Biblu’n se kɛ Zoova kwla kle sa nga bé wá jú e ɲrun lɔ’n. (Eza. 45:21) Sanngɛ ɔ kanman wafa nga Zoova yo sɔ’n, annzɛ blɛ ng’ɔ yo sɔ’n, i su ndɛ tɛkɛtɛkɛ kwlaa. Ɔ maan e kwlá siman silɛ mɔ Zoova kwla si e ɲrun lɔ sa mun’n i su ndɛ’n kwlaa. Sanngɛ i su ndɛ wie’m be o lɛ’n, e si be.

Sɛ w’a yoman kɛ like nga Zoova bɔbɔ se kɛ ɔ yoman sa’n, ɔ kwla yo like kwlaa. Zoova i ngwlɛlɛ dan’n ti’n, e ɲrun lɔ sa kwlaa ng’ɔ klo kɛ ɔ́ sí i’n, ɔ kwla si i. (Rɔm. 11:33) Sanngɛ kɛ m’ɔ si i wun su nian dan’n ti’n, nán blɛ kwlaa nun yɛ ɔ kunndɛ kɛ ɔ́ sí e ɲrun lɔ sa nga bé wá jú’n mun-ɔn.​—⁠An nian Ezai 42:14 nun wie.

Zoova yo maan i klun sa’n kpɛn su. ?Wafa sɛ yɛ i sɔ liɛ’n kwla uka e naan y’a wun sa nga ti yɛ Zoova kwla si e ɲrun lɔ sa mun’n i wlɛ-ɔ? Ezai 46:10 se kɛ: “N dun mmua n bo sa ng’ɔ́ wá jú’n su lele naan w’a ju, kɛ ɔ fɛ i laa lele’n, n dun mmua n bo sa nga be nin-a juman’n be su. N se kɛ: ‘Like kwlaa nga n sunnzun’n ɔ́ kpɛ́n su, yɛ like kwlaa nga n klo kɛ ń yó’n, ń yó.’”

Like nga ti yɛ Zoova kwla kan sa nga bé wá jú’n be ndɛ’n, i wie yɛle kɛ i bɔbɔ kwla yo naan sa’m be ju. Wie liɛ’n, sɛ e waan é sí wafa nga flimun wie i bo’n gúa’n, ɔ fata kɛ e niɛn i bue kasiɛn’n. Sanngɛ Zoova liɛ’n, ɔ nunman nun kɛ ɔ yo kɛ ngalɛ’n sa naan w’a si sa nga bé wá jú e ɲrun lɔ’n. Ɔ kwla fa ajalɛ kɛ sa wie ju blɛ trele kun nun. Kpɛkun ɔ yo maan sa sɔ’n ju blɛ sɔ’n nun sakpasakpa.​—⁠Tul. 9:​5, 6; Mat. 24:36; Yol. 17:31.

I sɔ’n ti’n, kɛ Biblu’n kán sa wie mɔ Zoova wá yó be’n be ndɛ’n, ɔ se kɛ ɔ “siesieli” annzɛ ɔ “sunnzunnin.” (2 Fam. 19:​25, jnd.; Eza. 46:11) Ebre nun ndɛ mma nga be kacili i sɔ’n, ɔ fin ndɛ mma kun mɔ i bo’n yɛle kɛ “sɛ ufuɛ.” (Zer. 18:4) Sɛ ufuɛ ng’ɔ si i junman’n i di kpa’n, ɔ kwla fa ufa fa yo sɛ klanman kpa kun. I wafa kunngba’n, Zoova kwla siesie sa wie mun naan i klun sa’n kpɛn su.​—Efɛ. 1:11.

Zoova man sran’m be atin kɛ be fa be klunklo ajalɛ. Sa nga be ju sran kun su’n, Zoova w’a siesieman be laa. Ɔ suman sran kpa’m be bo kɛ be yo sa tɛ naan i sin’n w’a nunnun be. Ɔ man e atin kɛ e fa ajalɛ nga e klo’n. Sanngɛ ɔ kle e ajalɛ nga sɛ e fa-ɔ é ɲán su ye’n.

Maan e fa e ɲin e sie i sa nɲɔn su. Sa klikli’n yɛle Ninivufuɛ’m be su ndɛ’n. Ninivufuɛ’m be klunwi’n ti’n, Zoova seli kɛ ɔ́ wá núnnún be. Sanngɛ kɛ be kacili be nzuɛn’n, Zoova kusu “kacili akunndan. Ɔ maan sa kekle nga Ɲanmiɛn waan ɔ́ fá yí be su’n, w’a fa yiman be su kun.” (Zon. 3:​1-10) Like nga Zoova seli kɛ ɔ́ fá yó be’n w’a yomɛn i kun. Afin kɛ be tili Zoova i nuan ndɛ’n, be fali ajalɛ kɛ bé wlá be nzuɛn tɛ’n i ase.

Sa nɲɔn su’n yɛle Sirisi i su ndɛ nga Biblu’n kannin’n. Ɔ seli kɛ ɔ́ wá dé Zifu mun, kpɛkun ɔ́ sé be kɛ be ko kplan Zoova i sua’n i uflɛ. (Eza. 44:26–45:4) Ndɛ sɔ’n kpɛnnin su sakpasakpa. (Ɛsd. 1:​1-4) Sanngɛ Sirisi w’a suman Ɲanmiɛn. Zoova sinnin Sirisi i lika naan w’a yia ndɛ ng’ɔ kannin’n i nuan. Sanngɛ w’a miɛnmɛn i kɛ ɔ su i.​—Ɲan. 21:1.

Like nga Zoova bu i akunndan kwlaa naan w’a kan sa nga bé wá jú’n be ndɛ’n, nɛ́n i kwlaa yɛle nga e boli su lɛ’n. Klɔ sran fi kwlá wunman akunndan nga Zoova bu’n, ɔ nin like ng’ɔ yo’n i kwlaa i wlɛ. (Eza. 55:​8, 9) Sanngɛ Zoova i su ndɛ nga e si i’n ti’n, e lafi su kɛ sa ng’ɔ ti kpa’n, yɛ ɔ yo i titi-ɔ. Ɔ maan sɛ ɔ fa ajalɛ kɛ ɔ́ sí sa wie mɔ bé wá jú’n, e si kɛ ajalɛ kpa yɛ ɔ fali-ɔ.