziwombo kisalu ki n’zibudi-nzila wu nsadisi, wuyiza tona kisalu ki n’zibudi-nzila wu thangu ka thangu mu lumbu ki 1 octobre 1986.

Thangu kaba ntueni, wuyenda tala bakhomba ziandi buadi bo baba bakulutu bandi babe salanga ku Beteli mu thangu beni. Viziti beni yimvana phuila yi wesa phe formilere muingi keba sala ku Beteli mu thangu kela yonzuka. Mu mai 1990, bantela muingi kasala ku Beteli yi Wallkill.

Ku Beteli, khomba Winder wusala mu zidepartema ziwombo, mu kifuani ku departema yi tula Bukhete, ku departema yi tadila Sunga bibulu ayi tsola yi Beteli, ayi ku bilu ki Beteli. Mu 1997, wuyiza kuela nketo’andi Angela, ayi wutatamana sala yandi ku Beteli tii mu bilumbu biabi. Mu 2014, ba batinda ku Warwick, kuawu khomba Winder kabuedila mioko mu kisalu ki thungulu ki Bilu kinneni ki khubukulu’eto. Mu 2016, ba batinda diaka kubuangu ki malongi ki Watchtower ku Patterson, kuawu khomba Winder kasala mu departema yi Audio/​Video. Kumanima ma mimvu miya, baba vutula diaka ku Warwick, ayi khomba Winder bantinda kasala ku bilu ki komite kio kieta Tadila bakhomba zi Beteli. Mu mars 2022, bam’bieka sadi mu komite yo yeta tadila bakhomba zi Beteli yi kisalu ki kimvuka kintuadisi.

Tulembo sambila Yehova muingi kasakumuna ‘‘makaba [mama] ma batu’’ muingi batatamana sala ngolo mu diambu di mamboti ma Kipfumu.​—Efe. 4:8.