Biblia unyutho kamaleng’ nia Yehova utie ku copo mi ewo lembe mi nindo m’ubino. (Isa. 45:21) Ento enyutho ngo tap tap nia etime nenedi, awene, kadok kadhiri mi lembe m’emito eng’ey. Pieno wacopo ng’eyo ngo lembe ceke iwi copo pare mi ewo lembene. Re lembe moko ma wang’eyo ni e:

Yehova mbe ku macero mi timo gin moko ci, etimo ngo kende kende gin m’ebemito ngo. Ecopo tiyo ku rieko pare m’ajikine mbe pi niewo gin ceke m’emaru. (Rum. 11:33) Ento calu m’etie ku kweriri gijo ma pwe, etie ku copo mi cerere ning’eyo gin moko ma bitemere.—Nen lembe m’uyenyo rombo kude i Isaya 42:14.

Yehova ketho yeny pare utimere. Lembuno utie ku winjiri ma kani ku copo pare mi ewo lembe mi nindo m’ubino? I Isaya 46:10 eyero kumae: “[Aewo] kajik ugambre i thekri, man ugambre i nindo ma con gin ma fod’utimbre ngo; m’awacu kumae, Lembapora para bicungo, man abitimo gin m’amaru ceke.”

Pieno thelembe acel ma cwalu Yehova niewo lembe mir anyim utie nia etie ku copo mi ketho lembe utimere. Embe ku yeny mi lar neno ajiki mi lembe moko pi ning’eyo kite m’ebithum ko, kara kud ubed ve nia lembe ceke mi nindo m’ubino ular utimere i ayi moko man elar enenogi i wang’e bor. Ento, Yehova copo ng’iyo saa ma tap ma lembe moko bitimere i iye, man i ng’eye eketho etimere kinde ma saane romo.—Ai 9:5, 6; Mat. 24:36; Tic. 17:31.

Pi thelembe maeno re ma Biblia betiyo ku wec ma calu ‘niyiko,’ ‘niyubo,’ man ‘nikeco’ pi niweco iwi gin ma Yehova betimo pi lembe moko mi nindo m’ubino. (2 Ub. 19:25; kmt.; Isa. 46:11) Juloko wec maenogi kud i wec mi dhu Juebrania ma ceng’ini ku wec moko ma thelembene tie “jacwiagulu.” (Yer. 18:4) Tap calu ma jacwiagulu ma jabodho copo yiko agulu ma leng’ kud ulobo m’eng’wenyo, Yehova de copo yubo lembe ma ber mandha pi nipong’o lembakeca pare.—Efe. 1:11.

Yehova weko ng’atuman utim ng’iyong’ic en gire. Yehova lar pangu ngo kite ma kwo pa ng’atuman bibedo ko, kadi ecwalu ngo dhanu m’atira gitim lembe ma copo terogi i nyoth. Eweko dhanu ceke ging’ii yo migi gigi, re nwang’u en ebemito nia ging’ii yo m’atira.

Wakewec iwi lapor ario ma e: Mi kwong’o utie mi dhanu mi Nineve. Yehova ugam uewo nia ebinyotho adhura migi nikum timo ma reco m’unyay i iye. Ento kinde ma giloko cwinygi, en de “[eloko] cwinye kum gin ma rac m’ewacu ebitimo i kumgi; man etime ngo.” (Yon. 3:1-10) Ewilo paru pare i kum gin m’eewo, pilembe dhanu mi Nineve ging’iyo gin gigi niloko cwinygi nimakere ku rwonglembe pare mi cimowang’ ma giwinjo.

Lapor mir ario utie lembila m’uweco iwi jaramony moko ma nyinge Kuro. Biblia uyero nia ebigonyo Juyahudi kud i ng’eca man ebing’olo nia gidok gigier kendo hekalu pa Yehova. (Isa. 44:26–45:4) Ubimo Kuro mi Perse upong’o lembila maeno. (Ezr. 1:1-4) Ento etimo ngo ni Mungu mandha. Yehova utiyo kude pi nipong’o lembila, m’umbe nidiye nia eng’ii kokoro mandha nitimo ire.—Rie. 21:1.

I andha, eno utie lembe ma nok kende ma Yehova jengere i wigi kinde m’ebeewo lembe mir anyim. Poy nia ng’atu moko mbe ma copo nyang’ tap tap i yo pare. (Isa. 55:8, 9) Re gin m’enyutho iwa ubetielo yiyoyic mwa nia etimo kwa gin m’atira, eno ke kadok kinde m’ebeewo lembe mi nindo m’ubino.