Ihkalay ko Fangcalay Cudad somowal, iraay ko ˈicel ni Yihofa paliˈayaw mipairasol to noikoran. (Isaya 45:21) Kawra cowa pisahci ko Fangcalay Cudad mitadtad to kihcod a demakan, mahawpay to samaanay hano madangar Ningra, aihacowa Cingra mihaen to demak, ato mipiliˈay Cingra to papaliˈayaw to hakowa a demakan. Mankora cowa ka masahci kita cipinang to paliˈayaway mipairasol a ˈicel ni Yihofa. Nikawrira, ngangaˈay kita mikitini Fangcalay Cudad mafanaˈ tora ilaenoay a pina demak.

Ci Yihofa o malefotay ko ˈicel, ngaˈayay Cingra midemak to maamaan a demakan, kawra cowa ka haemin sa midemak Cingra. Caay ka citolas ko taneng ni Yihofa. Noikoran a maamaan a demak, ano sakafanaˈaw Cingra i, ngangaˈay paliˈayawen Ningra mipairasol. (Loma 11:33) Kawra iraay ko malefotay a miˈimeray a capeling Ningra, ngaˈayay Cingra mipiliˈ caka paliˈayaw mipairasol to mamafekad noikor ko maanan a demak.​​—⁠Nengnengen ko Isaya 42:⁠14.

O lalahcien ni Yihofa ko araaw Ningra. Iraay ko maanan a noka laliting nonini to paliˈayaway mipairasol a ˈicel Ningra hani? Isaya 46:10 sanay ko sowal: ‘Nai satapangan mapaliˈayawto Ako ko pahererekan no demak, naiti:yaho masowalayto ko noikoran a demak. Saan Kako pasowal: “O mamalaˈosi ko nisowalan Ako a demak, o lalahcien Ako ko kaolahan no Mako a demak.” ’

Sakangaˈay ni Yihofa paliˈayaw mipairasol to noikoran, o cecay lalangian i, iraay ko ˈicel Ningra milahci to maamaan a demakan. Ci Yihofa cowa ko hamami talaˈa:yawto a minengneng to maanan ko mamafekad noikor, cowa ka mahaen i maˈaraway no mita i ika, teloc saan tayra i salikor a hererekan. Soˈlinay haw i, ngangaˈay ci Yihofa misaˈosi to hahacowa tatokian mafekad ko maanan a demak, maraodto kora toki i, milahcianto Ningra kora demak.​​—⁠Kasadakan 9:​5, 6; Matay 24:36; Dmak 17:⁠31.

Mihaenay, tano “nipisahalaka” hananay no Fangcalay Cudad konini a tilid somowal to dadademaken ni Yihofa noikoran. (2 Hongti 19:25) O tatodong nonini a tilid milingatay to ‘misakorengay.’ (Yirimiya 18:⁠4) O cecay citanengay a misakorengay ngaˈayay doedoen ko miharatengan no niyah misaliyaliyaw misalof to ditaˈ, misangaˈ to makapahay a talid. Ngangaˈay ci Yihofa a miˈimer to kalingad no demak, palaˈosi to nipisahalakaan Ningra a araaw.​​—⁠Ifiso 1:​11.

Pafelian ni Yihofa ko tamdaw to pasalatay noka piharateng, toha ngangaˈay ko tamdaw mipiliˈ ko niyah. Cowa ka paliˈayaw Cingra misaˈosi to haˈorip no cecacecay a tamdaw, ao tamdaw ko mamipiliˈ tono niyahan a rarakaten a lalan no kaˈorip. Kawra, cowa ka olah Cingra malaˈafo ko tamdaw, mansa pasifanaˈay Cingra ato pakalalok to tamdaw mipiliˈ to matatodongay a lalan.

Nengnengen kora ilaenoay tosa tinakoan. Saka cecay o pakayniay to nolitengan a Ninifi tamdaw. Tada mariˈangay cangra, paliˈayaway ci Yihofa mipairasol to mamalaˈafo kora niyaroˈ nangra. Kawra, matengilto no Ninifi tamdaw ko saparikec a lihaf no Kawas i, pasasiyorayto ko falocoˈ nangra. Misaka dademakay cangra to pasalatay noka piharateng matatodongto ko pisaˈosi. Oranto i, ci Yihofa ‘mafalicay ko harateng, caayto ka tefaden Ningra ko nisowalan isaˈayaw a padiing i cangranan.’​​—⁠Yona 3:​1-​10.

Saka tosa tinakoan pakayniay ci Kirusan. Paliˈayaway a mipairasol ci Yihofa to aira ko cecay ci Kirus hananay a tamdaw mamilowid to kasakitakit, mitedal to maholiway a Yutaya tamdaw, halo palimoˈot papiliyaw patireng to fangcalay sefi ni Yihofa. (Isaya 44:⁠26–​45:⁠4) Hongti ci Kirus ko palaˈosiay tonini a sapairasol. (Icra 1:​1-4) Kawrira, cowa ko midokoay ci Yihofaan ci Kirus. Soˈlin misaka dademakan ni Yihofa ci Kirus milahci to paliˈayawan a mipairasol a demak, kawra pakonira hananay Ningra ci Kirus mipiliˈ to tataˈongen no niyah a kawas.​—⁠Taneng 21:⁠1.

Ano sakadademak ci Yihofa to paliˈayaway mipairasol a ˈicel i, misinanotayho Cingra to roma demak alatek. Soˈlinay haw i, awaay ko tamdaw mamasahci a cipinang to harateng ato waywayan ni Yihofa. (Isaya 55:​8, 9) Nikawrira, o nika fanaˈ ita ci Yihofaan ngaˈayayto pakasoˈlinen ita, sahtoay o matatodongay ko nidemakan Ningra, iraay ko ˈicel Ningra paliˈayaw a mipairasol to demak.