Ang Bibliya klarong nagpakita nga kaya ni Jehova nga mahibaloan ang umaabot. (Isa. 45:21) Pero wala ni magdetalye kon sa unsang paagi ug kon kanus-a niya kini ginahimo, ug kon unsa ka daghang detalye ang iyang gipili nga mahibaloan. Busa dili ta puwede mahimong dogmatiko bahin niini. Pero niay pipila ka butang nga atong nahibaloan.

Si Jehova walay limitasyon gawas nianang gitakda niya para sa iyang kaugalingon. Kay walay kinutoban ang iyang kaalam, kaya niyang masayran ang bisan unsa nga gusto niyang mahibaloan. (Roma 11:33) Pero tungod kay hingpit ang iyang pagpugong sa kaugalingon, puwede pod niyang pilion nga dili mahibaloan kon unsa unyay mahitabo.—Itandi ang Isaias 42:14.

Ipahinabo ni Jehova nga matuman ang iyang kabubut-on. Unsay koneksiyon niana sa iyang katakos nga mahibaloan ang umaabot? Ang Isaias 46:10 nagpatin-aw: “Sukad sa sinugdan gitagna na nako ang mahitabo, ug sa dugay nang panahon gitagna na nako ang mga butang nga wala pa mahimo. Ako miingon, ‘Ang akong desisyon matuman, ug buhaton nako ang bisan unsa nga akong gusto.’”

Busa ang usa ka rason kon nganong matagna ni Jehova ang umaabot mao nga naa siyay gahom nga ipahinabo ang bisan unsa nga gusto niya. Dili niya kinahanglang mag-fast forward, ingnon ta, aron makita kon unsa unyay mahitabo—nga sama bag usa ka tawo nga nag-forward sa iyang gitan-aw nga salida aron makita ang ending niini. Hinuon, si Jehova makadesisyon kon unsay gusto niyang mahitabo sa usa ka espesipikong panahon ug dayon ipaposible niya nga mahitabo na sa panahon nga iyang gitakda.—Ex. 9:​5, 6; Mat. 24:36; Buh. 17:31.

Tungod niana, ang Bibliya naggamit ug mga termino sama sa “giandam” ug “giumol” sa paghisgot kon unsay ginahimo ni Jehova sa pipila ka panghitabo sa umaabot. (2 Hari 19:25; footnote) Ang orihinal nga pulong para niini nga mga termino konektado sa pulong nga “magkukulon.” (Jer. 18:4) Sama nga kayang pormahon sa ekspertong magkukulon ang yutang kulonon aron mahimo ning nindot kaayo nga vase, kayang pormahon, o maniobrahon, ni Jehova ang mga butang aron matuman ang iyang kabubut-on.—Efe. 1:11.

Gitahod ni Jehova ang kagawasan sa tawo nga mopili. Wala niya gitakda daan kon unsay mahitabo sa kinabuhi sa usa ka tawo. Ug dili gyod niya ipahinabo nga ang mga tawo nga sinsero ug kasingkasing mohimog butang nga moresulta sa ilang kalaglagan. Gitugotan niya ang tanan nga modesisyon kon sa unsang paagi sila magkinabuhi, ug gidasig niya sila nga pilion ang pinakamaayong paagi.

Konsideraha ang duha ka pananglitan. Ang una maoy bahin sa mga taga-Nineve. Miingon si Jehova nga malaglag ang siyudad tungod sa grabeng pagkadaotan niini. Pero dihang naghinulsol ang mga nagpuyo didto, “wala na niya idayon ang katalagman nga iyang giingon nga ipahinabo kanila.” (Jon. 3:​1-10) Gibag-o ni Jehova ang iyang hunahuna bahin sa iyang gitagna tungod kay ang mga taga-Nineve midesisyon nga maghinulsol human nila madungog ang pasidaan ni Jehova.

Ang ikaduhang pananglitan mao ang tagna bahin sa usa ka tawo nga ginganlag Ciro, kinsa magpahigawas sa mga Hudiyo gikan sa pagkabihag ug magsugo nga tukoron pag-usab ang templo ni Jehova. (Isa. 44:26–45:4) Gituman ni Haring Ciro sa Persia ang maong tagna. (Esd. 1:​1-4) Bisan pa niana, si Ciro wala nahimong magsisimba sa matuod nga Diyos. Gigamit ni Jehova si Ciro aron tumanon ang tagna, pero gitugotan Niya si Ciro sa pagdesisyon kon kinsay iyang simbahon.—Prov. 21:1.

Siyempre, dili lang kining mga butanga ang konsiderahon ni Jehova dihang gamiton niya ang iyang katakos nga mahibaloan ang umaabot. Ang tinuod, wala gyoy tawo nga bug-os nga makasabot sa panghunahuna ug sa mga ginahimo ni Jehova. (Isa. 55:​8, 9) Pero ang atong nahibaloan bahin kaniya nagpalig-on sa atong pagtuo nga kanunay gyong himoon ni Jehova kon unsay husto—apil na dihang magtagna siya bahin sa umaabot.