Bibel i ñunda loñge loñge le Yéhôva a nla yelel i mam ma ga bôña dilo di nlo. (Yésaya 45:21) I ntoñol bé lelaa a mpam i boñ hala ni ngéda imbe a mboñ hala, to i mam a mpohol i yi. Jon to bés, di nyi bé mam momasôna inyu i ngap i Yéhôva i. Ndi di béñge ndék mam di nyi.

Yéhôva a gwé bé minwaa, ndik mi nyemede a ntééba. Kiki a gwé pék i i gwé bé nwaa, Yéhôva a nla yelel mam momasôna a ngwés. (Rôma 11:33) A nla gwel nyemede i nya i yôni, jon a nla pohol le a ngwés bé yi i yom y’a bôña i mbus ngéda.​—Hégha ni Yésaya 42:14.

Yéhôva a mboñ le sômbôl yé i yon. Mambe maada ma yé ipôla i jam li ni i ngap a gwé i yi mam ma ga bôña? Yésaya 46:10 a nkal le: “I ngéda jam li ngi yii i bibôdle, me ñañal lisuk jé; ibôdôl i ngéda kôba, me ñañal mam ma yé ngi bôña. Me nkal le: ‘Sômbôl yem y’a yon; me ga boñ mam momasôna ma nlémél me.’”

Jon njom yada i i ntinde Yéhôva i yelel bilôl i yé le, a gwé ngui i boñ le mam ma bôña. A gwé bé ngôñ i hégda lelaa mam m’a bôña lisuk kiki bés di yé di mboñ i ngéda di mbéñge loñge sinima tole i ngéda di ñañ ngim kaat. Maselna ni hala, Yéhôva a nla kit le ngim jam i ga bôña i ngéda sém tole kaa, a boñ ki le hala a bôña i ngéda ngeñ i nkola.​—Manyodi 9:​5, 6; Matéô 24:36; Minson mi baôma 17:31.

Inyu hala nyen Bibel i ngwélél bibuk kiki bo “kôôba,” “uñgus,” “hek pék” inyu pôdôl i mam Yéhôva a mboñ le ma yon dilo di nlo. (2 Bikiñe 19:25; buk isi lipep; Yésaya 46:11) Bibuk bi, bi nlôl ni buk i Lôk Héber yada i i nkobla le “mma dibee.” (Yérémia 18:4) Kiki mma dibee nu makeñge a nla gwélél téklima inyu yilha yo hibee hi hi nlôôha hilam, hala nyen Yéhôva a nla kena mam i nya i yé le ma yônôs sômbôl yé.​—Éfésô 1:11.

Yéhôva a nwas le hiki mut a yoñ mé makidik. A nkit bé i bisu bi ngéda lelaa niñ i hiki mut y’a ba; ndi to nyégsa bôt ba miñem minlam i boñ mam ma ga kena bo i tjiba. A nti bôt bobasôna kunde i pohol ntén niñ ba ngwés bana, a niiga ki bo kii ba boñ inyu bana niñ ilam.

Di yoñ dihéga diba. Hihéga hi bisu hi yé bôt ba Ninivé. Yéhôva a bi legel i bisu bi ngéda le i tison i, i ga tjiba, inyule béba i bé nnayak mu. Ndi i bôt ba, ba bi tam béba yap kayéle Yéhôva “a héñha mahoñol, a lona ha bé kogse a bi kal le a nlona.” (Yôna 3:10) Yéhôva a bi héñha mahoñol inyu i jam a bi kal i bisu bi ngéda, inyule bôt ba Ninivé ba bi gwélél kunde yap i yoñ makidik inyu tam béba yap i ngéda ba bi nok mabéhna ma Yéhôva Yôna a bi legel bo.

Hihéga hi nyônôs iba hi yé mbañ i i bé pôdôl Kirus, nu a bé lama kobol Lôk Yuda minkôm, a ti ki bo oda le ba tiimba oñ témpel i Yéhôva. (Yésaya 44:26–45:4) Kirus, Kiñe i Persia nyen a bi yônôs i mbañ i. (Ésra 1:​1-4) Ndi Kirus a bé bé ngwélél Nyambe. Yéhôva a bi gwélél nye inyu yônôs mbañ yé, ndi a bi sôñga bé Kirus i gwélél kunde yé i pohol base yé.​—Bingéngén 21:1.

Maliga ma yé le di nla bé pôdôl mam momasôna ma ma ntihba ngap Yéhôva a gwé i yelel mam ma ga bôña dilo di nlo. A bak ki le, mut nye ki nye a nla bé nok manjel ma Yéhôva i nya i yôni. (Yésaya 55:​8, 9) Ndi i mam Yéhôva a nyelel ma nlédés i hémle di gwé le, i mam momasôna a mboñ ma yé loñge, yak i ngéda i mpam le a legel mam ma ga bôña dilo di nlo.