Lööknyi ṙô ön ngam Paipöl nö vë-eny inlahen Yāvē tö ò nö mihôiṅ nö vë-eny inlahen nup yamih min ṙētak. (Isa. 45:21) Öt keuheūtnyö ṙô re pöri angū-ö nö vë-eny nang hī tö inlahen Yāvē nö sitih inlahen nö akahakūö tö nup yamih ṙētak, ihē anga-aṅ nö ngatī inlahen hēk sitih inlahen anga-aṅ nö kēḵ fesla re tö ṙôken mikahkūö re. Lökten in öt ṙòkhöre mikahkūö tö inlahen ngam heuneū-en ò nö akahakūö tö inlahen nup yamih ṙētak. Ōt pöri nup ṙô mikahkūö hī. Tā-a chěi töi kakken u.

Nup töng lōn Yāvē mihôiṅ anga-aṅ nö hateungngen u, ṙōlheuh pöri anga-aṅ nö sōḵ nö hateungngö nup tö ōt kuilōnre. Tö aṙū-uti an ngam mikah Yāvē. Tö ngö manah angū-ö tö e nö öt tö tölngukūö. Lökten anga-aṅ nö mihôiṅ nö akahakūö tö inlahen nup yamih ṙētak. (Rōm. 11:33) Tövai inrē ang Yāvē nö inchō-elmat hī öi īnu tö ngam ṙinapöre. Lökten anga-aṅ nö vī tölngö inlahen ṙôken mikahkūöre.—Asatô e im Isayā 42:14.

Mahateungngö minë kuilōn re an Yāvē. Sitih pöri angū-ö nö ṙongta nö im heuneū-en ò nö vë-eny inlahen nup yamih ṙētak? Ngöṙô an ngam Isayā 46:10: “Vënyö öp manā-aṅ löktökūö ök ranehlö, löktökūö nuk misī hēk nup tö-öl inrē an ngam inlēnö aṅ in chu, hateungngö nup chööḵnyöre chin min.”

Hěng an ngam lāinyngen Yāvē nö vë-eny inlahen minë tö yamih ṙētak. Kirööngen aṅ in anga-aṅ tö kumlēḵ re lökten nö mihôiṅ nö ngatī inlahen. Fē-a man sin tö inlahen re yěm meuk sinimā. Mihôiṅ man ṙung öm fòrvööt öp maheuṅk re yěm hòṅ akahakūö tö öp manā-aṅ sīn ngam sinimā. Hö-ö pöri ang Yāvē nö ngatī inlahen nö haveut ngam ṙētak kūö ò nö hòṅ meuk inlahen öp töhěng falngen, ngaich möl nö vë-eny nang hī tö nup yamih ṙētak. Pön urěhngöre inlahen anga-aṅ nö halēnlö öp töhěng ṙētak re nö vë-eny inlahen nup yamih ṙētak. Ngaich kô-en anū-ö nö teung nö ngatī inlahen nö asā nup ṙētak hē ò nö halēnngen u.—Man. 9:5, 6; Mët. 24:36; Inl. 17:31.

Anū-ö lāinyngen vinënyö u nö imat ngam Paipöl tö inlahen Yāvē min ip yamih ṙētak. Tö sā minë ṙô tö yūsö, tö sā ngam “halēnöre” “tö vī-i.” (2 Rā. 19:25; Isa. 46:11) Trānslētö ön ngih ṙô nö im òrichnöl lengvēch nö tö ṙongta angū-ö nö in öp töhěng ṙô, ngam tö ngö manah, “vamī tanīöyö.” (Yar. 18:3, 4) Sā inlahen heuneū-en ngòh töhěng tak vamī tanīöyö, nö vī ök tilin anga-aṅ nö tövai nö tanīöyö. Ngatī ṙēngen ang Yāvē nö harīkkö talöökö tī re nö hateungngö ngam kuilōn re.—Efi. 1:11.

Hökngen hī ang Yāvē öi kē nup fësla re. Öt urěhngöre inlahen tī anga-aṅ nö halēnng inlahen ngòh töhěng tak tarik, nö sitih inlahen tinrīken hēk asuh min nup inlahen ò. Ötrěhěn nö tölṙô yip tölöök tarik nö inup la-en hòṅ cha nö öt löngö kahëken. Pön hökngö inlahen ngòh töhěng tak tarik ang Yāvē nö katöllö nup kuilōn re hēk sitih inlahen lōn inrē tö tinrīken re. Ṙūöhöl alaha hī pöri anga-aṅ öi ṙòkhöre tö hī öi löögö katöllö tö talöökö re.

Töi ngëichkö në tö nët min inchō-elmat re. Ngam raneh, inlahen yik tarik aṅ Niněvē. Urěhngöre ṙô ang Yāvē nö vë-eny inlahen ngam inhetngö ngam panam Niněvē. Kūö yip tarik aṅkūö e nö öt lööngö kahëken tö la-en. Ik sā yik tarik pöri aṅ Niněvē nö halööktit re ngaich chumkūöṙen ang Yāvē tö ngam kahë re fesla. Lökten anga-aṅ nö öt ha-etngö yik aṅ Niněvē. (Yôna 3:1-10) Ik sā cha nö hang ngam vôrning kahëtö Yāvē ngaich chumkūöṙen cha-a, lökten nö halööktitre. Angū-ö lāinyngen ngam fësla Yāvē nö haṙī-ingre.

Ngam innëtö inchō-elmat, ngam inlahen öp tö Sairös minënyi tarik. Ngam tö kilē-ěyö inlahen ò nö ṙānyen yik Yahuti tö haköövö ngaich kētö chööngö nö in cha nö havanlö vinīlö öp töhet chūök Yāvē. (Isa. 44:26–45:4) Teungtakūö ngih kinlēḵngô nö in ök rācha Sairös aṅ Mito-Pörsiā. (Esrā 1:1-4) Hö-ö pöri ang Sairös nö lamöklōn ngam tökô-en Tēv. Hateung ngö ngam kuilōn re ang Yāvē nö löktö in ò tī. Hö-ö pöri anga-aṅ nö timlö alaha ò. Pön kētö ṙētak Sairös anga-aṅ nö katöllö öp lōn re, yěn hòṅ löklōn ò yěn hòṅ hö-ö.—Inch. 21:1.

Töng haroh tūmö nun në vinë-eny inlaha Yāvē nö chumkūöṙen tö inlahen nup yamih ṙētak. Kô-en ayī-ö öt keuheūtlöre mikahkūö tö inlahen minë mufē Yāvē hēk minë kahëken ò la-en. (Isa. 55:8, 9) Nup kahëtö Yāvē pöri minkahtölōn hī, lökten in u minë ṙinātö-ellōn hī nö sīöplöre. Nup töng sitih la-en ò, ṙòkhöre anū-ö nö töng löng, ngam inlahen ò inrē nö vënyö nup yamih ṙētak.