Агару Бичикте айдылганыла, Иегова келер ӧйдӧ не болорын айдып берер аргалу (Иса. 45:21). Је ондо Иегова бу аргазын качан, канайып тузаланып турганы керегинде чокум айдылбай јат. Анайда ок ондо Иегова келер ӧйдӧҥ нени билип аларга турганы керегинде база айдылбай јат. Оныҥ учун бис Иегованыҥ бу аргазы керегинде јазап билбезис. Је кезик немени билерис.

Иегова ӱзе немени эдип ийер аргалу, је кезикте андый аргазын тузаланбай јат. Кудай сӱреен ойгор. Анайда ок ол келер ӧйдӧ не болоры керегинде озодоҥ ӱзе айдып берер аргалу (Рим. 11:33). Бого коштой ол бойын сӱреен јакшы тудунып билер. Оныҥ да учун Кудай кезик немелерди озодоҥ кӧрбӧй јат. (Исайя 42:14 тӱҥдештиригер.)

Иегова бойыныҥ табын бӱдӱрип салат. Бу сӧстӧр Иегованыҥ озолондыра кӧрӧтӧн аргазыла кандый колбулу болот? Исайя 46:10-до мынайып айдылат: «Учында не болорын бажынаҥ ла ала айдадым, бӱткелек сӧстӧрди јебрен ӧйлӧрдӧҥ бери айдадым. Мениҥ амадуум бӱдӱп калар, бойымныҥ табымды бӱдӱрип саларым».

Иегова нениҥ учун келер ӧйдӧ не болорын озодоҥ айдып берер аргалу? Шылтактардыҥ бирӱзи, ондо бойыныҥ амадузын бӱдӱрип салатан ийде-кӱчи бар. Темдектезе, бис кандый бир киноны кӧрӱп јадала, учында не болорын билерге турзаас, оны учына јетире толгоп ийедис. Иегова учында не болорын билип ийерге анайып этпей јат. Ол нени, качан эдерге турганын озодоҥ шӱӱп сананып салат. Оноҥ, ӧйи једип келзе, айалгаларды келиштирип, амадузын бӱдӱрип койот (Чыг. 9:5, 6; Матф. 24:36; Ап. ижи 17:31).

Оныҥ учун Агару Бичиктеги Иегованыҥ келер ӧйгӧ амадузын кӧргӱзерге, эмдиги ӧйдиҥ кӧчӱрмелеринде мындый сӧстӧр тузаланылат: «шӱӱп алган», «сананып алган», «белетеп алдым» (2 Каан. 19:25; Иса. 46:11; Иер. 18:11). Оригиналда бу сӧстӧрдиҥ учуры «гончар» деген сӧстиҥ учурына тӱҥей (Иер. 18:3, 4). Канайып гончар той балкашты келиштире тудуп, јараш айак эдип салат, анайып ла Иегова айалгаларды келиштирип, бойыныҥ амадузын бӱдӱрип койот (Эф. 1:11).

Иегова кажы ла кижиниҥ кӧрӱмин тооп јат. Ол кажы ла кижиге салым салбаган. Улусты јакшы керектер этсин деп албадабай да јат, ӧлӱмге апаратан јолго ийде салбай да јат. Иегова кажы ла кижиге кандый јол талдайтанын бойы кӧрзин деп арга берет. Је ол бу ла ок ӧйдӧ улусты чын јӱрзин деп кӱӱнзеп јат.

Эки учурал кӧрӱп ийектер. Баштапкызы, Ниневияныҥ улузы коркышту кӧп јаман керектер эдип турарда, Иегова олорго бу каланы јоголтып саларга турганын озодоҥ айдып салган. Је бу улус јастыразын алынарда, Кудай «бойыныҥ санаазын солып, олорды јоголторго айткан сӧзин бӱдӱрбеди» (Иона 3:1—10). Анайып, Иегова јастыразын алынган улусты кату каруузына тургуспаган.

Экинчи учурал: Кир деп атту јуучыл керегинде судур. Агару Бичикте айдылганыла, ол еврейлерди олјоноҥ јайымдаар ла Иерусалимде Иегованыҥ ӧргӧӧзин орныктырзын деп јакару чыгарар (Иса. 44:26—45:4). Бу судурды Персияныҥ кааны, Кир, бӱдӱрип салды (Езд. 1:1—4). Је ол чындык Иегова Кудайга бажырбаган да болзо, Кудай оны тузаланып, бойыныҥ судурын бӱдӱрип салды (Укаа 21:1). Иегова Кирди бойыныҥ ишчизи болзын деп албадабаган.

Је бис келер ӧйгӧ Иегова судур айдып турза, нени ајаруга алып турганын ӱзе оҥдоп болбозыс. Агару Бичикте айдылганыла, бир де кижи Кудайдыҥ санааларын учына јетире оҥдоп болбос (Иса. 55:8, 9). Је андый да болзо, бӱдӱп калган судурлар, Иегова келер ӧй керегинде судурлар айдып турза, качан да јастырбай јат деп, бӱдӱмјибисти тыҥыдат.