Di Baibl tel wi dat Jehoava ga di abiliti fi noa di fyoocha. (Isa. 45:21) Ih noh tel wi evriting bowt how ih yooz dis abiliti. Fi egzampl, ih noh tel wi how ih du it, wen ih du it, er eevn humoch ih chooz fi noa. Soh wi noh andastan aal weh Jehoava ku du ahn humoch a di fyoocha hihn noa. Bot dehn ga sertn tingz dat wi doo andastan.

Jehoava ku du eniting weh hihn waahn, bot sohntaim hihn chooz fi noh du sertn tingz. Jehoava wizdom noh ga no limit, soh hihn ku tel weh wahn hapm eena di fyoocha enitaim hihn waahn. (Roam. 11:33) Bot hihn ga perfek self-kanchroal, soh sohntaim hihn chooz noh fi noa weh wahn hapm eena di fyoocha.—Kompyaa Isaiah 42:14.

Jehoava mek tingz hapm how hihn waahn. Weh dat ga fi du wid fi hihn abiliti fi noa weh wahn hapm eena di fyoocha? Isaiah 46:10 tel wi: “Fahn di biginin Ai prafesai di tingz weh noh hapm yet, ahn fahn lang taim di tingz weh nobadi du yet. Ai seh, ‘Mai disizhan wahn stan, ahn Ai wahn du wateva Ai waahn du.ʼ”

Soh wan reezn wai Jehoava ku tel weh wahn hapm eena di fyoocha da bikaaz hihn ga di powa fi mek ih hapm. Jehoava da noh laik wee. Wen wee wach wahn moovi, wee haftu wach di hoal moovi fi noa how tingz wahn ton owt. Wen Jehoava tel di fyoocha, da noh laik wen wee di wach wahn moovi bikaaz hihn don noa how tingz wahn ton owt bifoa ih eevn hapm. If Jehoava disaid hihn waahn mek sohnting hapm ahn hihn noa wen ih waahn mek ih hapm, hihn ku mek ih hapm rait pahn taim.—Eks. 9:​5, 6; Mach. 24:36; Aks 17:31.

Dat da wai di Baibl seh tingz laik Jehoava “kom op wid” sohnting, “shayp” it, er “perpos” it. (2 Ki. 19:25; ftn.; Isa. 46:11) Wi yooz werdz laik dehndeh fi chranslayt di werd eena di orijinal langwij weh meenz “sohnbadi weh mek klay pat.” (Jer. 18:4) Jos laik how sohnbadi ku shayp sohnting byootiful owta wahn pees a klay, Jehoava ku shayp tingz, er moov dehn how hihn waahn, fi mek tingz hapm how hihn waahn.—Ifee. 1:11.

Jehoava rispek peepl rait fi chooz how dehn wahn liv dehn laif. Hihn noh disaid heda taim weh wahn hapm eena eech persn laif. Ahn hihn noh kaaz gud peepl fi du tingz weh wahn mek dehn en op di geh dischrai needa. Hihn mek evribadi disaid how dehn wahn liv dehn oan laif bot ih inkorij dehn fi mek di rait chois.

Mek wi luk pahn too egzampl a dat. Fers, tink bowt weh mi hapm tu di peepl weh mi liv da Niniveh. Jehoava mi prafesai dat da siti mi wahn geh dischrai sayka weh di peepl deh mi soh wikid. Bot wen dehndeh saym peepl mi ripent, Jehoava mi “disaid neva fi bring dischrokshan pahn dehn agen, an ih neva du it.” (Jonah 3:​1-10) Soh, Jehoava mi chaynj ih main bowt weh hihn mi prafesai bikaaz di peepl da Niniveh mi chooz fi lisn tu Jehoava waanin ahn chaynj dehn wayz.

Sekant, Jehoava mi prafesai dat wahn roola weh naym Sairos mi wahn set di Jooz free fahn Babilan ahn mek dehn goh bil bak Jehoava templ. (Isa. 44:26–45:4) King Sairos fahn Perzha mi du egzakli weh da prafesi mi seh ih wahn du. (Ezra 1:​1-4) Bot Sairos neva wership Jehoava. Stilyet, Jehoava mi aybl fi yooz Sairos fi du weh Hihn mi waahn widowt foas Sairos fi wership Ahn.—Prov. 21:1.

Af koars, dehnya da jos wahn fyoo tingz weh Jehoava mait kansida wen ih yooz ih abiliti fi seh weh wahn hapm eena di fyoocha. Reeli, non a wee kuda eva andastan evriting weh Jehoava du. (Isa. 55:​8, 9) Bot di tingz weh wi doo noa bowt Jehoava schrentn wi fayt dat hihn aalwayz du weh rait, eevn wen ih di tel wi weh wahn hapm eena di fyoocha.