Baiblo ɔ tsɔɔ heii kaa Yehowa ngɛ nyɛmi nɛ e kɛ ma nyɛ maa le nɔ́ nɛ maa ba hwɔɔ se. (Yes. 45:21) Se Baiblo ɔ tsɔɔ we bɔ nɛ Yehowa plɛɔ kɛ leɔ nɔ́ nɛ maa ba hwɔɔ se ɔ mi fitsofitso. Jehanɛ se hu ɔ, e tsɔɔ we be nɛ e kɛ peeɔ jã, aloo níhi nɛ e suɔ kaa e maa le ngɛ hwɔɔ se he. Enɛ ɔ he ɔ, wa be nyɛe maa le nɔ́ fɛɛ nɔ́ nɛ kɔɔ nyɛmi nɛ Yehowa ngɛ nɛ e kɛ tsɔɔ nɔ́ nɛ maa ba hwɔɔ se ɔ he. Se kɛ̃ ɔ, mo susu otihi nɛ nyɛɛ se ɔ he nɛ o hyɛ.

Yehowa ma nyɛ maa pee nɔ́ fɛɛ nɔ́ nɛ e suɔ, se be komɛ ɔ, e hlaa kaa e be ní komɛ pee. Akɛnɛ e nile ɔ be nyagbe he je ɔ, e ma nyɛ ma de nɔ́ fɛɛ nɔ́ nɛ e suɔ kɛ kɔ hwɔɔ se he. (Rom. 11:33) Jehanɛ hu ɔ, akɛnɛ Yehowa ye mluku nɛ e ma nyɛ maa ye e he nɔ kɛ pi si he je ɔ, e ma nyɛ maa hla kaa e be nɔ́ ko nɛ maa ba hwɔɔ se ɔ lee.—Kɛ to Yesaya 42:14 ɔ he.

Yehowa haa nɛ e yi mi tomi baa mi. Mɛni blɔ nɔ nɛ oti nɛ ɔ yeɔ bua wɔ nɛ wa nuɔ sisi kaa Yehowa ngɛ nyɛmi nɛ e kɛ maa le nɔ́ nɛ maa ba hwɔɔ se ɔ? Yesaya 46:10 de ke: “Níhi tsuo nɛ maa ba hwɔɔ se ɔ, imi ji nɔ nɛ gba kɛ to kɛ je blema lokoo, níhi nɛ na we nɛ a ba lolo ɔ hu, imi lɛ i gba kɛ to. I de ke ye yi mi tomi maa ba mi, nɛ nɔ́ tsuaa nɔ́ nɛ i suɔ ɔ, lɔ ɔ ma pee.”

Yi mi tomi kake he je nɛ Yehowa ma nyɛ maa tsɔɔ nɔ́ nɛ maa ba hwɔɔ se ɔ ji kaa e ngɛ he wami nɛ e kɛ ma nyɛ ma ha nɛ níhi nɛ a ba mi. Bɔ komɛ ɔ, ke wa ngɛ sini hyɛe ɔ, wa tuɔ sisije ɔ nɛ wa ya hyɛɛ nyagbe ɔ konɛ waa le bɔ nɛ níhi maa ba nyagbe ha. Se ngɛ Yehowa blɔ fa mi lɛɛ, e he hia we nɛ e na nɔ́ nɛ maa ba hwɔɔ se kɛ sɛ hlami kaa bɔ nɛ wa peeɔ ke wa ngɛ sini hyɛe ɔ. Mohu ɔ, Yehowa ma nyɛ maa to e yi mi kaa e ma ha nɛ nɔ́ ko nɛ ya nɔ ngɛ be pɔtɛɛ ko mi, nɛ e ma ha nɛ jamɛ a nɔ́ ɔ maa ba mi jã pɛpɛɛpɛ ke be ɔ su.—2 Mose 9:​5, 6; Mat. 24:36; Níts. 17:31.

Enɛ ɔ he je ɔ, Baiblo ɔ ngɔ munyu komɛ kaa ‘i dla kɛ to,’ kɛ “i to nɛ ma pee” ɔ kɛ tsu ní kɛ tsɔɔ nɔ́ nɛ Yehowa peeɔ ngɛ ní komɛ nɛ maa ya nɔ hwɔɔ se ɔ a he. (2 Ma. 19:25; Yes. 46:11) A tsɔɔ munyu nɛ ɔmɛ a sisi kɛ je Hebri gbi ɔ mi, nɛ e kɛ munyu nɛ ji “buɛ puɛlɔ” ɔ ngɛ tsakpa. (Yer. 18:4) Kaa bɔ nɛ buɛ puɛlɔ nɛ e he be ɔ ngɔɔ zu kɛ puɛɔ buɛ nɛ ngɛ fɛu saminya a, jã kɛ̃ nɛ Yehowa hu ma nyɛ maa pee níhi nɛ ma ha nɛ e yi mi tomi nɛ ba mi.—Efe. 1:11.

Yehowa ha wɔ he blɔ konɛ wɔ nitsɛmɛ waa mwɔ wa yi mi kpɔ. Yehowa tui bɔ nɛ níhi maa ya nɔ ha ngɛ nɔ ko si himi mi ɔ he blɔ nya kɛ fɔɛ si. Jehanɛ se hu ɔ, e ha we nɛ tsui kpakpatsɛmɛ nɛ a pee nɔ́ ko nɛ hí konɛ a hɛ mi nɛ kpata. Yehowa ngmɛ nɔ fɛɛ nɔ blɔ konɛ e hla bɔ nɛ e maa ba e je mi ha, se e woɔ wɔ he wami kaa waa pee nɔ́ nɛ da.

Mo susu nɔ hyɛmi ní enyɔ nɛ ɔmɛ a he nɛ o hyɛ. Kekleekle nɔ́ ɔ kɔɔ Nineve bi ɔmɛ a he. Yehowa de kaa e ma kpata a hɛ mi ngɛ yi wu tso ní nɛ a ngɛ pee ɔ he je. Se benɛ ma bi ɔmɛ tsake a tsui ɔ, Yehowa “kpale e nya se, nɛ yi mi nɛ e to kaa e ma kpata ma a hɛ mi ɔ, e pee we jã hu.” (Yona 3:​1-10) Akɛnɛ Nineve bi ɔmɛ ngɔ he blɔ nɛ a ngɛ kaa a hlaa nɔ́ nɛ a suɔ ɔ kɛ tsu ní, nɛ a pee tsakemi benɛ a bɔ mɛ kɔkɔ ɔ se he je ɔ, Yehowa hu tsake e juɛmi nɛ e kpataa we ma a hɛ mi kaa bɔ nɛ e to ɔ.

Nɔ hyɛmi nɔ́ enyɔne ɔ ji gbami ko. Gbami nɛ ɔ tsɔɔ kaa Sirus maa ye Babilon nɔ kunimi, nɛ e ma kpɔ̃ Yuda bi ɔmɛ kɛ je nyɔguɛ tso mi, nɛ e ma ha nɛ a ya ma Yehowa sɔlemi we ɔ ekohu ngɛ Yerusalem. (Yes. 44:26–45:4) Persia Matsɛ Sirus ha nɛ gbami nɛ ɔ ba mi. (Ezra 1:​1-4) Se kɛ̃ ɔ, Sirus sɔmɔ we anɔkuale Mawu ɔ. Yehowa gu Sirus nɔ kɛ ha nɛ gbami nɛ ɔ ba mi, se kɛ̃ ɔ, e nyɛ we e nɔ kaa e sɔmɔ lɛ.—Abɛ 21:1.

Ngɛ anɔkuale mi ɔ, ní nɛ ɔmɛ ji ní bɔɔ komɛ nɛ Yehowa susuɔ he loko e tsɔɔ nɔ́ nɛ maa ba hwɔɔ se. E ngɛ heii kaa nɔ ko nɔ ko be nyɛe maa nu bɔ nɛ Yehowa susuɔ nɔ́ he ha, kɛ bɔ nɛ e peeɔ e ní ha a sisi kɛ pi si. (Yes. 55:​8, 9) Se níhi nɛ wa le ngɛ Yehowa he ɔ woɔ wa hemi kɛ yemi ɔ mi he wami, ejakaa wa le kaa e maa pee nɔ́ nɛ da be fɛɛ be, nɛ níhi e deɔ kaa a maa ba hwɔɔ se ɔ hu piɛɛ he.