Afuranguagüda tumuti Bíbülia woun gayara lan lariñaguni Heowá le lunbei lasuseredun ámuñegü (Isa. 45:21). Inarüni lau mafuranguagüdün tani Bíbülia buidu buidu ida liña lan ladügüni, ni ídaba lan ladügei, nírügü átiribei lan lídangiñe labusenrun lasubudirun. Kei ua lan gunfuranda wamani sun le ariñawagúbei luagu kesi le, ligíati siñá lubéi wasigenehan hama gürigia libügürü. Gama lumoun, anihein fiu katei le wasubudirubei.

Mébehati lubafu Heowá, gama lumoun anihein dan anúadirati lun madügün lan ítaga katei. Kei mébeha lan lichú lau, gayaraati lariñaguni furumiñeguarügü katei le lunbei lasuseredun ámuñegü (Rom. 11:33). Kei gayara lan lárügüdagun lungua sunsuinagubei, gayaraati giñe lanúadirun lun masubudirun lani le lunbei lasuseredun ámuñegü (ariha huméi giñe Isaíasi 42:14).

Adügati Heowá lun lagunfulirun lugundan. Kati lánibei le luma iyaraani le luágubei lun lasubudiruni le lunbei lasuseredun ámuñegü? Ariñagati lidan Isaíasi 46:10: “Ariñaga numuti le lunbei lasuseredun lúmagiñe furumiñeti dan; ariñaga numuti le anitebei saragu dan lubaragiñe. Ariñagatina: ‘Lasusereduba sun le naransehabei; nadügübei sun le naritagubei nadügün’”.

Aban resun luagu gayara lan lariñaguni Heowá le lunbei lasuseredun ámuñegü ladüga gabafuti lun ladügün lun lasuseredun katei. Memegeirunti Heowá larihini kaba lan asusereda ámuñegü, ítara kei héibaaguagüdün gürigia aban pikchá o pelikula lúnrügü hasubudiruni ka lan lunbei lasuseredun lidan lagumuhóun. Gayaraati lanuadirún Heowá lun lasuseredun somu katei ítaga weyu ani dan le lachülürün weyu ligía, gayaraati ladügün lun lasuseredun (Afu. 9:​5, 6; Mat. 24:36; Adü. 17:31).

Ligíati lébubei layusuruni Heowá dimurei “naransehan”, “adüganá” luma “ítara luba nadügüni” lun lariñaguni le lunbei ladügüni luagu fiu katei le lunbei lasuseredun ámuñegü (2 Uru. 19:25; Isa. 46:11). Lidan hererun ebüréana yúsutiña aban dimurei le úarati luma dimurei nadagimeinti múa (Her. 18:4). Ítara kei gayara lan ladügün aban nadagimeinti múa aban lubuidun gíndili, gayaraati giñe ladügün o lahandilihani Heowá katei lun lagunfuliruni lugundan (Efe. 1:11).

Ígirati Heowá lun wanúadiruni le lunbei wadügüni. Míchugunti Heowá lisinun aban gürigia ani mínchahan lumutiña giñe gürigia ha buiti hagaburi lun hadügün katei wuribati lun lagünrinchaguniña lárigiñe. Le ladügübei, arufudaharügüti igaburi buiti woun lun wawinwanduni ani ígirati lun lanúadiruni kada gürigia üma le lunbei lafalaruni.

Ariha wamá bián hénpulu. Le furumiñeti, hawagu gürigia ha awinwandubaña uburugu Níniwe. Hanarimeti meha wuribani lidan uburugu ligía, ligía lariñagubei Heowá lagünrinchagubaña lan lílana. Kei aba lan hasakürihan “aba larihini Wabungiute katei le hadügübei Níniwena, hígiruni luriban hóuserun, aba madügün laali lan abeichúni le yebe uágubei lariñaga houn” (Hon. 3:​1-10). Aba lasansiruni Heowá le laritagubei ladügün. Ka uagu? Ladüga hadügün gürigia ha awinwandubaña Níniwe gasu lau leweridihan Heowá ani aba hasakürihan.

Le libiaman sügǘ luagu profesía luáguti Siru, le lunbei meha lárügüdüni uburugu Babilónia dan meha ligira ani le lunbei líchugun gumadi houn huríu lunya tábunawagun litenpulun Heowá (Isa. 44:​26–45:4). Luáguba meha urúei Pérüsiana le, lagunfulira profesía le (Ésüd. 1:​1-4). Gama lumoun, máhuduragunti meha Siru lun Bungiu inarüniti. Inarüni yusu lani Heowá urúei le lun lagunfuliruni profesía le, lau sun lira, mafosu lumuti lun leseriwidun lun (Ari. 21:1).

Ligíati anihein saragu katei laganagua katei le. Le linarün katei, siñati gunfuranda lani aban gürigia katei le sunsuinagubei ka lan uagu lasaminara Heowá ítara luma ligaburi ladügüni katei ni iyaraani le luágubei lun lariñaguni le lunbei lasuseredun ámuñegü (Isa. 55:​8, 9). Íbini ítara, le wasubudirubei luagu Heowá adügati lun wachoururuni adüga lani le buídubei súnwandan, íbini dan le lariñaguni le lunbei lasuseredun ámuñegü.