ABaibul phọ akaạph ni agananamhi mọ aZihova katue ni akaạph idị kemite ghisigh obobọ ilọ aghisigh phọ. (Isa. 45:21) Kuolọ o/ghaạph kanhị-kalhe ilọ ipẹ odị raḍighi ghan bọ iduọn phọ obobọ mem mọ obobọ raraạr dị odị kasopha olhegheri ilọ aghisigh phọ. Esi iduọn phọ, yira ko/kạr otue okaạph oomo idị egbolhomaam iphẹn phọ. Toroboiperolbọ, ooḅeghiọn iniin araraạr dị yira olhegheri.

AZihova katue ni aḍighi torobọ iyaạr dị odị rawạ, kuolọ eeni amem, odị rasopha ghan ni m’onọ ka/ḍighi iniin araraạr. Dị eego esi osụ olhoghi phọ odị u/moọgh bọ eekunha, odị katue ni akaạph torobọ iyaạr dị odị rawạ memite. (Rom. 11:33) Kuolọ loor esi iduọn odị katue bọ apamaghạn loor odị eten dị emhunhughan, odị katue kẹn asopha m’onọ ka/legheri idị kemitẹ ghisigh.—Poghom Isaiah 42:14.

AZihova r’aloor kụ ramunhenhi ghan ogbi phọ odị. Ika kụ idị ipẹ phọ egbolhomaam iikpọ phọ odị olhegheri ilọ kemitẹ ghisigh? Isaiah 46:10 engọ ni ophagharanhaạn phọ, eḅẹm mọ: “Kꞌemiighom mọ mị umhiịn ni iphẹn emite bọ; kꞌaḍiodi mị uḅẹm ni iphẹn memite bọ. Mị uḅẹm mọ igbiighi amhị ke/piọm ghan, mọ mị kaḍighi ni torobọ iyaạr lọ mị agbiighi oḍighi.”

Eniin ephigh phọ aZihova katue bọ ni akaạph ilọ aghisigh phọ pọ, odị amoọgh iikpọ okọm idị araraạr kemite. Orue olhegheri idị kemite iḍue, aZihova ra/ḅiilha ghan esi kaphogh ipẹ kemite bọ ghisigh kụ agbi nuụn olhegheri ipẹ kemite bọ, dị eḅilhẹ eghịgh mudị modẹ raraạr ilọ esi r’esi ipẹ kemite bọ. AZihova ra/ḍighi ghan ipẹ awe dị ropogh fim obobọ robạl ḍinyạ roḍighi ghan bọ. Oye dị rapogh fim obobọ rabạl ḍinyạ atue ni apogh epẹ eekunha afim mọ obobọ aḍinyạ phọ odị rabạl bọ olhegheri ipẹ kemite bọ epẹ eekunha phọ. Kparipẹ ghụn, aZihova katue ni asopha mem dị epeerị iyaạr kemite, kụ mem dị eteẹny mem mọ kụ odị akọm idị ketuụgh bịn emite.—Ex. 9:5, 6; Mat. 24:36; Iiḍ. 17:31.

Loor iphẹn phọ, aBaibul phọ rasighẹ ghan kaḍighinhom ekpo onhụ phọ “igbiighi” mem dị rekaạph idị aZihova kaḍighi ghisigh. (2 Ki. 19:25; Isa. 46:11) Ugbạ ekpo onhụ phọ ephẹn phọ esi ekpo onhụ aHibru dị remạ ghan “oḅolhọm oko.” (Jer. 18:4) Idiphọ oḅolhọm oko dị asilor katue bọ ni asighẹ aḅạy alemọm omạ oko, aZihova katue ni alẹm, obobọ aaḅenhion, raraạr obọ odị amhunhenhi ogbi phọ odị.—Efẹ. 1:11.

AZihova rangọ ghan eereẹgh we oḍighi ilọ eḅeraạn bidị. Odị o/gẹ oseere idị kemitenhaan torobọ oye. Odị kẹn ra/ḍighi ghan idị awe iiḅi arokpom koḍighi iyaạr dị ketorori engọ muphe. Odị rangọ ghan ogẹl torobọ oye osaḅạr okol aghuḍum dị odị kadạph, kuolọ odị ruroma ghan ni iyira osaḅạr opọ anhighẹ bọ.

Ooḅeghiọn iyạl areḍeenhaan dị eegholhomhi iphẹn phọ. Eḅẹl eḍeenhaan phọ pọ awe phọ aNineveh. AZihova aḅẹm mọ onọ kapiemhi egbogh emhạ phọ aNineveh loor ikarạph iḍighinhom araraạr phọ abidị. Kuolọ mem mọ awe aNineveh okiton bọ, aZihova “anme olhoghi odị, kụ bidị o/lhiọm mun idiphọ odị aḅẹm bọ oḍighi phọ.” (Jonah 3:1-10) AZihova anme ni olhoghi loor iduọn awe phọ aNineveh oḍighinhom bọ agey eereẹgh phọ abidị, esi onhaghanhạn adom ooruẹn phọ aZihova bịn okiton.

Omhunhenhiom iyạl eḍeenhaan pọ odaạm mọ aPersia Cyrus. AZihova aghaạph mọ odị kụ katagharạn buọ aJu phọ orọl bọ dọl arebenhẹ kụ aḅilhẹ atọ molhọgh otu iiḅereghị phọ aZihova. (Isa. 44:26–45:4) Uw-emhạ phọ Cyrus opọ aPersia aḍighi ni iphẹn phọ. (Ezra 1:1-4) Toroboiperolbọ, aCyrus oo/ḅereghị aZihova. Kuolọ aZihova asighẹ ni Cyrus aḍighinhom omhunhenhi imiịn phọ odị. Odị o/kpaariọm Cyrus ooḅereghị odị, angọ nyodị eereẹgh osopha ooḅereghị Enhaạn dị eḅeraạn nyodị.—Prov. 21:1.

Igey phọ pọ, iphẹn phọ iyạl ikpo iniin araraạr dị aZihova ralọgh ghan elhegh mem dị odị rasopha ilọ araraạr dị odị rawạ olhegheri ilọ aghisigh phọ. Okạr oghaạph, oye o/lho dị kakạr atue anaghanhạn oomo iitughiạn r’araraạr dị aZihova rawạ oḍighi. (Isa. 55:8, 9) Toroboiperolbọ, ipẹ aZihova magananamhi bọ uḍeenhaan iyira ekparamhị ni omheeraam mọ ayira mọ odị ra/bilhẹ ghan oḍighi ipẹ enhighẹ bọ, ghalhamọ r’amem dị odị aghaạph ilọ aghisigh phọ.