I bas Pustaka ituriken alu jelas maka banci teh Jahwe kai si terjadi bas masa depan. (Jes. 45:21) Tapi labo ijelasken Pustaka kerina kerna uga Jahwe meteh masa depan, ndigan igunakenNa kengasupenNa e, ntah pe uga buena ateNa itehNa sope sada hal terjadi. Emaka, labo siangka kel kerina kerna kengasupen Jahwe e. Tapi lit piga-piga hal si banci siangkai arah Pustaka.

Banci lakoken Jahwe kai pe, tapi mon-mon ipilihNa guna la ngelakokenca. Perban kepentaren Jahwe la erbatas, banci tehNa kai pe si ateNa itehNa. (Rom. 11:33) Tapi, perban banci kuasaiNa diriNa alu sempurna, banci ka pilihNa guna la meteh kai si nandangi terjadi.—Bandingken Jesaya 42:14.

Iban Jahwe peratenNa terjadi. Uga si e cocok ras kengasupenNa meteh masa depan? Bagenda nina Jesaya 46:10, “Tangtangna nari enggo Kukataken hasilna, mbarenda nari enggo Kukataken kai si lenga terjadi. NingKu, ‘RencanaKu pasti terjadi, kai pe sura-suraKu pasti Kulakoken.’”

Emaka, salah sada alasen engkai maka banci teh Jahwe kerna masa depan perban lit kuasaNa guna erban kai pe terjadi. Kalak si nonton film, mon-mon langsung nenna bagin akhir arah sada film guna meteh kedungenna. Tapi, Jahwe la perlu ngelakoken si bage guna meteh kai pagi si terjadi. La perlu nenNa ku masa depan, tempa-tempa masa depan e enggo lit janah banci iidah. Tapi banci putusken Jahwe sada hal terjadi bas waktu tertentu janah ibanNa si e tuhu-tuhu terjadi bas waktuna.—Kel. 9:5, 6; Mat. 24:36; Perb. 17:31.

E me sebapna bas Pustaka igunaken istilah-istilah ‘netapken,’ ‘ngaturken,’ ras ‘ngerencanaken,’ guna nggambarken kai si ilakoken Jahwe gelah piga-piga kejadin terjadi bas masa depan. (2 Raj. 19:25; cataten i teruh; Jes. 46:11) Bas bahasa aslina, istilah-istilah e lit hubungenna ras kata si ertina “tukang kudin taneh.” (Jer. 18:4) Bali bagi tukang kudin taneh si beluh, banci mbentuk taneh liat jadi barang si mejile, Jahwe pe banci ngelakoken erbage cara gelah peratenNa terjadi.—Ep. 1:11.

Pediat Jahwe kerina kalak bebas erban pilihen. Labo itentukenNa ntah ipadankenNa kegeluhen sekalak jelma. Labo ipaksaNa kalak si bujur ngelakoken kai si la mehuli si banci erban kalak e cilaka. IpediatNa kerina kalak erban keputusen bas geluhna, tapi iahkenNa kalak e erban pilihen si benar.

Cuba ukuri dua contoh enda. Si pertama, nubuatken Jahwe maka kota Niniwe nandangi ihancurken perban jahat kel pendudukna. Tapi bas pudi wari, “berubah pikiren Dibata kerna bencana si enggo katakenNa janah la surung banNa bencana e reh man kalak e.” (Jun. 3:1-10) Engkai? Perban kenca begi kalak Niniwe persinget arah Jahwe, nggit kalak e robah.

Si peduaken, inubuatken Jahwe maka lit pagi sekalak jelma si gelarna Kores si mbebasken kalak Jahudi arah tabanen janah mere perentah guna mbangun mulihi rumah pertoton Jahwe. (Jes. 44:26–45:4) Bas pudi wari, bage me si ilakoken Kores raja Persia si erban nubuat e terjadi. (Esa. 1:1-4) Tapi, Kores la nembah Jahwe. Amin pe bage igunaken Jahwe Kores erban nubuat e terjadi, tapi labo paksaNa Kores nembah Ia.—Kua. 21:1.

Selain si enggo sibahas bas artikel enda, pasti mbue denga si lit hubungenna ras kengasupen Jahwe meteh masa depan. Siteh maka labo lit jelma si banci tuhu-tuhu ngangkai kerina perukuren ras perbahanen Jahwe. (Jes. 55:8, 9) Tapi, kai si enggo kataken Jahwe man banta, banci erban kita reh tekna maka kai si ilakoken Jahwe lalap benar, termasuk caraNa nggunaken kengasupenNa meteh masa depan.