E Baibol wa gi ima rẹn wẹẹ, e Jehova gha sẹtin ta emwi nọ khian sunu vbe odaro. (Aiz 45:21) Sokpan, ọ ma wa sunu yọ taara vbene Jehova ya ru ọna hẹ, ẹghẹ nọ ya ru ẹre ra emwi nọ hoo nọ rẹn vbekpa emwi nọ khian sunu vbe odaro. Rhunmwuda ọni, ma ma wa rẹn emwi hia vbekpa ẹmwẹ na. Ọrheyerriọ, gi ima guan kaẹn emwi eso ne ima rẹnrẹn.

A i miẹn emwi ne Jehova i sẹtin ru, sokpan a ma we ọ ma hoo nọ ru ẹre. Ẹwaẹn ọghe Jehova i mwẹ eke nọ sẹ, rhunmwuda ọni, emwi ke emwi nọ hoo nọ rẹn, te ọ rẹn ọnrẹn. (Rom 11:33) Sokpan, rhunmwuda na na miẹn wẹẹ, ọmwa nọ gba ẹre Jehova khin, vbọ gha de ọghe na dia egbe ọmwa, ọ gha vbe sẹtin kha wẹẹ, irẹn ma hoo ne irẹn rẹn emwi eso.—Yae tae Aizaia 42:14.

Emwi ke emwi ne Jehova hoo nọ ru, te ọ ru ẹre. De vbene ọna ya dekaẹn ẹtin ne Jehova mwẹ nọ ya ta emwi nọ khian sunu vbe odaro? Ebe Aizaia 46:10 khare wẹẹ: “Vbe omuhẹn, ẹre I na ta emwi nọ khian sunu, vbe ẹghẹ ne ọ kpẹẹ fua, I ta emwi nọ gha sunu yotọ nẹ. I khare wẹẹ, ‘Emwi ne I mwamwaẹn ne I ru, te ọ gba, te I ru emwi hia ni rrọọ mwẹ ekhọe ne I ru.’”

Rhunmwuda ọni, emwi ọkpa nọ si ẹre ne Jehova na sẹtin ta emwi nọ khian sunu vbe odaro, ọre rhunmwuda wẹẹ, ọ mwẹ ẹtin nọ ya ru emwi nọ rrọọ ẹre ekhọe. E Jehova i ya gha ghee emwi nọ khian sunu vbe odaro, vbene ima ne emwa nagbọn ya gha ghee ufomwẹ ọghe ikueta ra ufomwẹ ọghe ebe ne ima mieke na rẹn vbene okha nii ya fo hẹ. Nọghayayerriọ, e Jehova gha sẹtin ta ẹghẹ ne emwi khian ya sunu, ọ ghi vbe ru ẹre ne emwi nii sunu vbe ẹghẹ nọ mwamwa yọ gha sẹ.—Ẹks 9:​5, 6; Mat 24:36; Iwinna 17:31.

Ọna ẹre ọ si ẹre ne Baibol na loo ẹmwẹ na ighẹ “mwamwa,” vbọ ghaa guan kaẹn emwi eso ne Jehova khian ru vbe odaro. (2 Ọba 19:25; Aiz 46:11) Ẹmwẹ Hibru na ke zedu ẹmwẹ na, gha vbe gia loo ye ẹmwẹ na ighẹ “ọmakhe.” (Jer 18:4) Zẹvbe ne ọmakhe gha ya sẹtin ya obuẹ ma akhe ne mose mose, e Jehova gha vbe sẹtin ru ẹre ne emwi hia sunu vbene irẹn gualọe yi.—Ẹfis 1:11.

E Jehova i kpikpi emwa ru emwi, ọ kie ẹkpotọ yọ ne emwa hia ya zẹ ne egbe iran. E Jehova ma ta ẹre yotọ vbene ẹdagbọn edọmwadẹ emwa khian gha ye hẹ. Ẹ i vbe ya emwa esi ru emwi nọ rẹnrẹn wẹẹ, ọ gha miẹn iran uhunmwu. Ọ kie ẹkpotọ yọ ne edọmwadẹ emwa ya zẹ ne egbe iran, sokpan, ọ rhie igiọdu ne emwa ne iran zẹ odẹ nọ maan.

Gi ima guan kaẹn igiemwi eva. Nokaro ne ima khian guan kaẹn ọre Ivbi Nenivẹ. E Jehova keghi tae yotọ wẹẹ, irẹn gha guọghọ agbẹnvbo na, rhunmwuda uyinmwẹ dan ne iran ghaa yin. Sokpan vbe agbẹnvbo na ghi fi werriẹ, e Jehova keghi “fi ekhọe werriẹ, ọ ma ghi rri iran oya vbene ọ te wẹẹ irẹn gha ru.” (Jona 3:​1-10) E Jehova keghi fi ekhọe werriẹ, ọ ma ghi ru emwi nọ te we irẹn gha ru, rhunmwuda, Ivbi Nenivẹ keghi zẹ ne egbe iran wẹẹ, iran gha fi werriẹ rhunmwuda na na ya obọ sekhae ne iran.

Nogieva ne ima khian guan kaẹn ọre ẹmwẹ akhasẹ nọ dekaẹn e Sairọs, ne Jehova we ọ khian fan Ivbi e Ju vbe imu, ọ ghi vbe we na dọlegbe bọ ọgua Osa ọghe Jehova. (Aiz 44:26–45:4) Ọba e Sairọs ọghe Pẹsia keghi mu ẹmwẹ akhasẹ na sẹ. (Ẹzra 1:​1-4) Vbọrhirhighayehẹ, e Sairọs ma gha ga Osanobua. Sokpan, e Jehova keghi ya e Sairọs mu ẹmwẹ akhasẹ ọghẹe sẹ, vbene ọ ma na kpikpi e Sairọs nọ do gha ga irẹn, nọghayayerriọ, ọ keghi kie ẹkpotọ yọ nọ tobọre zẹ ne egbe ẹre, Osa nọ khian ga.—Itan 21:1.

Ọghe ne ẹmwata, ekherhe ma wa guan kaẹn na vbe uwu emwi eso ne Jehova ghee, vbe ọ ghaa ta emwi eso nọ khian sunu vbe odaro. Na gbe ọdẹn na ta ẹmwata, ọmwa rhọkpa i rrọọ nọ rẹn vbene Jehova ya roro emwi hẹ kevbe vbene ọ ya ru emwi hẹ. (Aiz 55:​8, 9) Sokpan, emwi hia ne Jehova he gi ima rẹn vbekpa ẹre, ya ima mwẹ ilẹkẹtin wẹẹ, ẹghẹ ọkpa i rrọọ nọ khian ya ru emwi nọ ma gba, uhiẹn vbe ọ gha ta emwi nọ khian sunu vbe odaro.