Kunatï jutïrin paskani uk Jehová Diosajj yatiwa sasaw Bibliajj qhanañchi (Is. 45:21). Kunjamsa uk luri, kunapachas uk luri jan ukajj qhawqsa mä kun yatiñ muni uk janiw Bibliajj sumpach qhanañchkiti. Ukhamajj kunanaktï Jehová Diosajj jutïritak arski ukanak janiw taqpach yatksnati. Ukampis mä qhawqhanak yatsnawa.

Jehová Diosajj kuntï munki ukwa luraspa, ukampis awisajj mä kun jan lurañwa amtaspa. Niyakejjay yatiñapajj jan tukuskirïchejja, taqe kuntï jutïrit yatiyañ munkaspa ukanak yatiyaspawa (Rom. 11:33). Ukampis Diosajj janiw munañapamp apnaqayaskaspati, ukhamajj kunatï paskani uk jan yatiñwa amtaspa (Isaías 42:14 liytʼarakïta).

Jehová Diosajj munañap phoqasiyiwa. Kunatï jutïrin paskani uk Diosan yatitap amuyañatakejj ¿kunjamsa uk yatiñajj yanaptʼistu? Isaías 46:10 textojj akham siwa: “Qalltatpachwa nayajj kunatï paskani uk yatiyjjta, nayra tiempotpachaw nayajj kunanakatï janïr luraski ukanakat yatiyjjta. Nayajj akham saraktwa: ‘Amtajajj phoqasikipuniniwa, kuntï nayajj munkta ukwa lurarakëjja’ sasa”.

Ukhamajj kunatï jutïrin paskani uk Jehová Diosajj yatispawa sasajj ¿kunatsa sissna? Mä razonajj akäspawa: mä kun phoqasiyañatakejj jupajj wali chʼamaniwa. Awisajja mä peliculajj kunarus tukuyi uk yatiñatakejj qhepakamaw jittʼaytanjja. Ukampis Jehová Diosampejj janiw ukhamäkiti, kunas jutïrin pasani uk janiw yatiñ necesitkiti. Jan ukasti Jehová Diosajj kunas mä fechan pasani ukwa amtaspa, ukat uka horasajj purinjjani ukhajj uka amtap phoqasiyarakispawa (Éx. 9:5, 6; Mat. 24:36; Hech. 17:31).

Kunanakatï jutïrin paskani uk uñachtʼayañatakejja, “wakichayätjja”, “nayaw amtta” sasaw Jehová Diosajj arsu (2 Rey. 19:25; Is. 46:11). Hebreo arunjja, uka versiculonakan uñstki uka arunakajj ‘sañunak luriri’ siski ukampejj niya pachpakiwa (Jer. 18:4). Kunjamtï mä sañu lurirejj ñeqʼet mä suma sañu lurkaspajja, ukhamarakiw Jehová Diosajj munañap phoqañatakejj kunanaks luraspa (Efes. 1:11).

Jehová Diosajj pachpa amtanakasar puriñaswa muni. Jupajj janiw sapa mayni jaqen destinop qellqawaykiti, janirakiw suma jaqenakarojj kunatï tukjatäñar apkaspa ukanak lurapjjañapatak obligkiti. Antisas kunjamsa sum jakassna ukwa Diosajj yatichistu, ukatsti sapa mayniruw kuns lurañäni uk amtañasatak jaytistu.

Pä sarnaqäwit amuytʼañäni. Nayraqatajj Nínive markankirinakat amuytʼañäni. Uka markan sinti jan walinakwa lurapjjäna, ukatwa Jehová Diosajj uka mark tukjañ amtäna. Ukampis “kuna castigtï cheqpach Diosajj jupanakjjar apaniñ arskäna ukjja janiw apanjjänti” (Jon. 3:1-10). Diosajj kuntï amtkäna uk mayjtʼayänwa. Kuna laykutejj Nínive markankirinakajj Diosan arunakapar istʼapjjänwa, arrepentisiñwa amtapjjarakïna.

Jichhajj Ciro reyit parlir profeciat amuytʼañäni. Jupaw judionakar salvañapäna, Jehová Diosan templop wasitat saytʼayapjjañapatakis ordenañapäna (Is. 44:26-45:4). Persia markan Ciro reyipajj uka profecía sum phoqäna (Esd. 1:1-4). Ukampis jupajj janiw cheqpach Diosar adorkänti. Cheqas Jehová Diosajj jupa toqew mä profecía phoqäna, ukampis janiw jupar serviñapatak obligkänti (Prov. 21:1).

Jehová Diosajj kunas jutïrin pasani uk janïr amtkasajj taqe ukanakatwa amuykiptʼi. Kunjamsa Jehová Diosajj amuyi kunsa luri uk jaqenakajj janiw sum amuyapkaspati, kunas jutïrin pasani uk amtañatakejj qhawqha chʼamanisa uksa janirakiw amuyapkaspati (Is. 55:8, 9). Ukhamäkchisa, kuntï Jehová Diosat yatktan ukajj taqe kuns cheqapar lurirïtapa, kuntï jutïrit amtki ukhas cheqapar amtirïtap amuyañatakiw yanaptʼistu.