RAGO BIATA, Ngi 18, 2023, bawene tingidapai adu rogo jw.org, nga gu naape gupai nga i ima sia Wiriba Gage Fleegle na Jeffrey Winder tipa i nimangisunge rogo Riigbu Bipasunge nga ga ADezire Yekova. Agi awirina ue re dunduko aima digo ni mangisunge fu Yekova ni ruruyo tipa gbanga regbo.

Wiriba Fleegle asono western Pennsylvania yo Amerika yo, na avunguko asonosi ko kina rogo rengo yo. Ho ko adu ni ni paranga gude, gako aborokporo aga ku rogo tooni wiri gbaria nga gu naadu na bakere zingo rogoho. Ngbutuko fuo gure, ko azi bapatiza rogo Ngbangba 20, 1988.

Avungu Wiriba Fleegle anaangarasa ko ti aregbo dunduko tipa ko rimi sunge Kindo ti aregbo dunduko. Dedede, i anaadia ababi adungurati na aboro Betere ku kpuyo yo, na Wiriba Fleegle aima rengba ka bi wai agi awirina re anidu na ngbarago. Tingbafuo ko zi bapatiza, fuoho aturongo te ko ki tona ka mangasunge abazakigene​—rogo Mbirinvuo 1, 1989. Fuo agarã ue kusa, ko ada ti gu gako sásá ko amoihe ho garãko adu ni 12​—gu sásá nga ga mangasunge Betere yo. Ko atona mangasunge rogo gu Betere naadu Brooklyn yo rogo Tanvuo 1991.

Betere yo, Wiriba Fleegle amangisunge ba Gbingbida awaraga yo tipa agarã muambe, tingbafuo gure, ko atona mangasunge rogo gu Rondo Nga ga Sunge Tungusapai. Ti gu regbo re, ko amangisunge rogo gu dungurati nape pa aboro Russia tipa bete agarã. Rogo 2006 ko adi diako nga Nadia, na ri atona mangasunge wa sa na ko Betere yo. I ima mangasunge wa sa rogo gu dungurati nape pa aboro Portugal, na tipa agarã naima susa bawe rogo gu dungurati nape pa aboro Sepania. Tingbafuo Wiriba Fleegel mangisunge tipa dungu agarã rogo gu Gbuu Nga ga Sunge Tungusapai, i afu sunge fuko rogo Gu Rondo Nga ga Yugopai na kusa, ku rogo Rondo Sunge Tungusapai. Rogo Marungu 2022, i asiako ni  moundo kurogo Rondo Tungusapai nga ga Riigbu Bipasunge.

I asonosi Wiriba Winder Murrieta, California yo Amerika yo. Avunguko asonosi ko rogo rengo yo, na ko azi bapatiza rogo Marungu 29, 1986. Gu diwi nangbefuo gure, ko adiberã ka mangasunge moundo abazakigene. Ko agbia ngbarago ti ni ni bakerehe na ko adu na nyemu kaa ndu na ni kindi kumbatayo. Tingbafuo mangako sunge tungusapai nimoundo abazakigene, ko atona sunge abazakigene rogo Tanvuo 1, 1986.

Ho ko adu ni ni paranga gude, Wiriba Winder andu ka bi aunvurako nga aguyo naamangasunge Betere yo ti gu regbo re. Gu nunguro re asako ko du na nyemupai ka mangasunge Betere yo ho ko nika sona ni. Na rogo Merekoko 1990, i ayambuko ko mangisunge rogo gu Betere du Wallkill yo.

Ho Wiriba Winder ada ni Betere yo, ko amangisunge rogo dungu abasunge, kodihe na Basunge Nga ga Girisorago, Basunge Nga ga Ati, na Gu Basunge Nangerafuo Aboro Betere. Ko adi diako nga Angela, rogo 1997, natona ti gu regbo re, i naamangasunge Betere yo da ku awere. Rogo 2014, i akedi yo ku Warwick yo, yo Wiriba Winder aundo ni na sunge me rii-basunge nga ga zegino. Rogo 2016, i andu na yo ku Bawirikapai Nga ga Riigbu du Patterson yo, yo Wiriba Winder aamangasunge ni rogo gu Basunge du Tipa De Woro Afugo na Avidio. Agarã biama kusa, i akaragatiyo berewe ku Warwick yo, na Wiriba Winder aamangasunge na Gu Rondo Nabipa Aborosunge. Rogo Marungu 2022 i asiako ni moundo fu Gu Rondo Nabipa Aborosunge rogo Riigbu Bipasunge.

Ani nakpara nga Yekova funga maku afu kpaima fu agu akumba nga ‘gamahe fu aboro’ wa i andu kumbatayo kaa mangasunge nyanyaki tipa gu nyemupai nga ga Kindo.​—Ef. 4:8.