Bibuli neyereka ge ku Yehova ari kubasa kugamba ebiribaho omu biro by’omu misho. (Isa 45:21) Konka teri kutugambira oku ari kubikora, obwire obu ari kubikoreramu, ninga ngu etugambire byingi ebiri kukwata aha ki ari kubimanyaho. Obwe rero, tituri kumanya ebintu byona ebiri kukwata aha bushoborozi bwa Yehova bw’okugamba ebiribaho omu biro by’omu misho. Konka, reka tushwijume ebintu bice ebi turi kumanya.

Yehova ayine obushoborozi bw’okukora ekintu cona eki ari kwenda, konka obumwe nabasa kusharamu kutabikora. Yehova nabasa kukoresa obwenge bweye obutine bugarukiro atugambira ebintu byona ebi ari kwenda. (Rom 11:33) Ahabw’okuba ari kumanya kwekwata omu buryo obuhikirire nabasa kushusha nk’owayehuzya ebintu ebirije kubaho.—Geranisa n’ebiri omuri Isaya 42:14.

Yehova nayikiriza ngu ebi ari kwenda bibeho. Mbehi ebyo byine kaha kakwate n’obushoborozi bweye bw’okugamba ebiribaho omu biro by’omu misho? Omuri Isaya 46:10 nihagamba ngu: ‘Okwiha aha kutandika nkaranga eby’emperu, nayiha omu biro bya kare, nindanga ebitakabireho. Ningira nti: Enama yange eryahama, mpikirize ebi namaririre kukora byona.’

Obwe rero, enshonga eri kutuma Yehova yagamba aha birije kubaho omu biro by’omu misho, ni ahabw’okuba ayine amani g’okutuma ebyo bintu byabaho. Tari kwetenga kubanza yareba ebirije kubaho omu biro by’omu misho kugira ngu amanye ekirije kubaho. Ahobwe Yehova nabasa kusharamu ekirije kubaho omu biro by’omu misho, rero atume cabaho omu bwire obuhikire.—Kur 9:5, 6; Mat 24:36; Byak 17:31.

Ni yo nshonga Bibuli eri kukoresa ebigambo “kutebekanisa,” “kuhanga,” n’“ekigendererwa” eri kushoborora eki Yehova ari kukora aha bikwatirine n’ebiribaho omu biro by’omu misho. (2 Bag 19:25; Isa 46:11) Ebyo bigambo nibibasa n’okumanyisa ekigambo ekiri kumanyisa “omubumbi.” (Yer 18:4) Nk’oku omubumbi omanyirire ari kubasa kukoresa ibumba akihamu ekintu kirungi, Yehova na we nabasa kutubumba nk’oku ari kwenda kugira ngu tuhikirize ebi ari kwenda.—Efe 1:11.

Yehova nayikiriza ngu tukorese ekiconco c’okweshariramu. Tiwe ori kushariramu buri muntu ekirimuhikaho omu biro by’omu misho. Kandi tiwe ori kutuma abantu b’emitima mirungi bagwa omu bibi ebiri kubasa kutuma bacwekerezibwa. Nayikiriza buri omwe kwekorera ensharamu kandi aha buri omwe obugabe bw’okweshariramu eki ari kwenda kukora.

Reka tushwijume ebyokureberaho bibiri. Ecokureberaho c’okubanza nikigamba aha bantu b’omuri Nineve. Yehova akaba yagambire ku eyo tawuni yabire erije kucwekerezibwa ahabw’ebibi ebi babire bari kukora. Konka ku bayehanire Yehova ‘akegarukaho, yareka akabi aku yabire ari kwenda kubaretera.’ (Yon 3:1-10) Yehova akahindura ebi yabire yagambire ku byabire birije kuhika aha baturage b’omuri Nineve, ahabw’okuba bayegarukireho bakehana bakahurikiza obutumwa obu Yehova yabagambire.

Ecokureberaho ca kabiri ni ekiri kugamba aha buhanuzi obwagambire ahari Kuro, owabire arije kwiha Abayudaya omu bunyage kandi akashuba kongera kombeka hekalu ya Yehova. (Isa 44:26–45:4) Omugabe wa Buperesi Kuro akahikiriza obwo buhanuzi. (Ezr 1:1-4) Konka Kuro akaba atari kuramya Ruhanga ow’amazima. Yehova akikiririza Kuro kugira ngu ahikirize obwo buhanuzi konka taramugemire kumuhereza.—Emi 21:1.

Ni amazima ebyo ni ebintu bice ebiri kwereka ebiri omu bi Yehova ari kushwijuma, yaza kugamba ebirije kubaho omu biro by’omu misho. Nitumanya ku hatine omuntu ori kubasa kumanya omu bwijwire emihanda ya Yehova. (Isa 55:8, 9) Konka ebi turi kumanya ahari Yehova nibituma twagira okwikiriza kugumire, kandi twesiga ku ebi ari kukora burijo biri kuba bihikire, harimu n’ebi ari kuturaganisa ku arije kutukorera omu biro by’omu misho.